વિશ્વ / 'ગ્લોબલ સાઉથ વગર વૈશ્વિક સંસ્થાઓ નેટવર્ક વિનાના સિમ કાર્ડ જેવી...' BRICSમાં PM મોદી

બ્રાઝિલના રિયો ડી જાનેરોમાં આયોજિત 17મા બ્રિક્સ સમિટને પ્રધાનમંત્રી નરેન્દ્ર મોદીએ સંબોધિત કર્યું. આ દરમિયાન તેમણે આંતરરાષ્ટ્રીય શાસન માળખામાં વ્યાપક સુધારાની જરૂરિયાત પર ભાર મૂક્યો. તેમણે કહ્યું કે 21મી સદીના નિર્ણયોમાં ગ્લોબલ સાઉથની ભાગીદારી વધારવી હવે જરૂરી બની ગઈ છે.

પીએમ મોદીએ કહ્યું કે વિશ્વની બે તૃતીયાંશ વસ્તી 20મી સદીમાં રચાયેલી વૈશ્વિક સંસ્થાઓમાં યોગ્ય પ્રતિનિધિત્વ મેળવી શકી નથી. આજના વૈશ્વિક અર્થતંત્રમાં મહત્વપૂર્ણ યોગદાન આપી રહેલા દેશોને નિર્ણય લેવાના ટેબલ પર સ્થાન આપવામાં આવ્યું નથી.

તેમણે તેને ફક્ત પ્રતિનિધિત્વનો પ્રશ્ન જ નહીં ગણાવ્યો, પરંતુ તેને આ સંસ્થાઓની વિશ્વસનીયતા અને અસરકારકતા સાથે પણ જોડ્યો. એક સરળ ઉદાહરણ સાથે પોતાનો મુદ્દો સમજાવતા, પીએમ મોદીએ કહ્યું કે ગ્લોબલ સાઉથ વિના, આ સંસ્થાઓ એક મોબાઇલ ફોન જેવી છે જેમાં સિમ કાર્ડ છે પણ નેટવર્ક નથી.

'ગ્લોબલ સાઉથને ફક્ત પ્રતીકાત્મક સમર્થન મળ્યુ '

વડા પ્રધાન મોદીએ ગ્લોબલ સાઉથના સતત હાંસિયામાં ધકેલવા પર પ્રકાશ પાડ્યો અને કહ્યું કે ભલે તે વિકાસનો મામલો હોય, સંસાધનોના વિતરણનો હોય કે સુરક્ષા સંબંધિત મુદ્દાઓ હોય, ગ્લોબલ સાઉથના હિતોને પ્રાથમિકતા આપવામાં આવી નથી. તેમણે કહ્યું કે ક્લાઇમેટ ફાઇનાન્સ, ટકાઉ વિકાસ અને ટેકનોલોજીની પહોંચ જેવા મુદ્દાઓ પર, ગ્લોબલ સાઉથને નામમાત્ર સમર્થન સિવાય કંઈ મળ્યું નથી.

-21મી સદીનું સોફ્ટવેર 20મી સદીના ટાઇપરાઇટર પર ચલાવી શકાય નહીં'

બ્રિક્સ સમિટમાં વડા પ્રધાન મોદીએ કહ્યું કે જ્યારે વિશ્વમાં દર અઠવાડિયે AI અને ટેકનોલોજી અપડેટ થઈ રહી છે, ત્યારે તે અસ્વીકાર્ય છે કે વૈશ્વિક સંસ્થાઓ 80 વર્ષથી અપડેટ વિના ચાલી રહી છે. 21મી સદીનું સોફ્ટવેર 20મી સદીના ટાઇપરાઇટર પર ચલાવી શકાય નહીં. બ્રિકસના વિસ્તરણને સકારાત્મક પરિવર્તનનું ઉદાહરણ ગણાવતા પીએમ મોદીએ કહ્યું કે આ સંગઠન સમય અનુસાર પોતાને બદલવાની ક્ષમતા ધરાવે છે.

આ પણ વાંચો : શિક્ષણ જગત શર્મસાર, આચાર્ય અને શિક્ષકે 20 જેટલા બાળકો સાથે આચર્યુ કુકર્મ

'સુધારા લાવવા માટે ઇચ્છાશક્તિ હોવી જોઈએ'

સમિટમાં પીએમ મોદીએ કહ્યું કે બ્રિક્સનું વિસ્તરણ અને નવા મિત્રોનું જોડાવું એ વાતનો પુરાવો છે કે બ્રિક્સ એક એવું સંગઠન છે જે સમય અનુસાર પોતાને બદલી શકે છે. હવે આપણે UNSC, વિશ્વ વેપાર સંગઠન (WTO) અને બહુપક્ષીય વિકાસ બેંકો જેવી સંસ્થાઓમાં સુધારા માટે પણ આવી જ ઇચ્છાશક્તિ દર્શાવવી પડશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ