મોટાભાગના લોકો હિલ સ્ટેશન જોવા માટે ગુજરાતની બહાર દોટ મૂકે છે. પરંતુ ગુજરાત પાસે પણ હિમાચલ જેવા હિલ સ્ટેશનો ઘણા છે. તેમાનો એક એટલે વલસાડની વિલ્સન હિલ. ચોમાસામાં ગુજરાતના ઘણા એવા સ્થળો છે જ્યાં કુદરતી સૌંદર્ય સોળે કળાએ ખીલી ઉઠે છે. એવા હિલ સ્ટેશનો કે જેની અનુભૂતિ કરવા માટે એકવાર અચૂક મુલાકાત લેવી. ત્યારે આજે વાત કરીએ વિલ્સન હિલમાં હાલ કેવો માહોલ છે.
વિલ્સન હિલના ડ્રોન દ્રશ્યો
ચોમાસુ બરાબરનું જામ્યુ છે ત્યારે વલસાડની વિલ્સન હિલનો એરિયલ વ્યૂ સામે આવ્યો છે. જાણે કે વિલ્સન હિલે લીલીચાદર ઓઢી લીધી હોય તેવા સુંદર દ્રશ્યો જોવા મળી રહ્યા છે. વરસાદી માહોલમાં અહીં કુદરત ચારેકોર ખીલી ઉઠી છે. વિલ્સન હિલ પર આવીને જાણે કુદરતના ખોળે આવ્યા હોય તેવો અનુભવ તો ચોક્કસથી થાય. દરિયાઇ સપાટીથી 2500 ફૂટની ઉંચાઇએ આવેલુ છે. અહીં હરિયાળી ઉપરાંત શિવમંદિર તથા નાના મોટા ધોધ પણ પ્રવાસીઓની મુલાકાતમાં ચાર ચાંદ લગાવી દે છે.
સર્પાકાર રસ્તાઓથી પ્રવાસીઓ થયા રોમાંચિત
વલસાડના ધરમપુર ખાતે નવા ગિરિમથક તરીકે હાલ વિલ્સન હીલ વિકસી રહ્યું છે. અહીં સનરાઇઝ અને સનસેટ નિહાળવા માટે લોકોમાં ખાસ આકર્ષણ જોવા મળે છે. વિલ્સન હિલ પાસેના શંકર ધોધ ખાતે પણ પ્રવાસીઓનો ધસારો જોવા મળી રહ્યો છે. અહીં પણ નાની મોટી ટેકરીઓ અને સર્પાકાર જેવા રસ્તાઓ પરથી પસાર થઇને પ્રવાસીઓ રોમાંચિત થઇ ઉઠે છે. ડ્રોન દ્રશ્યોમાં જોઇ શકાય છે કે ચોમેર માત્રને માત્ર હરિયાળી જ જોવા મળી રહી છે . આવા સુંદર સ્થળે આવ્યા પછી પ્રવાસીઓ સેલ્ફી લીધા વિના રહે ખરા ! પ્રવાસીઓ કુદરતી સૌંદર્યને કેમેરામાં કંડારતા જોવા મળી રહ્યા છે.
વિલ્સન હિલ ખાતે મોન્સૂન ફેસ્ટિવલ યોજાશે
ડાંગની જેમ વિલ્સન હિલ ખાતે પણ ગુજરાત ટુરીઝમ દ્વારા 13થી 16 ઓગસ્ટ દરમિયાન મોન્સૂન ફેસ્ટિવલનું આયોજન કરવામાં આવ્યું છે. જેમાં પાપા ડાન્સ,તરપા ડાન્સ,લોક ડાયરો,તુર ડાન્સ, ઘેરીયા નૃત્ય, ફોક ડાન્સ સહિતના વિવિધ કાર્યક્રમોનું આયોજન કરવામાં આવનાર છે.