મહિલાને 33 અઠવાડિયાના ગર્ભપાતની મંજૂરી આપતા બોમ્બે હાઈકોર્ટે કહ્યું છે કે ગર્ભપાત કરાવવો કે નહીં તે નક્કી કરવાનો અધિકાર ફક્ત મહિલાને છે.
બોમ્બે હાઈકોર્ટે મહિલાને આપી 33 અઠવાડિયાના ગર્ભપાતની મંજૂરી
હાઈકોર્ટે ચોખ્ખું સંભળાવ્યું
ગર્ભપાત કરાવવો કે નહીં તે ફક્ત મહિલાનો અધિકાર
મેડિકલ બોર્ડ નક્કી ન કરી શકે
બોમ્બે હાઈકોર્ટે એક મહિલાની પ્રેગનન્સીને લઈને ખૂબ જ મહત્વપૂર્ણ ટિપ્પણી કરી છે. હાઈકોર્ટે કહ્યું છે કે, ગર્ભાવસ્થા ચાલુ રાખવાનો કે ન ચાલુ રાખવાનો અધિકાર સંપૂર્ણપણે મહિલાનો છે. કોર્ટે કહ્યું કે આ અધિકાર માત્ર મહિલાનો છે અને આ મામલે મહિલા સિવાય બીજું કોઈ નિર્ણય ન લઈ શકે.
મહિલાને 33 અઠવાડિયાના ગર્ભના ગર્ભપાતની આપી મંજૂરી
33 અઠવાડિયાની ગર્ભવતી મહિલા દ્વારા દાખલ કરવામાં આવેલી અરજી પર ચુકાદો આપતા બોમ્બે હાઈકોર્ટે આવી ટીપ્પણી કરી હતી. આ કેસમાં મહિલાના ગર્ભમાં મેડિકલ ખોડ હોવાનું નિદાન થયા બાદ ગર્ભપાતની મંજૂરી માંગવામાં આવી હતી. કોર્ટે કહ્યું કે મહિલાઓના અધિકારો સાથે કોઈ પણ પ્રકારે બાંધછોડ ન કરવી જોઈએ. "અમારું માનવું છે કે અદાલતોએ માત્ર તથ્યો પર જ ધ્યાન આપવું જોઈએ નહીં, પરંતુ હાલના કેસો સાથે સંબંધિત પ્રશ્નો પર પણ વિચાર કરવો જોઈએ.
પેટમાં રહેલા ગર્ભનો નિર્ણય લેવાનો અધિકાર માત્ર મહિલાનો
જસ્ટિસ જી એસ પટેલ અને જસ્ટિસ એસ જી ડિગેની ખંડપીઠે મેડિકલ બોર્ડના એ મંતવ્યને સ્વીકારવાનો ઈનકાર કર્યો હતો કે, ગર્ભમાં ગંભીર વિસંગતતાઓ હોય તો પણ ગર્ભપાત ન કરાવવો જોઇએ. કોર્ટે પોતાના આદેશમાં કહ્યું કે ગર્ભમાં ગંભીર ખોડખાંપણને જોતા ગર્ભાવસ્થાની અવધિમાં કોઈ ફરક પડતો નથી. અરજદારે સમજી વિચારીને નિર્ણય લીધો છે. આ સરળ નિર્ણય નથી, પરંતુ તે માત્ર અરજદારનો નિર્ણય છે. માત્ર સ્ત્રીને જ તેના પેટમાં રહેલા ગર્ભ વિશે કોઈ નિર્ણય લેવાનો અધિકાર છે. તે મેડિકલ બોર્ડની સત્તામાં નથી આવતું. સોનોગ્રાફી બાદ જાણવા મળ્યું કે મહિલાના ગર્ભમાં ઉછરતા ગર્ભમાં ગંભીર ખોડ છે આ પછી મહિલા ગર્ભપાત માટે હાઇકોર્ટ પહોંચી હતી.