ચર્ચા / 'જીતવું એ ભાજપની પરંપરા', વડોદરામાં CR પાટીલનું નિવેદન, એમ્બ્યુલન્સ કાર્યક્રમની પત્રિકાને લઇને સર્જાયો વિવાદ

• વડોદરા ભાજપનો જૂથવાદ આવ્યો સામે
• એમ્બ્યુલન્સ ફાળવણીના કાર્યક્રમની પત્રિકામાં જોવા મળ્યો જૂથવાદ
• આમંત્રણ પત્રિકામાંથી જિલ્લા પ્રમુખનું નામ ગાયબ

વડોદરા ભાજપમાં  પ્રવર્તતી આંતરિક ટાંટિયાખેચ ખૂલીને બહાર આવી છે. એમ્બ્યુલન્સ ફાળવણીના કાર્યક્રમની પત્રિકામાં જૂથવાદ જોવા મળતા ચર્ચાનો વિષય બન્યો છે. આમંત્રણ પત્રિકામાંથી જિલ્લા પ્રમુખ અશ્વિન પટેલના નામની બાદબાકી જોવા મળી હતી. જિલ્લા વિસ્તારમાં કાર્યક્રમ હોવાથી જિલ્લા પ્રમુખ અશ્વિન પટેલનું નામ રાખવું જરૂરી બને છે. પરંતુ કોઈ પણ કરણસર જિલ્લા પ્રમુખ અશ્વિન પટેલનું નામ આમંત્રણ પત્રિકામાંથી ગાયબ હોવાથી રાજકીય વર્તુળોમાં અનેક તર્ક વિતર્ક સર્જાયા હતા. પ્રદેશ ભાજપ પ્રમુખ સી.આર.પાટીલ સહીતનાઑની હાજરીમાં યોજાયેલ કાર્યક્રમની પત્રિકામાં પ્રભારી, સાંસદ, ધારાસભ્યોના નામનો ઉલ્લેખ કરવામાં આવ્યો છે. જેને લઇને જુથવાદની ચર્ચાએ જોર પકડયું છે.

2 દાયકાથી એકપણ ચૂંટણી હાર્યા નથી :  સી. આર. પાટીલે
વડોદરા APMC ખાતે સાંસદની ગ્રાન્ટમાંથી એમ્બ્યુલન્સ લોકાર્પણ કાર્યક્રમ યોજાયો હતો. આ વેળાએ ભાજપ પ્રદેશ પ્રમુખ સી. આર. પાટીલે નિવેદન આપ્યું હતું.  તેમણે સભામાં સંબોધન દરમિયાન કહ્યું હતું કે ગુજરાત ભાજપના કાર્યકરો દેશના ભાજપના કાર્યકરોના મોડલ છે. અને જીત પ્રાપ્ત કરવી એ ભાજપની પરંપરા છે. આપણે 2 દાયકાથી એકપણ ચૂંટણી હાર્યા નથી અને ભાજપને પાર્ટી વિથ ડિફરન્ટ કહેવામાં આવે છે. સી.આર.પાટીલે કહ્યું કે એક કલાકમાં જ કાર્યાલય માટે 8 કરોડનું ફંડ જમા થયું છે.
 
કાર્યકરોને ચૂંટણી સુધી જાગતા રહેવાની ટકોર 
વધુમાં ભાજપના કાર્યકરોને સી.આર. પાટિલે ચૂંટણી સુધી જાગતા રહેવાની ટકોર કરી હતી. કાર્યકરોને શીખામણ આપતા પાટીલે જણાવ્યું હતું કે, લોકોની કોઇ પણ સમસ્યા હોય તો તેને પારખી વિસ્તારના ધારાસભ્યો, સાંસદ, ચૂંટાયેલા પ્રતિનિધિઑને ધ્યાને મુકજો. વધુમાં ભાજપનો કાર્યકર્તા આખા દેશમાં અને આગળ અને  તેમાં પણ ગુજરાતનો કાર્યકર્તા સૌથી આગળ હોવાનું સી.આર. પાટીલે અંતમાં ઉમેર્યું હતું.