મહિલા દિનના દિવસે મહિલાઓની વાત તો થતી જ હોય છે, પરંતુ પૌરાણિક કાળથી મહિલાઓ પોતાના અનેક કાર્યોને કારણે પ્રચલિત બનતી હોય છે, પરંતુ હાલ કળિયુગમાં પણ એવી મહિલાઓ છે જેમણે પોતાના કાર્યો થકી સમગ્ર સમાજને અનેક ઉદાહરણો પુરા પાડ્યા છે ત્યારે આપણે આજે વાત કરી રહ્યા છે સુરતના સ્લમ વિસ્તારમાં હાલ સુધી 10 હજાર જેટલા ગરીબ બાળકોને અભ્યાસ કરાવતા બીના રાવની, જોઇએ આ અહેવાલમાં તેમની કામગીરી વિશે.
મૂળ ઉત્તર ગુજરાતના પાટણના વતની અને સુરત ખાતે સ્થાયી થયેલા બીના રાવ છેલ્લા 11 વર્ષથી સ્લમ વિસ્તારના ગરીબ બાળકોને નિઃશુલ્ક ભણાવી રહ્યા છે. તે પણ નિઃસ્વાર્થ ભાવે, બીના રાવ દ્વારા પ્રગટાવવામાં આવેલી એક ચિનગારીથી આજે આગ બની ગઇ છે. પહેલા 7 થી 8 બાળકોથી શરૂ કરેલી તેમની કામગીરી આજે 10 હજારથી વધુ બાળકોના આંકને વટાવી ચૂકી છે.
બીના રાવ દ્વારા કરવામાં આવતી કામગીરી એક સમાજ પુરતી સિમિત નથી. જે કોઇપણ ગરીબ વિદ્યાર્થી હોય અને ભણવાની ઇચ્છા હોય તે વિદ્યર્થીને તેના જ વિસ્તારમાં જઇને બીના રાવ દ્વારા ભણાવવામાં આવે છે. આ માટે બીના રાવને અનેક એવોર્ડ પણ મળી ચૂક્યા છે. આ ઉપરાંત સલમાન ખાનની સસ્થા બીઇંગ હ્યુમન દ્વારા તેમને મોડલ તરીકે નિમવામાં આવ્યા છે અને સમર કલેક્શન માટે તેમનું ફોટો શુટ પણ કરવામાં આવ્યં છે.
બીના રાવ દ્વારા કરવામાં આવતી કામગીરીની સુવાસ સમગ્ર સુરત જ નહીં પરંતુ દેશના અનેક ખૂણાઓમાં પહોંચી છે. તેમની કામગીરીથી પ્રેરણા મેળવી અનેક મહિલાઓ તેમજ યુવતીઓ પણ તેમની સાથે જોડાઇ છે. તેમની સાથે જોડાયેલી યુવતિ આજે એક ખાસ મુકામ સુધી પહોંચી ગઇ છે. ત્યારે તેમની પ્રેરણા તેમના સમાજના ઉત્થાન માટે આદર્શ માની રહી છે.
બીના રાવ દ્વારા કરવામાં આવતી કામગીરી થકીથી આજે નાના બાળકો જે ભણી નથી શકતા તેઓ તો શાળાએ જતા પણ થઇ ગયા છે. તેઓ આજે ભલે શાળાએ જતા હોય, પરંતુ બીના રાવ આજે પણ તેમને ભણાવવાનું ભૂલતા નથી. તેમના દ્વારા આજે પણ સુરતના અલગ અલગ વિસ્તારોમાં જઇને બાળકોને શીખવવામાં આવે છે તેમની ભણાવવાની પદ્ધતિ પણ એકદમ સરળ છે, જેથી બાળકોને જલ્દીથી યાદ રહી જાય છે. તેમની પાસે ભણેલા વિદ્યાર્થી તેમના ગુણગાન ગાતા થાકતાં નથી. ગતવર્ષે જ બીના રાવને મુંબઇ ખાતે અભિનેત્રી તબ્બુના હાથે એવોર્ડ આપવામાં આવ્યો છે. ત્યારે તેમના દ્વારા કરવામાં આવતી કામગીરીને કારણે અનેક બાળકો આજે સારૂ શિક્ષણ પ્રાપ્ત કરી રહ્યા છે ત્યારે આવા બીના રાવને વીટીવી ગુજરાતીના સલામ.