અમદાવાદના સરખેજમાં મહિલા બુટલેગરોનો આતંક જોવા મળી રહ્યો છે. ત્યારે સરખેજમાં દારૂનો વેપાર કરતી મહિલા બુટલેગરો પર પોલીસે તવાઈ બોલાવી છે. સરખેજ પોલીસે દેશી અને વિદેશી દારૂનુ વેચાણ કરતી 9 મહિલા બુટલેગર સહિત 10 લોકોની ધરપકડ કરી છે. હિસ્ટ્રીશીટર મહિલા બુટલેગરના આતંકને લઈને પોલીસે સર્ચ ઓપરેશન કર્યુ હતું. મોટા પ્રમાણમા દારૂનો જથ્થો પણ નાશ કરવામા આવ્યો છે.
સરખેજમાં મહિલાઓ બિન્દાસ કરે છે દારૂનું વેચાણ
પોલીસના સર્ચ ઓપરેશનમાં મહિલા બુટલેગરનો પ્રર્દાફાશ
9 મહિલાઓ દારૂનો ધંધો કરતા રંગે હાથે ઝડપાઈ
અમદાવાદના સરખેજ વિસ્તારમા ગેરકાયદે દારૂની ભઠ્ઠીઓ ચલાવતી 9 મહિલા બુટલેગરો સહિત 10ની પોલીસે ધરપકડ કરી છે. સરખેજ વિસ્તારમાં આવેલા વણજર ગામના ભરવાડ વાસ, અને ચુનારા વાસમાં મહિલા બુટલેગરો દેશી દારૂની ભઠ્ઠીઓ ચલાવી દારૂનું વેચાણ કરતી હતી. 9 મહિલાઓને ઝડપી પોલીસે અલગ-અલગ 10 ગુના નોંધાયા છે. જેમાં પોલીસે 137 લીટર દેશીદારૂ અને 250 લીટર કરતાં વધુ દારૂ બનાવવાનો વોશ કર્યો છે. સાથે સાથે દારૂ ગાળવા માટે વપરાતા સરસામાન પણ કબજે કરી અને તમામ દારૂની ભઠ્ઠીઓ તોડી પાડવામાં આવી છે.
સરખેજ પોલીસે પકડેલી હિસ્ટ્રીશીટર મહિલા બુટલેગર
બુટલેગર મહિલાઓમાં ભીખીબેન છારા, અનિતાબેન ચુનારા, સુનિતા ચુનારા, લહેરાબેન જાડેજા, જયાબેન કાવઠીયા, પન્ના ચુનારા, ગંગાબેન રાઠોડ અને મધુબેન ચુનારાની ધરપકડ કરવામાં આવી છે.
હિસ્ટ્રીશીટર મહિલા બુટલેગરોની પાસા કરવાની કાર્યવાહી
આ મહિલા બુટલેગર ઘણા વર્ષોથી દારૂનો વેચાણ કરે છે. જે અગાઉ પણ અનેક વખત પકડાઈ ચૂકી છે. તેમ છતા પોલીસ અને કાયદાના ડર વગર બિન્દાસ દારૂનુ વેચાણ કરે છે. આ મહિલાઓના ત્રાસની મળતી ફરિયાદના પગલે પોલીસે સર્ચ ઓપરેશન કરીને તમામને ઝડપી લીધા હતા. સરખેજ પોલીસે મહિલા બુટલેગરની ધરપકડ કરીને લાખોના દારૂનો નાશ કર્યો છે. હાલમાં પોલીસે હિસ્ટ્રીશીટર મહિલા બુટલેગરોની પાસા કરવાની કાર્યવાહી પણ હાથ ધરી છે.