ચોંકાવનારી ઘટના / પતિને કહ્યું ગુજરાત જઉં છું, બુરખો પહેરીને પ્રેમી સંગ ભાગી ગઈ વિદેશ: સીમા હૈદર બાદ હવે દિપીકાની ચર્ચા

• સીમા હૈદર અને અંજુ બાદ હવે રાજસ્થાનની દીપિકાનું નામ ચર્ચા 
• દીપિકા તેના બાળકોને છોડીને તેના પ્રેમી સાથે વિદેશ ભાગી ગઈ
• બીમારીની સારવાર કરાવવા ગુજરાત જવા નીકળી અને પછી થઈ ગુમ 

Rajasthan News : સીમા હૈદર અને અંજુ બાદ હવે રાજસ્થાનના ડુંગરપુર જિલ્લાની દીપિકાનું નામ ચર્ચામાં આવ્યું છે. વયત જાણે એમ છે કે, દીપિકા તેના બાળકોને છોડીને તેના પ્રેમી સાથે વિદેશ ભાગી ગઈ છે. હાલમાં દીપિકાના પતિએ પોલીસમાં ફરિયાદ નોંધાવી છે. તપાસ ચાલી રહી છે પરંતુ હજુ સુધી દીપિકાનો કોઈ પત્તો મળ્યો નથી. જોકે આ વિસ્તારના લોકો તેને લવ જેહાદની ઘટના ગણાવી રહ્યા છે. 

રાજસ્થાનના ડુંગરપુરની ચોંકાવનારી ઘટના 
રાજસ્થાનના ડુંગરપુર જિલ્લાના ભમાઈ ગામથી એક ચોંકાવનારી ઘટના સામે આવી છે. જ્યાં 10 જુલાઈના રોજ એક મહિલા ઘરેથી કહ્યા વગર અન્ય સમાજના યુવક સાથે વિદેશ ગઈ હતી. મહિલાને બે બાળકો છે. એક દીકરી 11 વર્ષની છે જ્યારે દીકરો 7 વર્ષનો છે. પત્ની ઘરમાંથી અચાનક ગાયબ થઈ જતાં પતિએ ચિત્રી પોલીસ સ્ટેશનમાં કેસ નોંધાવ્યો હતો. પરંતુ હજુ સુધી તેનો પત્તો લાગ્યો નથી. જેના કારણે રોષે ભરાયેલા લોકોએ ગતરોજ SP કચેરીનો ઘેરાવ કર્યો હતો.

ગુજરાત જવાનું કહી ઘરેથી નીકળી મહિલા અને...... 
પ્રાથમિક વિગતો મુજબ મહિલા બે બાળકો સાથે ગામમાં રહેતી હતી જ્યારે તેનો પતિ મુંબઈમાં કામ કરતો હતો. પતિની ગેરહાજરીમાં મહિલા અવારનવાર ગુજરાત અને ઉદયપુર સારવાર માટે જતી હતી. 10મી જુલાઈના રોજ પણ તે પોતાને બીમાર હોવાનું જણાવી સારવાર માટે ગુજરાત ગઈ હતી પરંતુ 13મી જુલાઈ સુધી પરત આવી ન હતી.

પતિને વોટ્સએપ પર ફોન કર્યો અને કહ્યું...... 
આ દરમિયાન તેણીએ તેના પતિને વોટ્સએપ પર ફોન કરીને કહ્યું હતું કે, તમે મારાથી નાખુશ હતા, તેથી હું તારાથી દૂર આવી છું.... આ સાંભળીને પતિ ચોંકી ગયો હતો. જ્યારે તે અફરતફરીમાં મુંબઈથી ઘરે આવ્યો ત્યારે તેને તેની પત્ની ગાયબ હોવાનું જણાયું. ઘરમાં તપાસ કરતાં લાખોની કિંમતના દાગીના અને રોકડ પણ ગાયબ હતી. જે બાદ પતિએ પોલીસ સ્ટેશનમાં ગુમ થયાની ફરિયાદ નોંધાવી હતી. જોકે તેની તપાસ હજુ ચાલુ છે.

પોલીસ અધિકારીઓએ શું કહ્યું ? 
આ કેસમાં ચિત્રી પોલીસ સ્ટેશનના અધિકારી ગોવિંદ સિંહે જણાવ્યું કે, મુકેશ પાટીદારે રિપોર્ટમાં જણાવ્યું છે કે, તેની પત્ની દીપિકા 7 જુલાઈ 2023ના રોજ ઘરેથી સારવારના નામે ગુજરાત ગઈ અને ત્યાંથી પત્ની ગુમ થઈ ગઈ હતી. આ મામલે અમે તપાસ કરી રહ્યા છીએ. 

તો શું મહિલા કુવૈત જતી રહી..... 
આ દરમિયાન મહિલાની કેટલીક તસવીરો સામે આવી છે જેમાં તે એક યુવક સાથે બુરખો પહેરેલી જોવા મળી રહી છે. જ્યારે બીજી તસવીરમાં તે સાડીમાં જોવા મળી રહી છે. આ ઘટના અંગે લોકો જુદી જુદી વાતો કરી રહ્યા છે. મહિલા કુવૈત જતી હોવાની વાત પણ સામે આવી રહી છે.