કોરોનાને કારણે વર્ક ફ્રોમ હોમ સુવિધા શરુ કરવામાં આવી છે પરંતુ હજી પણ એવી ઘણી કંપની છે જે કાયમી ધોરણે આપી રહી છે ઘરેથી કામ
વર્ક ફ્રોમ હોમનું વધી રહ્યું છે ચલણ
કંપનીઓ કાયમી ધોરણે આપી રહી છે વર્કફ્રોમ હોમ
કોરોનાને કારણે વર્ક ફ્રોમ હોમની કંપનીએ આપી હતી સુવિધા
કોરોના કાળમાં કંપનીઓએ વર્ક ફ્રોમ હોમની સુવિધા શરુ કરી હતી. ધીરે ધીરે કોરોનાના કેસ કાબૂમાં આવતા કેટલીક કંપનીઓએ પાછુ ઓફિસમાં કર્મચારીઓને બોલાવવાનું શરુ કરી દીધુ. જો કે હજી પણ એવી કંપનીઓ છે જેણે ઘરેથી કામ કરવાનો વિકલ્પ ખુલ્લો રાખ્યો હોય. તો કેટલીક કંપનીઓ એવી પણ છે જે ઘરેથી કામ કરવા માટે જ કર્મચારીઓની ભરતી કરતી હોય. જી હા, હાલમાં જ એક સર્વેમાં આ વાત સામે આવી છે કે કેટલીક કંપનીઓ લાંબા સમયગાળા સુધી વર્કફ્રોમ હોમની સુવિધા આપી રહી છે.
કાયમ માટે વર્ક ફ્રોમ હોમની સુવિધા
મોંડલીઝ અને ટાટાસ્ટીલ જેવી કંપનીઓ કર્મચારીઓને એવી રીતે ભરતી કરી રહી છે કે તેઓ ઘરેથી કામ કરે. તો આ તરફ મારુતિ સુઝુકી, એમફેસિસ અને આઇટીસી જેવી કંપમીઓ અઠવાડિયામાં અમુક જ દિવસ કર્મચારીઓને ઘરે બોલાવે છે.CIEL HRના ચીફ એક્ઝિક્યુટિવ આદિત્ય મિશ્રાએ જણાવ્યું હતું કે હાલમાં ઘરેથી કામ કરી રહેલા કર્મચારીઓના પગારમાં કોઈ ફેરફાર થયો નથી. પરંતુ જેમને ઘરેથી કાયમી કામ માટે ભરતી કરવામાં આવી રહી છે તેમને 15 ટકા ઓછો પગાર આપવામાં આવી રહ્યો છે.
સરવેમાં થયો ખુલાસો
એક સરવે મુજબ નવી ભરતીઓમાં 10 ટકા લોકો એવા છે જેઓ પરમેનેન્ટ ઘરેથી જ કામ કરશે. દેશભરમાં આઇટી, આઇટીઇએસ, ઇકોમર્સ, બીએફએસઆઇ, રિક્રૂટમેન્ટ, કન્સલ્ટીંગ અને એડટેક સેક્ટરની લગભગ 600 જેટલી કંપનીઓને ટ્રેક કરી. જેમાં 1000 લોકોએ ભાગ લીધો હતો. મોંડલિઝની HR હેડ શિલ્પા વૈદ્યએ જણાવ્યું હતું કે, “અમે મર્યાદિત સ્તરે દૂરસ્થ ભૂમિકાઓ જોઈ રહ્યા છીએ. આ એટલા માટે છે કારણ કે અમે અમારા વ્યવસાય અને કર્મચારીઓ માટે શ્રેષ્ઠ નીતિઓ ઇચ્છીએ છીએ. ઓફિસથી કામ કરતા કર્મચારીઓ અને ઘરેથી કામ કરતા કર્મચારીઓના પગારમાં કોઈ ફરક નથી.
ટાટા સ્ટીલ કરી રહી છે ભરતી
ડિસેમ્બર 2020 માં સ્ટીલ કંપની ટાટા સ્ટીલે એજીલ વોકિંગ મોડલની નીતિ અપનાવી. આ અંતર્ગત નોકરીઓને બે કેટેગરીમાં રાખવામાં આવી હતી. પ્રથમ શ્રેણીમાં કર્મચારીઓને દેશમાં કોઈપણ જગ્યાએથી કાયમી ધોરણે કામ કરવાની સુવિધા આપવામાં આવી હતી. બીજી કેટેગરી એવા અધિકારીઓની હતી જેઓ ચોક્કસ જગ્યાએ પોસ્ટેડ હોય છે. આ લોકો એક વર્ષમાં ગમે તેટલા દિવસ ઘરેથી કામ કરી શકે છે. ટાટા સ્ટીલના પ્રવક્તાએ જણાવ્યું હતું કે કંપની બંને જગ્યાઓ માટે ભરતી કરી રહી છે. પગારમાં કોઈ ફરક નથી.
કંપનીઓ અપનાવી રહી છે હાઇબ્રિડ મોડલ
દેશની સૌથી મોટી ઓટો કંપની મારુતિ સુઝુકી હાઇબ્રિડ મોડલ અપનાવી રહી છે. કંપનીના એક્ઝિક્યુટિવ બોર્ડના સભ્ય રાજેશ ઉપ્પલે જણાવ્યું હતું કે કંપનીએ પોલિસીને લચીલી બનાવી છે જેને કારણે ઉત્પાદન અને કાર્યક્ષમતા પર અસર ન પડે. સર્વે અનુસાર મોટાભાગની મોટી કંપનીઓ કેટલાક કામ માટે કાયમી ઘરેથી કામ કરવા માટે પ્રોત્સાહિત કરી રહી છે. મધ્યમ કદની IT/ITES કંપનીઓ, બેન્કિંગ, ઈન્ફ્રાસ્ટ્રક્ચર, રિટેલ, કેમિકલ, લોજિસ્ટિક્સ અને મેન્યુફેક્ચરિંગ સેક્ટરમાં 50 ટકાથી વધુ કર્મચારીઓ ઓફિસમાંથી કામ કરે છે.