તાલિબાન દ્વારા વારંવાર હુમલાને પગલે દેશમાં ઝડપથી બગડતી સુરક્ષા સ્થિતિ વચ્ચે અફઘાનિસ્તાનમાં વિકાસની ચર્ચા કરવા માટે નાટો દેશોના રાજદૂતો શુક્રવારે બેઠક કરી રહ્યા છે.
તાલિબાનના આતંકને ડામવા મેદાને પડ્યા આ 30 દેશો,
આવતા સપ્તાહે લેવાશે મોટો નિર્ણય
અફઘાનિસ્તાનની 12થી વધુ રાજધાની પર તાલિબાનોએ કર્યો છે કબજો
નાટોના એક અધિકારીએ નામ ન આપવાની શરતે જણાવ્યું હતું કે, નાટોના મહાસચિવ જે. સ્ટોલટેનબર્ગ અને 30 રાજદૂતો બ્રસેલ્સમાં બેઠકમાં ભાગ લઈ રહ્યા છે. અધિકારીએ વધુમાં જણાવ્યું હતું કે, "નાટો સુરક્ષા સ્થિતિની ખૂબ જ બારીકાઈથી નજર રાખી રહ્યા છે. અમે અફઘાન સત્તાવાળાઓ અને બાકીના આંતરરાષ્ટ્રીય સમુદાય સાથે સંકલન ચાલુ રાખીએ છીએ.
નાટોએ 2003 માં અફઘાનિસ્તાનમાં આંતરરાષ્ટ્રીય સુરક્ષાનો સંભાળ્યો હવાલો
નાટોએ 2003 માં અફઘાનિસ્તાનમાં આંતરરાષ્ટ્રીય સુરક્ષા કામગીરીનો હવાલો સંભાળ્યો, જે યુરોપ અને ઉત્તર અમેરિકાની બહાર તેની પ્રથમ મોટી કામગીરી છે. આ અભિયાનનો હેતુ સરકારને સ્થિર કરવાનો, સ્થાનિક સુરક્ષા દળો બનાવવાનો હતો. અમેરિકાની આગેવાની હેઠળના લશ્કરી ગઠબંધને 2014 માં અફઘાન સુરક્ષા દળોને તાલીમ આપવા પર ધ્યાન કેન્દ્રિત કરવા માટે લડાઇ કામગીરી બંધ કરી દીધી હતી.
12થી વધુ રાજધાની પર તાલિબાનોએ કર્યો છે કબજો
અગાઉ પણ નાટોએ અફઘાનિસ્તાન પર તાલિબાનના હુમલા અંગે ચિંતા વ્યક્ત કરી હતી. નાટોએ પણ તાલિબાનને હુમલો રોકવા કહ્યું હતું, પરંતુ તાલિબાનોએ તેમના હુમલા ચાલુ રાખ્યા છે. તાલિબાને અત્યાર સુધીમાં અફઘાનિસ્તાનની 12 થી વધુ પ્રાંતીય રાજધાનીઓ પર કબજો કરી લીધો છે અને એવું માનવામાં આવે છે કે જો પરિસ્થિતિ આવી જ રહેશે તો કાબુલ પણ ટૂંક સમયમાં તેના નિયંત્રણમાં આવી જશે.