સંકટ / ભારતને મોટો ઝટકો, વર્લ્ડ બેન્કે ઘટાડ્યું વિકાસ દરનું અનુમાન, આપ્યું મોટું કારણ

• દેશના આર્થિક વિકાસ દરના અંદાજમાં ઘટાડો
• વર્લ્ડ બેન્કના જણાવ્યા અનુસાર ભારતનું GDP 6.5 રહેશે
• જૂન 2022માં વિશ્વ બેંકે જીડીપી 7.5 ટકાનું અનુમાન લગાવ્યું હતું

RBI બાદ હવે વર્લ્ડ બેન્કે ચાલુ નાણાકીય વર્ષ 2022-23માં દેશના આર્થિક વિકાસ દરના અંદાજમાં ઘટાડો કર્યો છે. વર્લ્ડ બેન્કના જણાવ્યા અનુસાર આ વર્ષે ભારતનો જીડીપી 6.5 ટકા રહેવાનો અંદાજ છે. આ પહેલા જૂન 2022માં વિશ્વ બેંકે જીડીપી 7.5 ટકા રહેવાનું અનુમાન લગાવ્યું હતું.

વર્લ્ડ બેંકે ભારતના GDPને લઈને દાવો કર્યો
ઇન્ટરનેશનલ મોનેટરી ફંડ (IMF) અને વર્લ્ડ બેંકની બેઠક પહેલા સાઉથ એશિયા ઇકોનોમિક ફોકસ રિપોર્ટ જાહેર કરવામાં આવ્યો છે, જેમાં વર્લ્ડ બેંકે આ વાતો કહી છે. જો કે તેનું માનવું છે કે, ભારત બાકીના વિશ્વ કરતા ઝડપથી રિકવર થઇ રહ્યું છે. દક્ષિણ એશિયા માટે વિશ્વ બેંકના મુખ્ય અર્થશાસ્ત્રી Hans Timmer એ જણાવ્યું હતું કે કોવિડના પ્રથમ તબક્કામાં ભારે ઘટાડા બાદ ભારતે વિકાસની દ્રષ્ટિએ દક્ષિણ એશિયાના અન્ય દેશોની તુલનામાં સારું પ્રદર્શન કર્યું છે. તેમણે કહ્યું હતું કે, ભારત પર કોઈ વધારે વિદેશી દેવું નથી, જે સકારાત્મક બાબત છે. સાથે જ તેમણે કહ્યું કે, સર્વિસ સેક્ટરમાં ખાસ કરીને સર્વિસ એક્સપોર્ટના ક્ષેત્રમાં ભારતનું પ્રદર્શન સારું રહ્યું છે.

વૈશ્વિક સ્થિતિ નબળી રહેશે
Hans Timmerના જણાવ્યા અનુસાર, વૈશ્વિક સ્થિતિની અસર ભારત સહિત તમામ દેશો પર પડી રહી છે, જેના કારણે વિકાસ દરનો અંદાજ ઘટાડવો પડ્યો છે. તેમણે કહ્યું કે વિશ્વની અર્થવ્યવસ્થામાં મંદીના સંકેતો દેખાવા લાગ્યા છે. બીજા ભાગમાં અન્ય દેશોની સાથે ભારત માટે પણ નબળું રહેવાનું છે. તેમણે કહ્યું કે આના બે કારણો છે. પહેલું, ઊંચી આવક ધરાવતા દેશોના અર્થતંત્રની વૃદ્ધિની ગતિ ધીમી પડી રહી છે, જ્યારે કડક નાણાકીય નીતિને કારણે દેવું મોંઘું થઈ રહ્યું છે, જેના કારણે વિકાસશીલ દેશોમાંથી મૂડીપ્રવાહ જોવા મળી રહ્યો છે.

RBI એ પણ અંદાજો લગાવ્યો હતો
આ પહેલા આરબીઆઈએ પણ 30 સપ્ટેમ્બર 2022ના રોજ મોનિટરી પોલિસીની જાહેરાત કરી હતી, જેમાં 2022-23માં જીડીપી 7 ટકા રહેવાનો અંદાજ હતો.