રાજ્યમાં છેલ્લા બે દિવસથી વાતાવરણમાં ફેરફાર જોવા મળી રહ્યો છે. વહેલી સવારો ઘોર ધુમ્મસછાયું વાતાવારણ જોવા મળે છે. સવારે ઠંડી તો લાગે જ પરંતુ બપોર પડતા જ ગરમીનો અહેસાસ થાય છે. વાતવરણના આ ફેરફારો જોતા એમ થાય કે હવે ઠંડી જશે. પરંતુ ના એવુ નહી થાય. ઠંડીનું જોર હજી વધશે. જી હા, હવામાન વિભાગે રાજ્યમાં ફરીથી ઠંડી વધશે તેવી આગાહી કરી છે.
હજી ઠંડીનું જોર વધશે
મહત્વનુ છે કે ગુજરાતમાં ઠંડીએ 5 વર્ષનો રેકોર્ડ તોડ્યો છે. હવામાન વિભાગના અનુમાન મુજબ પાંચ વર્ષ પહેલા આવી કાતિલ ઠંડી જાન્યુઆરીમાં પડી હતી. સામાન્ય રીતે જાન્યુઆરીના અંત સુધીમાં ઠંડીનુ પ્રમાણ ઘટતુ હોય છે પરંતુ હવામાન વિભાગના જણાવ્યાનુસાર હજી પણ ઠંડી વધશે તેનું કારણ છે વેસ્ટર્ન ડિસ્ટર્બન્સ. વેસ્ટર્ન ડિસ્ટર્બન્સની અસરને કારણે રાજ્યમાં હજી પણ ઠંડીનું જોર વધશે. બે દિવસ બાદ લઘુત્તમ તાપમાનમાં 3થી 4 ડિગ્રીનો ઘટાડો નોંધાશે.
માછીમારોને દરિયો ન ખેડવા સૂચના
વેસ્ટર્ન ડિસ્ટર્બન્સની અસરને પગલે આગામી બે દિવસ માછીમારોને દરિયો ન ખેડવાની સૂચના આપવામાં આવી છે. રાજ્યમાં 6 ફેબ્રુઆરીએ વેસ્ટર્ન ડિસ્ટર્બન્સની અસર વર્તાશે. પરિણામે માછીમારોને દરિયો ન ખેડવાની ચેતવણી આપવામાં આવી છે. દરિયા કાંઠે તેજ પવન ફૂંકાવાની શક્યતા છે. જે પગલે માછીમારોને એલર્ટ કરવામાં આવ્યા છે.