અમદાવાદના નવરંગપુરા વિસ્તારમાં PGમાં રહેતી યુવતીની અજાણ્યા શખ્સ દ્વારા છેડતી કરવામાં આવી હતી. ત્યારે આ ઘટનાને પગલે પોલીસે આરોપીને પકડવા માટે એડીચોટીનું જોર લગાવી દીધું હતું. જેને લઇને હાલ પોલીસે આ શખ્સને ઝડપી લીધો છે.
અમદાવાદમાં PGમાં રહેતી યુવતી સાથે છેડતી કરનાર શખ્સને પોલીસે ગણતરીના કલાકોમાં ધરપકડ કરી લીધી. CCTV ફૂટેજમાં જે શખ્સ દેખાઈ રહ્યો છે તેનું નામ ભાવિન શાહ છે અને એવો ખુલાસો થયો છે કે તે ઓનલાઈન ફૂડ ડિલીવરી બોય તરીકે ફરજ બજાવે છે. એવી વાત સામે આવી છે કે આરોપી મૂળ નરોડાનો રહેવાસી છે અને ઘટનાના બે દિવસ પહેલા તે ફૂડ ડિલીવરી કરવા પણ આવ્યો હતો. જો કે ત્યારબાદ આરોપી ભાવિન મેલા ઈરાદાથી ફરી 14 તારીખે મોડી રાતના યુવતીના રૂમમાં દાખલ થયો હતો.
નવરંગપુરામાં પેઇગ ગેસ્ટ તરીકે રહેતી યુવતીની છેડતીનો મામલે પોલીસે છેડતી કરનાર અજાણ્યા શખ્સ વિરુદ્ધ ગુનો દાખલ કરવામાં આવ્યો હતો. પીડિતાના નિવેદન બાદ પોલીસ ચોપડે ફરિયાદ નોંધવામાં આવી હતી. છેડતીની વિવિધ કલમ હેઠળ ગુનો દાખલ કરવામાં આવ્યો હતો.
મહત્વનું છે કે, મહિલા ક્રાઈમ ACP મીની જોસેફ અને મહિલા પોલીસની ટીમ PG હોસ્ટેલમાં પહોંચી હતી. જ્યાં પીડિતાને સાથે રાખીને સમગ્ર ઘટનાને લઈ નિવેદનો નોંધવામાં આવ્યા હતા. તો આ સમગ્ર ઘટનાને પગલે મહિલા આયોગની ટીમ પણ PG હોસ્ટેલ પહોંચી હતી. પીડિતાની સાથે મુલાકાત કરીને સમગ્ર પરિસ્થિતિની જાણકારી મેળવી હતી.
PG છેડતી મામલે ગૃહરાજ્યમંત્રીએ શું કહ્યું ?
PGમાં રહેતી યુવતી સાથે થયેલી છેડતીનો મામલો ગૃહરાજ્યમંત્રીએ પણ ખૂબ ગંભીરતાથી લીધી છે. ગૃહરાજ્યમંત્રી પ્રદીપસિંહે બિભત્સ કૃત્ય કરનાર સામે પગલા લેવાશે તેવી વાત કરી હતી. આ અંગે લોકલ પોલીસ કાર્યવાહી કરશે. તો અજાણ્યા શખ્સ સામે ગુનો પણ દાખલ કરી દેવાયો છે. તો પ્રદીપસિંહે PGમાં ભાડે રહેતી યુવતીઓની સલામતી અંગે પણ તપાસ કરવાનુ કહ્યું હતું.
ઉલ્લેખનીય છે કે, નવરંગપુરા વિસ્તારમાં સીજી રોડ પર આવેલા ફ્લેટમાં પીજીના મકાનમાં મોડી રાત્રે ધૂસીને યુવકે હોલમાં સુતેલી મહિલાની છેડતી કરી હતી. 14 જૂને વિકૃત યુવકે કરેલી શરમજનક અને ઘૃણાસ્પદ હરકતો સીસીટીવીમાં કેદ થઇ ગઇ હતી. આ ઘટનાના અહેવાલો પ્રકાશિત થયા બાદ મહિલાઓની સુરક્ષાને લઇને અનેક સવાલો ઉઠ્યા છે.