શહેરના એક પોલીસ સ્ટેશનમાં ફરજ બજાવતી મહિલા એલઆરડીને તેના જ પતિએ મેસેજ કરીને કહ્યું કે, 'ધમાલમાં સિંઘમ બનવા ન જતી, મિયાંભાઈ તારી હાલત ખરાબ કરી નાખશે, તેં અમદાવાદની ધમાલ હજુ જોઇ નથી' અને કઈ બાજુથી પડશે તેની તને ખબર નથી તેવી ધમકી આપી હોવાની ઘટના પ્રકાશમાં આવી છે.
ધમાલમાં તારૂ આવી બનશે
મહિલા પોલીસ કર્મીને મળી ધમકી
નવરંગપુરા પોલીસમાં નોંધાઈ ફરિયાદ
શહેરના રખિયાલ વિસ્તારમાં રહેતી ૩૦ વર્ષીય મહિલા એલઆરડીએ પશ્ચિમ વિસ્તારના એક પોલીસ સ્ટેશનમાં ફરિયાદ કરી છે. ફરિયાદમાં કરાયેલા આક્ષેપ મુજબ વર્ષ ર૦૦૬માં મહિલા એલઆરડીનાં લગ્ન થયાં હતાં અને હાલ તેને ૧૩ વર્ષનો પુત્ર છે. પતિ સાથે નાની-મોટી વાતોમાં ઝઘડા થતાં મહિલા એલઆરડી ર૦૧પથી તેના પિયરમાં રહેવા આવી ગઈ હતી. વર્ષ ર૦૧૦માં તેણે ખંભાતમાં રહેતા પતિ સામે શારીરિક-માનસિક ત્રાસ આપવાની પણ ફરિયાદ કરી હતી. પતિ વિરુદ્ધમાં ડોમેસ્ટિક વાયોલન્સનો ક્રોર્ટમાં કેસ કર્યો હતો, જે કેસ હાલમાં પેન્ડિંગ છે.
અમદાવાદની ધમાલ હજુ જોઇ નથી
તા.ર૧મીએ નાગરિકતા બિલના વિરોધને લઇ મહિલા એલઆરડી આશ્રમરોડ પર બંદોબસ્તમાં હાજર હતી. આ દરમિયાન તેના મોબાઈલમાં પતિએ દસ જેટલા ટેક્સ્ટ મેસેજ કર્યા હતા, જેમાં પતિએ લખ્યું હતું કે 'ધમાલમાં સિંઘમ બનવા ન જતી, મિયાંભાઈ તારી હાલત ખરાબ કરી નાખશે, તેં અમદાવાદની ધમાલ હજુ જોઇ નથી, કઇ બાજુથી ક્યાંથી પડશે તેની તને ખબર પણ નહીં પડે'.
મને માનસિક ત્રાસ આપીશ તો તારા દીકરાને તકલીફ પડશે
તે પછી બીજા મેસેજમાં પણ તેણે ધમકીભર્યું લખાણ લખ્યું હતું કે, 'મને માનસિક ત્રાસ આપીશ તો તારા દીકરાને તકલીફ પડશે, તને લડવાનો ખૂબ શોખ છે તો તું જેના પર કૂદતી હોય તેની સાથે મેદાનમાં આવી જા, ખબર પડી જશે. મારા ખાનદાનનું કોઇ કંઇ ઉખાડી નહીં શકે.'
પોલીસમાં ફરિયાદ નોંધાવતાં પોલીસે તપાસ શરૂ કરી
આવા ધમકીભર્યા મેસેજ આવતાં જ મહિલા એલઆરડીએ ખૂબ ગભરાઈ જતાં પરિવાર તેમજ ઉચ્ચ અધિકારીઓને જાણ કરી હતી. ત્યારબાદ મહિલા એલઆરડીએ તેના પતિ સામે નવરંગપુરા પોલીસમાં ફરિયાદ નોંધાવતાં પોલીસે તપાસ શરૂ કરી છે.