સેવાઓ ખોરવાઈ / અમેરિકામાં વિન્ટર સ્ટોર્મ: સેન્ટ્રલ અલાબામા-જ્યોર્જિયામાં બરફના તોફાનનો કહેર, 1019 ફ્લાઇટ રદ્દ

• અમેરિકામાં બરફનાં વિનાશક તોફાનનો કહેર
• એક હજારથી પણ વધુ ફ્લાઈટ રદ
• સેન્ટ્રલ અલાબામા-જ્યોર્જિયામાં વિન્ટર સ્ટોર્મને કારણે ભારે તબાહી

અમેરિકામાં આવેલા બરફનાં ભીષણ અને વિનાશક તોફાન (વિન્ટર સ્ટોર્મ)ના કારણે મોટાભાગની વિમાની સેવાઓ ખોરવાઈ ગઈ છે. ખાસ કરીને સાઉથ વેસ્ટ એરલાઈન્સ કંપનીએ પોતાનાં શેડ્યૂલની લગભગ ૧૨ ટકા ફ્લાઈટ રદ કરી દીધી છે. જ્યારે અન્ય એરલાઈન્સ કંપનીએ પણ પોતાની ફ્લાઈટ રદ કરી દીધી છે.

ફ્લાઈટ ટ્રેકિંગ સર્વિસ ફ્લાઈટ અવેરના જણાવ્યા અનુસાર, અમેરિકામાં કુલ ૧,૦૧૯ ફ્લાઈટ રદ કરવામાં આવી છે, જેમાંથી અડધા ભાગની ફ્લાઈટ સાઉથ વેસ્ટ એરલાઈન્સની છે. આ ઉપરાંત અમેરિકન એરલાઈન્સ ગ્રૂપ ઈન્કે ૬ ટકા એટલે કે ૨૦૦ ફ્લાઈટ રદ કરી છે. આજના દિવસ માટે પણ અમેરિકામાં ડોમેસ્ટિક કે ઈન્ટરનેશનલ ૭૯૭ ફ્લાઈટ રદ થઈ શકે છે.
અમેરિકન એરલાઈન્સે શિયાળામાં કેટલીક રાહત-છૂટ જાહેર કરી
અત્રે ઉલ્લેખનીય છે કે આ મહિનાના આરંભે રજા દરમિયાન ૧૬,૭૦૦ ફ્લાઈટ રદ કરવા માટે સાઉથ વેસ્ટ એરલાઈન્સ કંપનીને અમેરિકન સરકારનો વિરોધનો પણ સામનો કરવો પડ્યો હતો. સાઉથ વેસ્ટ એરલાઈન્સ અને અન્ય મુખ્ય અમેરિકન એરલાઈન્સે શિયાળામાં કેટલીક રાહત-છૂટ જાહેર કરી છે. જો ગ્રાહક અગાઉ બુક કરેલી ટિકિટ પર પોતાના પ્રવાસ કાર્યક્રમને બદલવા માગતા હોય તો તેમને ભાડાંમાં કોઈ પણ જાતનો ફેરફાર કર્યા વગર મંજૂરી મળશે.
ભીષણ બરફનાં તોફાનના કારણે ભારે નુકસાન થયું 
ઉલ્લેખનીય છે કે અમેરિકાના કેટલાય ભાગોમાં ભીષણ બરફનાં તોફાનના કારણે ભારે નુકસાન થયું છે. સેન્ટ્રલ અલાબામા અને જ્યોર્જિયામાં તોફાનના કારેણે કેટલાય લોકોએ જીવ ગુમાવ્યા છે. ઉત્તર-પૂર્વ અલાબામાના ઓટુગા કાઉન્ટીમાં કેટલાંય મકાનને મોટું નુકસાન પહોંચ્યું છે. અમેરિકામાં આ મહિને ફેડરલ એવિએશન સિસ્ટમમાં ટેક્નિકલ ખામીને કારણે સેંકડો ફ્લાઈટ રદ કરવામાં આવી હતી.