નિવેદન / મહિલા દિવસે DyCM નીતિન પટેલ બોલ્યા, 'પત્નીઓનો સહયોગ ન હોય તો અમે...'

• આજે વિશ્વભરમાં મહિલા દિવસની ઉજવણી 
• પત્નીઓનો સહયોગ ન હોય તો અમે કામ કેવી રીતે કરી શકીએ: DyCM
• આજે મહિલાઓ રાત્રે સ્કૂટર લઇને નીકળી શકે છે: CM

મહિલાઓની મહાનતાને સલામ કરવાનો દિવસ 

વિશ્વભરમાં આજે મહિલા દિવસની ઉજવણી કરવામાં આવી રહી છે અને જીવનમાં નારીનું શું મહત્વ છે તથા નારીના જીવનને લઈને ચર્ચા કરવામાં આવી રહી છે તથા સોશ્યલ મીડિયામાં પણ નારીઓને પ્રોત્સાહન આપવા માટે યુવાનોમાં આજના દિવસનો ક્રેઝ છે ત્યારે ગુજરાત સરકારે પણ આજે મહિલા દિવસને લઈને આયોજનો કર્યા હતા. 

મહિલા દિવસ નિમિત્તે DyCM નીતિન પટેલે વિધાનસભા ગૃહમાં નિવેદન આપ્યું અને કહ્યું કે પત્નીઓનો સહયોગ ન હોય તો અમે કામ કેવી રીતે કરી શકીએ? મહિલાઓનો સહયોગ ન હોય તો અમે સેવા ન કરી શકીએ. 

ગુજરાતની જનતાની સેવામાં મહિલાઓનું યોગદાન છે: DyCM

નીતિન પટેલે વધુમાં કહ્યું કે ગુજરાતની જનતાની સેવામાં મહિલાઓનું યોગદાન છે અને આરોગ્ય વિભાગમાં, શિક્ષણ વિભાગમાં તથા સચિવાલયમાં કામ કરતી મહિલાઓનો સહયોગ મળે છે ત્યારે કામ થાય છે. જો આ મહિલાઓનો ન હોય તો સેવા ન કરી શકે. બહેનોને મદદરૂપ થવા અમારી સરકારે યોજનાઓ બનાવી છે. 

દારૂના વેચાણને છૂટ નહીં આપીએ: CM

CM રૂપાણીએ પણ ગૃહમાં કહ્યું હતું કે આજે મહિલાઓ રાત્રે સ્કૂટર લઇને નીકળી શકે છે. જો રાજ્યમાં દારૂની છુટ્ટી આપીશું તો રાજ્યમાં મહિલા સુરક્ષિત નહીં રહે. અમે દારૂના વેચાણને છૂટ નહીં આપીએ, ગુજરાતની સુરક્ષા માટે દારૂ ઝડપીયે છીએ. 

મુખ્યમંત્રીના હસ્તે મહિલાઓને ચેક વિતરણ

નોંધનીય છે કે આજે સવારે ગાંધીનગરના મહાત્મા મંદિરમાં આંતરરાષ્ટ્રીય મહિલા દિવસની ઉજવણી કરવામાં આવી હતી જેમાં મુખ્યમંત્રી વિજય રૂપાણીના હસ્તે મહિલાઓને ચેક વિતરણ કરવામાં આવ્યું હતું. વ્હાલી દિકરી યોજના અંતર્ગત લાભાર્થીઓને ચેક વિતરણ કરવામાં આવ્યું હતું. પોર્ટલથી આંગણવાડી બહેનોને વેતન ચુકવણીનો શુભારંભ પણ કરવામાં આવ્યો તથા મહિલા-બાળ વિકાસ વિભાગની ડિજિટલ બુકનું વિમોચન કરવામાં આવ્યું હતું. 

ગુજરાત વિધાનસભાની ચૂંટણી વહેલી નહીં થાય

બીજી તરફ સીએમ રૂપાણીએ રાજ્યમાં વિધાનસભા ચૂંટણીને લઈને મોટું નિવેદન આપ્યું છે. તેમણે સ્પષ્ટતા કરી છે કે સરકાર વહેલી ચૂંટણી ઈચ્છતી નથી. ગુજરાતમાં વિધાનસભા ચૂંટણી વહેલી નહીં થાય.