શિક્ષણ / ફાયર NOC વગર જ ૨,૦૦૦ શાળાઓ શરૂ થશેઃ બાળકોની સલામતી જોખમમાં

શૈક્ષણિક સંસ્થાનોને ભલે સાત દિવસની નોટિસથી ફાયર એનઓસી લેવા જણાવાયું હોય પરંતુ આટલા ટૂંકા ગાળામાં તપાસ વગર એનઓસી આપવી શક્ય નથી અને શાળાઓ સોમવારથી ચાલુ થવાની છે. આ સંજોગોમાં બાળકોની સલામતીના ભોગે પણ કેટલીક શાળાઓ ધમધમતી થઈ જશે. 

શિક્ષણ વિભાગની નોટિસના કારણે સ્કૂલ સંચાલકો દ્વારા એનઓસી માટે અરજી કરવામાં આવી છે પરંતુ ફાયર વિભાગમાંથી ચેકિંગ કરવા કે પ્રમાણપત્ર આપવા માટે કેટલીક શાળાઓ નહીં  આવવાને કારણે સરકારી સહિત જિલ્લાની બે હજાર જેટલી સ્કૂલ એનઓસી વગર જ સોમવારથી ધમધમતી થઇ જશે. વિવિધ ટીમ દ્વારા શાળા-હોસ્ટેલમાં ફાયર સેફ્ટી અંગે ખાસ તપાસ કરવામાં આવી હતી. ડીઇઓ શહેર અને પ્રાથમિકની સંયુક્ત ટીમ દ્વારા તપાસ કરવામાં આવી હતી.  

આ ટીમે કુલ  દોઢ હજાર  જેટલી સ્કૂલોમાં ચેકિંગ કર્યું હતું. જેમાંથી ૧૧૦ જેટલી શાળા પાસે જ એનઓસી હોવાનું સામે આવ્યું હોવાનું આધારભૂત સૂત્રો દ્વારા જાણવા મળે છે. મોટાભાગની સ્કૂલમાં અગ્નિશામક સાધનો ઉપલબ્ધ છે પરંતુ શાળા પાસે ફાયર વિભાગનું ના વાંધા પ્રમાણપત્ર નથી. શિક્ષણાધિકારીની લેખિત નોટિસને પગલે સ્કૂલ સંચાલકો દોડતા થયા છે અને તાત્કાલિક આ એનઓસી લેવા માટે અરજી પણ કરી દીધી છે, પરંતુ સ્કૂલોની સંખ્યા વધુ હોવા ઉપરાંત સ્થાનિક કામગીરી અને ટયૂશન-ક્લાસીસની પણ અરજીઓ હોવાને કારણે આટલી મોટી સંખ્યામાં સ્કૂલોમાં ચેકિંગ કરવું મુશ્કેલ છે. સામે ફાયર વિભાગ પાસે સ્ટાફની પણ ઘટ છે.

આ અંગે ડીઇઓ આર.સી. પટેલે જણાવ્યું કે ફાયર વિભાગ આ સમગ્ર બાબત માટે જોશે અને પગલાં લેશે. પ્રેક્ટિકલી આ નિયમનું પાલન કરવું ખૂબ જ મુશ્કેલ છે તેવી સ્થિતિમાં અમદાવાદની સરકારી શાળાઓની સાથે ખાનગી સ્કૂલોમાં  ફાયર એનઓસી વગર વિદ્યાર્થીઓનાં જીવના જોખમે આગામી સોમવારથી નવા સત્રનો પ્રારંભ કરાશે.