શ્રીનગરઃ જમ્મૂ-કાશ્મીરમાં ISIS માટે લોકોનું બ્રેઈન વૉશ કરતી મહિલાઓનું એક ગ્રુપ સક્રિય થયું છે. આ ખુલાસો ગૃહ મંત્રાલયના ગુપ્તચર વિભાગના રિપોર્ટમાં થયો છે.
પ્રાપ્ત વિગતો મુજબ જમ્મૂ-કાશ્મીરમાં અશાંતિ અને રાષ્ટ્રપતિ શાસન લાગુ થયાની વચ્ચે આ ચોંકાવનારી વિગતો બહાર આવી છે. ગુપ્તચર વિભાગે ઘાટી વિસ્તારમાં એક મહિલાના ગ્રૂપને શોધી કાઢયું છે કે જે આતંકી સંગઠન ISISની વિચારધારાનો પ્રચાર કરી રહ્યું છે.
ગુપ્તચર વિભાગે આ આ મુદ્દે ગૃહમંત્રાલયને સતર્ક પણ કર્યું છે. રિપોર્ટમાં એવો પણ ખુલાસો થયો છે કે દૌલત-ઉલ-ઈસ્લામ નામનું એક મહિલાનું ગ્રૂપ કશ્મીર ઘાટીમાં સક્રિય થયું છે. આ તમામ મહિલાઓ ઘાટીના અલગ અલગ વિસ્તારમાં ISISIની વિચારધારાનો પ્રચાર કરી રહી છે.
ગુપ્તચર એજન્સીઓને મળેલી વિગતો મુજબ ઘાટી વિસ્તારમાં આ પ્રકારનું આ પહેલું ગ્રુપ સક્રિય છે. એવું પણ જાણવા મળ્યું છે કે અનંતનાગમાં ઈસા ફાજલી નામના આતંકીના મોત બાદ આ ગ્રુપ સક્રિય થયું છે. ઈસા ફાજલીના મોત બાદ આ મહિલાનું ગ્રુપ તેના ઘરે ગઈ હતી અને ભડકાઉ ભાષણ આપ્યું હતું.
ઉલ્લેખનીય છે કે વારંવાર જમ્મૂ-કાશ્મીરમાં પાકિસ્તાન સાથે ISISના ઝંડા જોવા મળે છે. જો કે ભારત સરકાર ISISની હાજરીનો ઈન્કાર કરી રહી છે. પરંતુ કશ્મીરમાં વણસતી પરિસ્થિતિ વચ્ચે આ ગ્રુપની વિગતો બહાર આવી છે.