દરોડા / અમદાવાદની મહિલા બુટલેગરે એવી જગ્યાને દારૂનો અડ્ડો બનાવ્યો કે પોલીસ પણ ચોંકી ગઈ

• સૈજપુરબોઘામાં મહિલા બુટલેગરે આંગણવાડીને બનાવ્યો દારૂનો અડ્ડો
• બુટલેગર પાસેથી ડાયરી પણ મળી આવી
• જેમાં હપતાની નોંધ હોવાની આશંકા

હાલ સુરતમાં દારૂના મહે‌ફિલકાંડ તેમજ કચ્છમાં ગરબામાં દારૂની રેલમછેલનો વી‌ડિયો વાઈરલ થયા બાદ રાજ્યના પોલીસવડાએ દારૂ-જુગારના ધંધા બંધ કરાવવા માટેની ડ્રાઇવ યોજી છે, જેમાં ગઇ કાલે મહિલા દિવસે જ ક્રાઇમ બ્રાંચની ટીમે એક મહિલાના દારૂના અડ્ડાનો પર્દાફાશ કરીને તેની ધરપકડ કરી છે. ક્રાઇમ બ્રાંચની ટીમે આંગણવાડી તેમજ બંધ મકાનમાં મહિલા બુટલેગરે છુપાવેલ દારૂનો જથ્થો ઝડપી પાડ્યો છે.
 

ક્રાઇમ બ્રાંચના પીએસઆઇ એન.એચ. ચૂડાસમા અને તેમની ટીમને બાતમી મળી હતી કે સૈજપુરબોધા વિસ્તારમાં ધૂપસિંગની ચાલીમાં રહેતી એક મહિલા અને તેના પુત્રો દારૂનો ધંધો કરે છે. બાતમીના આધારે ગઇ કાલે ક્રાઇમ બ્રાંચના પીએસઆઇ સહિતની ટીમે પુષ્પા ગજબેના ઘરે રેડ કરી હતી, જેમાં મકાનમાંથી ચાર બેરલ મળ્યાં હતાં, જેને ખોલીને જોતાં તેમાંથી ૪૮ દારૂની બોટલ મળી આવી હતી.

દારૂની બોટલો મળી આવતાં ક્રાઇમ બ્રાંચની ટીમે પુષ્પાની આકરી પૂછપરછ કરી હતી, જેમાં તેણે કબૂલાત કરી હતી કે તેણે અન્ય દારૂનો જથ્થો પણ આંગણવાડી તેમજ એક બંધ મકાનમાં છુપાવીને રાખ્યો છે. પુષ્પાના ઘરની નજીક એક આંગણવાડી આવેલી છે, જેના ટોઇલેટમાં તેમણે દારૂની બોટલો સંતાડીને રાખી હતી. પુષ્પાની માહિતીના આધારે ક્રાઇમ બ્રાંચે આંગણવાડીમાં જઇ તપાસ કરી તો તેના ટોઇલેટમાંથી છ બેરલ મળી આવ્યાં હતાં, જેને ખોલીને જોતાં તેમાં દારૂની બોટલો હતી.

આ સિવાય આંગણવાડી સામેના એક બંધ મકાનમાં પણ ક્રાઇમ બ્રાંચે સર્ચ કરતાં ૧૪ પ્લાસ્ટિકના બેરલ મળ્યાં હતાં, જેમાં પણ દારૂની બોટલો છુપાવેલી હતી. પોલીસે આંગણવાડી, બંધ મકાન તેમજ પુષ્પાના મકાનમાંથી કુલ ૬૭ર બોટલ દારૂનો જથ્થો મળી આવ્યો છે. પુષ્પાની વધુમાં પૂછપરછ કરતાં જણાવ્યું છે કે તેનો પુત્ર રતન ઉર્ફે બંટી અને ભાવેશ ઉર્ફે બાડિયો ગજબે બહારથી વિદેશી દારૂનો જથ્થો મંગાવતા હતા અને એક્ટિવામાં દારૂની હોમ ડિલિવરી કરતા હતા. ક્રાઇમ બ્રાંચને પુષ્પાના ઘરમાંથી એક ડાયરી મળી આવી છે, જ્યારે કેટલીક રોકડ રકમ અને મોબાઇલ ફોન પણ મળી આવેલાં છે. પુષ્પા તેના બે પુત્રો વિરુદ્ધમાં ક્રાઇમ બ્રાંચે ગુનો દાખલ કરી તપાસ શરૂ કરી છે. 

પોલીસસૂત્રોના જણાવ્યા અનુસાર ક્રાઇમ બ્રાંચને જે ડાયરી મળી છે, તેમાં પુષ્પા દર મહિને કેટલા પોલીસ કર્મચારીઓને કેટલો હપ્તો આપતી હતી તેનો તમામ ‌હિસાબ છે. ઉચ્ચ અધિકારીઓથી લઇ કોન્સ્ટેબલ સુધીના પોલીસ કર્મચારીઓને કેટલો હપ્તો મળે છે તેની તમામ વિગતો હોવાનું સ્થાનિકોમાં ચર્ચા છે. ઉલ્લેખનીય છે કે બુટલેગરો પોલીસના ડર વગર બિનધાસ્ત દારૂનો ધંધો કરે છે.

 

નિતનવી રીતનો ઉપયોગ કરીને પોલીસની આંખમાં ધૂળ નાખીને બુટલેગરો રાજસ્થાન તેમજ અલગ અલગ રાજ્યમાંથી દારૂ લાવે છે અને બંધ મકાન તેમજ આડોશપડોશનાં મકાનમાં છુપાવીને ધંધો કરી રહ્યા છે. આંગણવાડી કે જ્યાં રોજ બાળકો ભણવા માટે આવે છે તેને પણ બુટલેગરોએ દારૂ છુપાવવા માટેનું સ્થળ બનાવી દીધું છે. 

ઉલ્લેખનીય છે કે શહેરના પૂર્વ વિસ્તારમાં આવેલી કેટલીક આંગણવાડીઓ અસામા‌જિક તત્ત્વોનો અડ્ડો બની ગઇ છે. મોડી રાતે આંગણવાડીમાં દારૂ પીવા તેમજ જુગાર રમવા જેવી કેટલીક અસામા‌જિક પ્રવૃત્તિઓ પણ થાય છે. આ સિવાય આંગણવાડીની આસપાસ કચરાના ઢેર પણ અનેક જગ્યાએ જોવા મળે છે. ગઇ કાલે ક્રાઇમ બ્રાંચે આંગણવાડીમાંથી દારૂનો જથ્થો ઝડપી પાડ્યો છે, જેમાં દરરોજ બાળકો ભણવા માટે આવે છે.