ઓપરેશન સિંદૂર / પહેલગામની વાત કરતા G7 દેશોએ આ શું કહી દીધું? ભારત-પાક. તણાવ વચ્ચે આપ્યું ચોંકાવનારું નિવેદન

India Pakistan Tension: ભારત-પાકિસ્તાન વચ્ચે તણાવ ઘણો વધી ગયો છે. આ અંગે દુનિયાભરમાંથી પ્રતિક્રિયાઓ આવી રહી છે. આ સંદર્ભમાં, G7 દેશોના વિદેશ મંત્રીઓ અને યુરોપિયન યુનિયનના ઉચ્ચ પ્રતિનિધિએ પણ આ અંગે નિવેદન આપ્યું છે. 22 એપ્રિલના રોજ પહેલગામમાં થયેલા ભયાનક આતંકવાદી હુમલાની સખત નિંદા કરતા, કહેવામાં આવ્યું કે ભારત અને પાકિસ્તાને આ તણાવપૂર્ણ પરિસ્થિતિમાં મહત્તમ સંયમ રાખવો જોઈએ. નિવેદનમાં કહેવામાં આવ્યું કે આગળ કોઈપણ લશ્કરી તણાવ પ્રાદેશિક સ્થિરતા માટે ગંભીર ખતરો ઉભો કરી શકે છે અને બંને દેશોના નાગરિકોની સુરક્ષા અંગે ઊંડી ચિંતા વ્યક્ત કરવામાં આવી છે.

તાત્કાલિક તણાવ ઓછો કરવાની અપીલ

હકીકતમાં, G7 એ તાત્કાલિક તણાવ ઓછો કરવા હાકલ કરી અને ભારત અને પાકિસ્તાન બંનેને શાંતિપૂર્ણ ઉકેલ શોધવા માટે સીધી વાતચીત શરૂ કરવા જણાવ્યું. સાથે જ એમ કહેવામાં આવ્યું કે તેઓ પરિસ્થિતિ પર નજીકથી નજર રાખી રહ્યા છે અને સ્થાયી અને ઝડપી રાજદ્વારી ઉકેલનું સમર્થન કરે છે. આ નિવેદનમાં આતંકવાદની સ્પષ્ટ નિંદા કરવામાં આવી અને શાંતિ માટે વૈશ્વિક સમર્થનનો સંકેત આપવામાં આવ્યો છે.

અમેરિકા બંને દેશો સાથે સતત સંપર્કમાં

આ પહેલા અમેરિકાએ ફરી એકવાર આ અંગે પોતાની પ્રતિક્રિયા આપી છે. શુક્રવારે વ્હાઇટ હાઉસે કહ્યું કે રાષ્ટ્રપતિ ડોનાલ્ડ ટ્રમ્પ ઇચ્છે છે કે આ તણાવ શક્ય તેટલી વહેલી તકે સમાપ્ત થાય. વ્હાઇટ હાઉસના પ્રેસ સેક્રેટરી કેરોલિન લેવિટે જણાવ્યું હતું કે રાષ્ટ્રપતિ ટ્રમ્પ બંને દેશો વચ્ચેના જૂના મતભેદોને સમજે છે અને માને છે કે વર્તમાન પરિસ્થિતિને વધુ બગડતી અટકાવવી જોઈએ. તેમણે કહ્યું કે વિદેશ મંત્રી માર્કો રુબિયો અને રાષ્ટ્રીય સુરક્ષા સલાહકાર સતત બંને દેશોના સંપર્કમાં છે અને તણાવ ઓછો કરવા માટે પ્રયાસો કરી રહ્યા છે.

આ પણ વાંચો: 'આમાં અમારું કોઈ કામ નથી, અમે વચ્ચે પડવાના નથી', ભારત-પાક. તણાવ વચ્ચે અમેરિકાનું નિવેદન

આ પહેલા અમેરિકાના ઉપરાષ્ટ્રપતિ જેડી વાન્સે પણ કહ્યું કે અમેરિકા આ ​​તણાવમાં સીધી દખલ નહીં કરે. તેમણે સ્પષ્ટતા કરી કે અમેરિકા બંને દેશોને રાજદ્વારી માધ્યમથી તણાવ ઓછો કરવા કહેશે. પરંતુ કોઈપણ લશ્કરી કાર્યવાહીમાં જોડાશે નહીં. તેમણે ચિંતા વ્યક્ત કરી કે આ તણાવ સંપૂર્ણ યુદ્ધ અથવા પરમાણુ સંઘર્ષમાં ફેરવાઈ શકે છે. જોકે, હાલમાં આવી કોઈ આશંકા નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ