વિશ્વ / ઈરાને દુનિયાને બતાવી અન્ડરગ્રાઉન્ડ મિસાઈલ સિટી, વધશે ઇઝરાયલ-અમેરિકાનું ટેન્શન

ઈરાને પોતાની સૈન્ય શક્તિનું પ્રદર્શન કરતા એક અન્ડરગ્રાઉન્ડ "મિસાઈલ સિટી"નો એક નવો વીડિયો જારી કર્યો છે. આમાં એક લાંબી ટનલમાં ભારે શસ્ત્રો દેખાઈ રહ્યા છે. મંગળવારે જાહેર કરાયેલા આ વીડિયોમાં, ઈરાની સશસ્ત્ર દળોના ચીફ ઓફ સ્ટાફ જનરલ મોહમ્મદ બાગેરી અને ઇસ્લામિક રિવોલ્યુશનરી ગાર્ડ કોર્પ્સ (IRGC) એરોસ્પેસ ફોર્સ કમાન્ડર અમીર અલી હાજીઝાદેહ એક ટનલની અંદર મિસાઈલ બેઝનું નિરીક્ષણ કરતા દેખાઈ રહ્યા છે.

ઈરાની મીડિયા દ્વારા જાહેર કરાયેલા ફૂટેજમાં બતાવવામાં આવ્યું છે કે આ અન્ડરગ્રાઉન્ડ જગ્યા વિવિધ પ્રકારની બેલિસ્ટિક મિસાઇલોથી ભરેલી છે. આ વીડિયો સરકારી મીડિયા દ્વારા બહાર પાડવામાં આવ્યો છે અને આમાં ખતરનાક બેકગ્રાઉન્ડ મ્યુઝિક સાથે, એ મેસેજ આપવાનો પ્રયાસ કરવામાં આવ્યો છે કે ઈરાન કોઈપણ હુમલાનો સામનો કરવા અને કડક જવાબ આપવા સક્ષમ છે. અધિકારીઓ એક ખાસ વાહનમાં સવાર થઈને આ જટિલ ટનલ સિસ્ટમની અંદર ફરતા દેખાઈ રહ્યા છે.

વીડિયોમાં શું બતાવવામાં આવ્યું?

85 સેકન્ડના આ વીડિયોમાં ઈરાની સશસ્ત્ર દળોના ચીફ ઓફ સ્ટાફ મેજર જનરલ મોહમ્મદ હુસૈન બાગેરી અને ઈસ્લામિક રિવોલ્યુશનરી ગાર્ડ કોર્પ્સ (IRGC) એરોસ્પેસ ફોર્સના કમાન્ડર અમીર અલી હાજીઝાદેહ ઈરાનની સૌથી અદ્યતન મિસાઈલો અને રોકેટ વચ્ચે ચાલતા દેખાય છે. આમાં ખૈબર શિકાન, કાદર-એચ, સાજિલ, હાઝ કાસિમ અને પાવ લેન્ડ એટેક ક્રુઝ મિસાઇલો સામેલ છે. આમાંથી કેટલાક શસ્ત્રોનો ઉપયોગ ઈરાને ગયા વર્ષે ઇઝરાયલ પરના હુમલામાં કર્યો હતો.

આ અંગે કમાન્ડર હાજીઝાદેહે કહ્યું, "જો અમે આજથી શરૂઆત કરીએ, તો અમે દર અઠવાડિયે એક નવું મિસાઇલ સિટી ઉભું કરી શકીએ છીએ. આ પ્રોજેક્ટ આગામી બે વર્ષ સુધી ચાલુ રહેશે." આ નિવેદન સ્પષ્ટપણે દર્શાવે છે કે ઈરાન તેની સંરક્ષણ ક્ષમતાઓને મજબૂત બનાવવા તરફ સતત આગળ વધી રહ્યું છે.

આ પણ વાંચો: ભારતના પડોશી દેશમાં વહેલી સવારે ધરા ધ્રુજી, ચીનમાં અનુભવાયો 4.2ની તીવ્રતાનો ધરતીકંપ

અમેરિકાની ધમકી વચ્ચે જારી કર્યો વીડિયો

આ વીડિયો એવા સમયે સામે આવ્યો છે જ્યારે અમેરિકા અને ઈરાન વચ્ચે તણાવ સતત વધી રહ્યો છે. તાજેતરમાં, યુએસ રાષ્ટ્રપતિ ડોનાલ્ડ ટ્રમ્પે તેહરાનને પરમાણુ કરાર પર ફરીથી વાટાઘાટો કરવા માટે બે મહિનાનું અલ્ટીમેટમ આપ્યું છે. આ પહેલા, 2018 માં, ટ્રમ્પ વહીવટીતંત્રે ભૂતપૂર્વ રાષ્ટ્રપતિ બરાક ઓબામા દ્વારા હસ્તાક્ષરિત પરમાણુ કરારમાંથી અમેરિકાને પાછું ખેંચી લીધું હતું. આ ઉપરાંત, ટ્રમ્પે સંકેત આપ્યો છે કે અમેરિકા હૂથી બળવાખોરો સામે ચાલી રહેલી લશ્કરી કાર્યવાહીમાં ઈરાનને પણ નિશાન બનાવી શકે છે, કારણ કે ઈરાનને આ બળવાખોરોનું મુખ્ય સમર્થક માનવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ