સ્પોર્ટ્સ / ખેલજગતમાં મોટો ફેરફાર; હવે ખેલાડી પોતાની રીતે  ડિઝાઇન કરાવેલાં શૂઝ નહીં પહેરી શકે

આ કારણે એથ્લીટ હવે મોટાં અને સ્પન્જી સોલવાળાં શૂઝનો ઉપયોગ ઓલિમ્પિક, વર્લ્ડ એથ્લેટિક્સ ચેમ્પિયનશિપમાં કરી શકશે નહીં. અત્યાર સુધી એથ્લીટ્સને પોતાની રીતે ડિઝાઇન કરાવેલાં શૂઝથી થોડો ફાયદો મળી રહેતો હતો, જેને રોકવા માટે વર્લ્ડ એથલેટિક્સે શૂઝ અને સ્પાઇક્સના તળિયાંની ઊંચાઈને નિશ્ચિત કરી દીધી છે.

નિર્ધારિત માપદંડ અનુસાર શૂઝ તૈયાર કરતી  એક પણ ભારતીય બ્રાન્ડ નથી

દુનિયાની કેટલીક પસંદગીની બ્રાન્ડ નિર્ધારિત માપદંડ અનુસાર શૂઝ તૈયાર કરી રહી છે, પરંતુ આમાં એક પણ ભારતીય બ્રાન્ડ નથી. તા. ૧ ડિસેમ્બરથી યોજાનાર ઇન્ટરનેશનલ એથ્લેટિક્સ ચેમ્પિયનશિપમાં નિર્ધારિત ઊંચાઈવાળાં સોલનાં શૂઝ પહેરીને જ એથ્લીટ દોડી શકશે. એથ્લેટિક્સ ફેડરેશન ઓફ ઇન્ડિયા વર્લ્ડ એથ્લેટિક્સ ચેમ્પિયનશિપમાં આ નિયમને લાગુ કરશે, પરંતુ ઘરેલુ સ્તરની ચેમ્પિયનશિપમાં એથ્લીટ કોઈ પણ બ્રાન્ડનાં શૂઝ પહેરીને દોડી શકે છે, પરંતુ સોલની ઊંચાઈ નક્કી કરેલા માપદંડ અનુસાર હોવી જરૂરી છે.

આ છે સોલ અને સ્પાઈક્સની નિશ્ચિત ઉંચાઈ

હાઈ જમ્પ, લોન્ગ જમ્પ અને ૮૦૦ મીટરથી વધુની દોડ માટે સોલની ઊંચાઈ વધુમાં વધુ ૧૩ મિ.મી., જ્યારે સ્પાઇક્સનાં સોલની ઊંચાઈ ૯ મિ.મી. નક્કી કરવામાં આવી છે. આમ રેડ રોઝ અને ક્રોસકન્ટ્રીનાં શૂઝનાં તળિયાંની ઊંચાઈ પણ ૧૩ મિ.મી. નક્કી કરવામાં આવી છે. વર્લ્ડ એથ્લેટિક્સે નવ વિદેશી કંપનીઓનાં શૂઝ અને સ્પાઇક્સને મંજૂરી આપી છે. તે સિવાયની અન્ય કોઈ કંપની નક્કી કરાયેલા આ માપદંડ અનુસાર શૂઝ બનાવશે તો તેણે ચાર મહિના પહેલાં તપાસ માટે જૂતાં વર્લ્ડ એથ્લેટિક્સને મોકલવાં પડશે. કોઈ એથ્લીટ આ બ્રાન્ડ્સ સિવાયનાં શૂઝનો ઉપયોગ કરવા ઇચ્છે તો તેણે એક જોડી શૂઝ છ મહિના પહેલાં મંજૂરી માટે મોકલવાં પડશે.