અમદાવાદ / એકતરફી પ્રેમમાં પાગલ યુવકની ધમકીઃ તમારી દીકરીના લગ્ન મારી સાથે નહીં કરાવો તો ફોટા વાઈરલ કરી દઈશ

નારોલ વિસ્તારમાં રહેતી યુવતીએ દિનેશ સરગડા વિરુદ્ધમાં ફરિયાદ કરી છે. ફરિયાદમાં જણાવ્યા મુજબ ૧૮ વર્ષીય યુવતી વસ્ત્રાપુર ખાતે ફેશન ડિઝાઈનરનો અભ્યાસ કરે છે. યુવતી તેની માતા અને ભાઈ સાથે સંયુક્ત પરિવારમાં રહે છે. 

બુધવારે યુવતી અને તેની માતા ઘરે હાજર હતાં તે દરમિયાન ગોળલીમડા પાસે રહેતો દિનેશ સરગડા બપોરના ત્રણ વાગ્યાની આસપાસ તેમના ઘરે આવ્યો હતો અને યુવતીની માતાને કહેવા લાગ્યો હતો કે તમારી છોકરી સાથે મારે લગ્ન કરવાં છે. 

દિનેશે આમ કહેતાં યુવતીની માતાએ કહ્યું કે આપણી જ્ઞાતિ અલગ છે, તારા લગ્ન મારી દીકરી સાથે નહીં થાય. આ સાંભળી દિનેશ એકદમ ઉશ્કેરાઈ ગયો હતો અને જોતજોતામાં દિનેશ યુવતીને પાછળથી પકડી તેને અડપલાં કરતો હતો ત્યારે યુવતીની માતા વચ્ચે પડતાં તેમને પણ દિનેશે બીભત્સ ગાળો બોલી છૂટા હાથથી મારામારી કરી હતી.

ધમકી આપ્યા બાદ તે નાસી ગયો હતો. તે પછી યુવતી અને તેની માતાએ નારોલ પોલીસ સ્ટેશનમાં દિનેશ સરગડા વિરુદ્ધ ફરિયાદ નોંધાવી હતી અને પોલીસે હાલ ગુનો દાખલ કરી વધુ તપાસ હાથ ધરી છે.