આઇસીસી વર્લ્ડ કપ 2019 (ICC World Cup 2019) ગ્રુપ સ્ટેજ લગભગ પૂર્ણ થઇ ચૂક્યું છે. અત્યાર સુધીમાં 25 મેચ રમાઇ ચૂકી છે. અને કઇ ચાર ટીમ સેમીફાઇનલમાં જગ્યા બનાવશે તે સ્પષ્ટ થતું જોવા મળી રહ્યું છે. અત્યાર સુધીમાં રમવામાં આવેલી મેચોમાં દ.આફ્રીકા અને અફઘાનિસ્તાનનું સેમીફાઇનલમાં જગ્યા બનાવવાનું લગભગ અશક્ય છે.
ભારત, ઇંગ્લેન્ડ, ઓસ્ટ્રેલિયા અને ન્યુઝીલેન્ડ ટોપ ચારમાં પોતાની જગ્યા પાક્કી કરતા જોવા મળી રહી છે. આ ચાર ટીમોએ અત્યાર સુધીમાં શાનદાર પ્રદર્શન કર્યું છે. આ ઉપરાંત, પાકિસ્તાન, શ્રીલંકા, અને વેસ્ટઇન્ડિઝમાંથી કોઇ જો પોતાની તમામ મેચ જીતી જાય છે તો ચોથા નંબરે પોતાની જગ્યા બનાવી શકે છે.
અત્યાર સુધીમાં રમવામાં આવેલી મેચોના આધારે પહેલા સ્થાન પર ન્યુઝીલેન્ડ છે. ન્યુઝીલેન્ડે અત્યાર સુધીની તમામ મેચ જીતી છે. પાંચ મેચમાંથી ચાર મેચ જીતીને પોઇન્ટ ટેબલમાં 9 પોઇન્ટ્સ સાથે ટોચ પર છે. એની એક મેચ ભારત વિરુદ્ધ ખરાબ હવામાનને કારણે રદ્દ થઇ હતી.
બીજા સ્થાને યજમાન ઇંગ્લેન્ડ છે. ઇંગ્લેન્ડ અત્યાર સુધીમાં પાંચ મેચોમાંથી ચાર મેચ જીતી ચૂક્યું છે. જ્યારે એક મેચ હાર્યું છે. ઇંગ્લેન્ડ હાલ પોઇન્ટ ટેબલમાં 8 પોઇન્ટ્સ સાથે બીજા સ્થાને છે. ઇંગ્લેન્ડને પાકિસ્તાન સામે હારનો સ્વાદ ચાખવો પડ્યો છે. આથી તેનું ટોપ 2માં જગ્યા બનાવી થોડી મુશ્કેલ લાગી રહી છે. જોકે સેમીફાઇનલ માટે આરામથી ક્વોલિફાઇ કરી શકશે.
ત્રીજા સ્થાને પાંચ વારની ચેમ્પિયન ઓસ્ટ્રેલિયા છે. ઓસ્ટ્રેલિયાએ અત્યાર સુધીની પાંચ મેચોમાંથી ચાર મેચમાં જીત મેળવી છે. જ્યારે ભારત સામે એક મેચમાં હારનો સામનો કર્યો છે. ઓસ્ટ્રેલિયાના હાલ 8 પોઇન્ટ્સ છે. અને તે સમીફાઇનલમાં જગ્યા બનાવવાની રેસમાં સામેલ છે.
હવે વાત કરીએ ચોથી ટીમની તો, બિલકુલ ચોથી ટીમ છે ભારત. ભારતે અત્યાર સુધી ચાર મેચોમાં અજેય રહી છે. ન્યુઝીલેન્ડ વિરુદ્ધની મેચ વરસાદને કારણે રદ્દ થઇ હતી. એ સિવાયની તમામ મેચ ભારત જીત્યું છે. ભારત આ વર્લ્ડ કપની પ્રબળ દાવેદાર માનવામાં આવે છે. જો ભારત પોતાની બાકી તમામ મેચ જીતી જાય છે તો પોઇન્ટ ટેબલમાં ટોચ પર પહોંચી જશે.
હવે આ ચાર ટીમો ઉપરાંત, જે કોઇ ટીમના સેમીફાઇનલમાં જગ્યા બનાવવાના ચાન્સ છે તો એ છે બાંગ્લાદેશ. બાંગ્લાદેશે પોતાની રમતમાં ઘણો બદલાવ કર્યો છે. હવે તે અંડર ડોગની જેમ નહીં પરંતુ અનુભવી ટીમની જેમ રમી રહી છે. વેસ્ટઇન્ડિઝ વિરુદ્ધ બાંગ્લાદેશે વર્લ્ડ કપમાં બીજો સૌથી મોટો સફળ ચેસ કર્યો અને રનોનો પીછો કરતા સૌથી મોટી જીત હાંસલ કરી. એવામાં જો બાંગ્લાદેશ જો ભારત, ઓસ્ટ્રેલિયા અને પાકિસ્તાનમાંથી કોઇ બેને હરાવી દે છે તો સેમીફાઇનલ રમી શકે છે.