શહેરના પોલીસ વિભાગમાં ફરજ બજાવતા બે લોકરક્ષક જવાન વચ્ચેના પ્રેમ સંબંધને લઇને વિવાદ સર્જાયો છે. બંને વચ્ચે વર્ષો પહેલા પ્રેમ સંબંધ રચાયો હતો પણ મહિલા લોકરક્ષકે લગ્ન કરી લેતા પુરૂષ લોકરક્ષક જવાને તેના સાસરે જઇને તેની સાથે ઝઘડો કરી ધમકી આપી હતી. જેથી કંટાળીને મહિલા એલઆરડીએ આ અંગે કૃષ્ણનગર પોલીસ સ્ટેશન ફરિયાદ નોંધાવતા પોલીસે તપાસ હાથ ધરી છે.
અમદાવાદ પોલીસમાં પ્રેમ, સેક્સ ઓર ધોકા
મહિલા એલઆરડીએ લગ્ન કરી લેતા પ્રેમી પહોંચ્યો સાસરે
પોલીસબેડામાં ચર્ચા
કૃષ્ણનગરમાં રહેતી 32 વર્ષીય અનાર્મ વુમન લોકરક્ષક મણીનગર પોલીસસ્ટેશનમાં ફરજ બજાવે છે. ગત 31મી જાન્યુઆરીએ જ તેના લગ્ન થયા હતા. બાદમાં તે સાસરે રહેવા જતી રહી હતી. આ મહિલા લોકરક્ષક જ્યારે ટ્રેઇનીંગમાં હતી ત્યારે તેની સાથે અજય બરંડા નામનો લોકરક્ષક જવાન પણ હતો.
બંને વચ્ચે સારી મિત્રતા પ્રેમમાં પરિણમી
બંને વચ્ચે સારી મિત્રતા બંધાઇ હતી. અને બાદમાં તે મિત્રતા પ્રેમમાં પરિણમી હતી. હાલ અજય બરંડા ઇ ડિવિઝન ટ્રાફિક પોલીસસ્ટેશનમાં ફરજ બજાવે છે. અજય બરંડા આ મહિલા એલઆરડીને અવાર નવાર લગ્ન માટે દબાણ કરતો હતો. અને તેથી મહિલા એલઆરડીએ તેની સાથે વાચચીત બંધ કરી દીધી હતી.
મહિલા એલઆરડીને અવાર નવાર રસ્તામાં રોકી તેને લગ્ન નહિ કરે તો તેને મારી નાખશે તેવી ધમકી આપતો હતો.
કૃષ્ણનગર પોલીસસ્ટેશનમાં ફરિયાદ નોંધાઇ
જેથી મહિલા એલઆરડીએ વટવા જીઆઇડીસી પોલીસસ્ટેશનમાં અરજી પણ આપી હતી. ગત તા.2ના રોજ અજય બરંડા આ મહિલા એલઆરડીના સાસરે ગયો હતો. ત્યાં જોરજોરથી બુમો પાડતા બધા ભેગા થઇ ગયા હતા. તેણે લગ્ન કેમ કરી લીધા તેમ કહી ગાળો બોલ્યો હતો અને બાદમાં મહિલા એલઆરડીને માથામાં પથ્થર મારી દીધો હતો. જેથી કંટાળીને મહિલા એલઆરડીએ કૃષ્ણનગર પોલીસસ્ટેશનમાં ફરિયાદ નોંધાઈ.