નવી જવાબદારી / વિમેન્સ IPL: સૌથી મોંઘી અમદાવાદ ફ્રેંચાઇઝીની મેન્ટોર બનીને મિતાલી એક નવી ઇનિંગ્સના શ્રી ગણેશ કરશે

• BCCI પહેલી વખત મહિલા IPLનુ આયોજન કરી રહી છે
• મિતાલી રાજ એક નવા રોલમાં નજરે આવી શકે
• 8 જૂન, 2022ના રોજ લાંબી ક્રિકેટ કારકિર્દીને અલવિદા કહ્યું હતુ

ભૂતપૂર્વ કેપ્ટન મિતાલી રાજ એક નવા રોલમાં નજરે પડી શકે

વિમેન્સ આઇપીએલની પ્રથમ સિઝનમાં ભારતીય મહિલા ટીમની ભૂતપૂર્વ કેપ્ટન મિતાલી રાજ એક નવા રોલમાં નજરે પડી શકે છે. ઘણા સમયથી એવી ચર્ચા થઈ રહી હતી કે મિતાલી વિમેન્સ આઇપીએલમાં રમતી જોવા મળશે, પરંતુ તાજેતરમાં આવેલા એક રિપોર્ટ અનુસાર મિતાલી આ નવી ટૂર્નામેન્ટમાં મેન્ટોર તરીકે જોડાવા જઈ રહી છે. ઉલ્લેખનીય છે કે સૌથી મોંઘી અમદાવાદ ફ્રેંચાઇઝીની મેન્ટોર બનીને મિતાલી એક નવી ઇનિંગ્સની શરૂઆત કરી શકે છે.

મિતાલી રાજને અમદાવાદ ફ્રેંચાઇઝીમાં મહત્વપૂર્ણ જવાબદારી મળશે

ઉલ્લેખનીય છે કે મિતાલી રાજે ૮ જૂન, ૨૦૨૨ના રોજ પોતાના લાંબા ક્રિકેટર કરિયરને અલવિદા કહી દીધું હતું. ચાહકોને આશા હતી કે તે વિમેન્સ આઇપીએલમાં મેદાનમાં ઊતરશે. એવું જણાવવામાં આવી રહ્યું છે કે મિતાલીની પણ ઇચ્છા હતી કે તે વિમેન્સ આઇપીએલમાં ખેલાડી તરીકે મેદાનમાં ઊતરશે, પરંતુ ટીમોએ કોઈ ખાસ રસ દેખાડ્યો નહતો, તેથી હવે તે અમદાવાદ ફ્રેંચાઇઝી સાથે મેન્ટોર તરીકે જોડાશે. સૂત્રોના જણાવ્યા અનુસાર મિતાલી મુંબઈની બહારની ટીમ તરફથી રમવા ઇચ્છતી હતી, પરંતુ ચીજો એવી રીતે ગોઠવાઈ નહીં હોવાથી તે હવે અમદાવાદ ફ્રેંચાઇઝીમાં તેને મહત્ત્વપૂર્ણ જવાબદારી મળશે.

અમદાવાદ સૌથી મોંઘી ફ્રેંચાઇઝી

બીસીસીઆઇને પાંચ ટીમની હરાજીથી ૪૬૬૯.૯૯ કરોડ રૂપિયા મળ્યા છે. અમદાવાદ સૌથી મોંઘી ફ્રેંચાઇઝી છે, જેને અદાણી ગ્રૂપે ખરીદી છે. અમદાવાદ ફ્રેંચાઇઝી લગભગ ૧૨૩૯ કરોડમાં વેચાઈ હતી. ત્યારબાદ મુંબઈ ફ્રેંચાઇઝીનો નંબર આવે છે, જે ૯૧૨.૯૯ કરોડમાં વેચાઈ હતી.