પ્રેરણા / યોગા ક્વિનની કહાની, સફળતા પછી અકસ્માત અને ફરીથી નવી સફરની શરૂઆત

• 'યોગ કર્મેશું કૌશલમ'  શાસ્ત્રોક્તિ ને સાર્થક કરતી ઘટના ગીર સોમનાથ જિલ્લામાં બની
• ખેડૂત દંપત્તિનું એકમાત્ર સંતાન છે ભારતી
• વડાપ્રધાન નરેન્દ્ર મોદીથી લઈને વિજય રૂપાણી સુધીના મહાનુભાવો કરી ચૂક્યા છે સન્માનિત

 
ગીર સોમનાથ જિલ્લાના સુત્રાપાડાના લાટી ગામની દીકરીએ આંતરરાષ્ટ્રીય યોગ સ્પર્ધામાં 3 ગોલ્ડ મેડલ મેળવી ગીર સોમનાથની સાથોસાથ ગુજરાત સહિત સમગ્ર દેશનું ગૌરવ વધાર્યું છે. ગીર સોમનાથના નાના એવાં લાટી ગામની દીકરી ભારતી ગત વર્ષ ઇન્ટરનેશનલ યોગ ઇવેન્ટમાં એકી સાથે 3-3 ગોલ્ડ મેડલ જીતીને મલેશિયામાં ભારતનો ડંકો વગાડી પરત પોતાને ગામ આવી ત્યારે લાટી ગામની આ દીકરીનું ગામજનો એ ભવ્ય સન્માન કર્યું હતું.

'યોગ કર્મેશું કૌશલમ'  શાસ્ત્રોક્તિ ને સાર્થક કરતી ઘટના ગીર સોમનાથ જિલ્લામાં બની

'યોગ કર્મેશું કૌશલમ'  શાસ્ત્રોક્તિ ને સાર્થક કરતી ઘટના ગીર સોમનાથ જિલ્લામાં બની છે. જૂનાગઢની એન.બી.કાંબલિયા સ્કૂલમાં ધોરણ 12 અને બાદમાં એજ સંકુલમાં આવેલી કોલેજમાં ગ્રેજ્યુએશન કરનાર ભારતી સોલંકી હાલ અમદાવાદ યોગ યુનિવર્સિટીમાં એમ.એ.નો અભ્યાસ પૂર્ણ કરી પી.એચ.ડી.કરે છે. 

ખેડૂત દંપત્તિનું એકમાત્ર સંતાન છે ભારતી

તાલુકાથી માંડીને જિલ્લા,રાજ્ય,રાષ્ટ્રીય અને આંતર રાષ્ટ્રીય કક્ષાએ ભારતીએ અનેક ઇનામો જીત્યા છે. આમની પાસે એકલા આંતરરાષ્ટ્રીય કક્ષાના જ 14 ગોલ્ડ, 11 સિલ્વર અને 5 બ્રોન્ઝ મેડલ છે. પોતાની દીકરી વિશ્વ સ્તરે નામના મેળવી રહી છે તે જાણી ને તેના માતા પિતા હર્ષાશ્રુથી ભાવ વિભોર બની ગયા હતા. પોતાને સંતાનમાં એકમાત્ર આ દીકરી ભારતી જ છે. પેટે પાટા બાંધીને આ દીકરીને ભણાવી છે. માત્ર 8 વીઘા જમીન ધરાવનાર છેવાડાના ગામના આ ખેડૂત દંપતીનું નામ આ દીકરીએ વિશ્વભરમાં રોશન કર્યું છે. 

માતા-પિતાને ખબર પડે કે દીકરીનો અકસ્માત થયો છે

આવા સમયે જ આ ખેડૂત દંપતીને અચાનક જ આંચકા રૂપ સમાચાર મળે છે."તમારી દીકરી ભારતીનું અમદાવાદ માં એક્સિડન્ટ થયું છે." માતા મલીબેન નાં તો હોશ જ ઉડી જાય છે. હાંફળા ફાફળા થઈ ભારતીનાં માતા પિતા અમદાવાદ દોડી જાય છે. ભારતી સિવિલ હોસ્પિટલના આઈ.સી.યુ.માં બેહોશ પડી છે. ભારતી જ્યારે જમીને સ્કૂટર પર પરત જતી હતી ત્યારે અજાણ્યો કાર ચાલક પાછળથી ટક્કર મારીને નાસી છૂટે છે. રસ્તા પરનાં લોકો ભારતીને દવાખાને પહોંચાડે છે. 

અકસ્માત બાદ ડાબુ અંગ ખોટુ પડી ગયુ

3 દિવસે તેના ઘરે ખબર પડે છે. યોગા કવીન ભારતી બેહોશ થઈને હોસ્પિટલ ના બિછાને પડી છે. સગા વ્હાલા કોઈને લાગતું નથી કે આ દીકરી બચી જશે? અને કદાચ બચે તો પણ ફરી યોગા કરી શકશે! કેમકે આખું ડાબું અંગ જ ખોટું પડી ગયું છે. આજે પાંચ મહિને આ દીકરી ફિનિક્સ પક્ષીની માફક મોતને માત આપી બેઠી થઈ છે. આગામી દિવસોમાં આ યોગા કવીન કેનેડામાં યોજાનારી આંતર રાષ્ટ્રીય યોગ સ્પર્ધામાં ભાગ લેવા પણ જશે.
 
ભયાનક અકસ્માતમાંથી ઉગરેલી ભારતીએ અશક્યને શક્ય કરી બતાવ્યુ

ભયાનક અકસ્માત માંથી ઉગરેલી આ યોગાકવીન ભારતીએ વર્ષ-2018માં મલેશિયાનાં કુઆલાલંપુર ખાતે યોજાયેલી ઇન્ટરનેશનલ યોગ ચેમ્પિયનશિપ-2018 માં ભાગ લીધો હતો. આ સ્પર્ધામાં દુબઇ, થાઈલેન્ડ, મલેશિયા સહિતનાં 16 દેશોનાં સ્પર્ધકો સામેલ થયા હતા. આઈવાય-6, આઈવાય-સી.સ્પર્ધામાં ભારતી એ 2 ગોલ્ડ તેમજ 'ચેમ્પિયન ઓફ ધ ચેમ્પિયન નું ટાઇટલ પણ પોતાના નામે કર્યું હતું.

વડાપ્રધાન નરેન્દ્ર મોદીથી લઈને વિજય રૂપાણી સુધીના મહાનુભાવો કરી ચૂક્યા છે સન્માનિત

વિશ્વભરમાં યોગ ક્ષેત્રે ભારતનો ડંકો વગાડનાર આ ભારતી સોલંકી શુ ફરી યોગ કરી શકશે તે સમાજનો યક્ષ પ્રશ્ન હતો.વર્તમાન વડાપ્રધાન નરેન્દ્ર મોદી, મુખ્યમંત્રી વિજય રૂપાણી સહિતનાં મહાનુભાવોના હસ્તે સન્માનિત થયેલી ભારતી યોગા કવીન નું બિરૂદ જાળવી શકશે? તેવા અનેક પ્રશ્નો તેના પરિવાર અને સમાજમાં ઉઠ્યા હતા. પરંતુ ઈશ્વરની કૃપા ગણો કે વડીલો અને સમાજનાં આશીર્વાદ યોગા કવીન ભારતી આજે સ્વસ્થ થઈ રહી છે.

માતા મલીબેનની છે ભારતીની સફળતા પાછળ મહેનત

અકસ્માત બાદ પણ તે સારા યોગ કરી રહી છે.જે આપ જોઈ શકો છો. 'અડગ મનનાં માનવીને હિમાલય પણ નડતો નથી.' તે ઉક્તિને આ યોગા કવીને સાર્થક કરી છે.આજે વિશ્વ મહિલા દિને ભારતી સોલંકી સમાજને સંદેશો આપતા કહે છે કે,"હું યોગનાં કારણે જ બચી છું.દીકરી ને ખરા અર્થમાં વ્હાલનો દરિયો બનાવો. દીકરીને ખૂબ ભણાવો અને જે ક્ષેત્રમાં તે આગળ વધે તે ક્ષેત્રમાં તેને પ્રોત્સાહન આપો. દીકરી એ માત્ર ઘરકામ અને રસોઈ પુરતીજ સીમિત ના રાખવી જોઈએ.