સ્વાસ્થ્ય / આજે શા માટે મનાવાય છે બ્લડ ડોનર ડે?

મેડિકલ જગતમાં સંશોધન ક્ષેત્રે અનેક પ્રગતિઓ થઇ. પ્રયોગશાળાઓમાં ઘણી બધી વસ્તુઓ, માનવ અંગો પણ બનાવવાના સંશોધનો થયા, પરંતુ એક વસ્તુ એવી છે જે માત્ર અને માત્ર માણસના શરીરમાં જ બને છે અને તે છે લોહી. આજ સુધી કોઇ મોટા ગજાના વૈજ્ઞાનિક પણ લોહી કેવી રીતે બને છે તે શોધી શક્યા નથી કે પ્રયોગશાળામાં તેને બનાવી શક્યા નથી. લોહી માત્ર માનવ શરીરમાં જ બને છે અને જ્યારે કોઇ વ્યક્તિને જરુર હોય ત્યારે બીજી વ્યક્તિ સરળતાથી તેને ડોનેટ પણ કરી શકે છે.

દર વર્ષે 14 જુનનો દિવસ બ્લડ ડોનર ડે તરીકે ઉજવવામાં આવે છે. તમે જાણો છો કે શામાટે આજનો દિવસ બ્લડ ડોનર ડે તરીકે પસંદ થયો છે? 1901ના વર્ષમાં મુળ ઓસ્ટ્રેલિયન બાયોલોજિસ્ટ અને ફિઝિશિયન એવા કાર્લ લેન્ડસ્ટેઇનરે શોધ્યુ હતુ કે દરેક માણસનું લોહી એકસરખું હોતું નથી. તેમણે લોહીમાં હાજર-ગેરહાજર એન્ટિજનને આધારે એ,બી,ઓ,એબી એમ ચાર પ્રકારના પોઝિટિવ અને નેગેટિવ આર એચ ફેક્ટર ધરાવતુ આઠ પ્રકારનું લોહી હોય છે એ સાબિત કર્યુ હતુ.

આ સંશોધનના આધારે મેચિંગ બ્લડ ગ્રુપ ધરાવતા લોકો એકબીજાને લોહી આપી શકે એ સાબિત થયું હતું. સંશોધક કાર્લ લેન્ડસ્ટેઇનરનો જન્મ દિવસ 14 જુનના રોજ હોવાથી વર્લ્ડ હેલ્થ ઓર્ગેનાઇઝર દ્વારા વર્લ્ડ બ્લડ ડોનર ડે ઉજવવામાં આવે છે. બ્લડ ડોનેટ કરવાના ફાયદા પણ છે.

- નિયમિત રક્તદાન કરવાથી હાર્ટએટેકનું જોખમ ઘટી જાય છે. બ્લડ ડોનરને કાર્ડિયોવેસ્ક્યુલર ડીસીઝ થવાની સંભાવનાઓ
33 ટકા જેટલી ઓછી રહે છે.
- નિયમિતપણે લોહી આપવાથી લિવરની કામગીરી સુધરે છે. લોહીમાં લિપિડની માત્રા ઘટે છે.
- એક વાર બ્લડ ડોનેટ કરવાથી 650 કેલરી બળે છે.
- રક્તદાન કરવા જાઓ ત્યારે મિનિ ચેકઅપ થઇ જાય છે. બ્લડપ્રેશર, શુગર, હિમોગ્લોબીન, પલ્સ રેટ જેવું જનરલ હેલ્થ
સ્ક્રીનિંગ થાય છે તેથી તમે કેટલા હેલ્ધી છો તે જાણી શકાય છે.