રાજનીતિ / હિમાચલ પ્રદેશમાં ત્રણ દાયકાથી કોઈ પાર્ટી નથી તોડી શકી આ ટ્રેન્ડ, ભાજપ માટે સૌથી મોટી ચેલેન્જ

• હિમાચલ પ્રદેશ વિધાનસભાની ચૂંટણીની તારીખો જાહેર
• 2017ની ચૂટણીમાં ભાજપે આ રાજ્ય પર વિજય મેળવ્યો
• BJP પાર્ટીના રાષ્ટ્રીય અધ્યક્ષ જેપી નડ્ડાનું ગૃહ રાજ્ય

ભારતીય ચૂંટણી પંચ હિમાચલ પ્રદેશ વિધાનસભાની ચૂંટણીની તારીખોની જાહેરાત કરી છે. હિમાચલ પ્રદેશમાં છેલ્લે 9 નવેમ્બર, 2017ના રોજ એક જ તબક્કામાં મતદાન થયું હતું અને ભાજપએ ભવ્ય વિજય મેળવ્યો હતો અને કોંગ્રેસ સરકારને સત્તામાંથી ઉખાડી ફેંકી હતી. ભાજપે 68માંથી 44 બેઠકો જીતી હતી, જ્યારે કોંગ્રેસ માત્ર 21 બેઠકો જ જીતી શકી હતી. આ ચૂંટણીમાં ભાજપને નિરાશા ત્યારે મળી જ્યારે તેના સીએમ પદના ઉમેદવાર પ્રેમ કુમાર ધૂમલ પોતાની સીટ બચાવી શક્યા નહીં.

ત્રણ દાયકાથી ઇતિહાસ તૂટ્યો નથી
વાત કરીએ તો અહીંની રાજકીય સ્થિતિ થોડી અલગ છે. કોંગ્રેસ માટે સૌથી મોટા પડકારો દેખાઈ રહ્યા છે. પાર્ટીના ઘણા દિગ્ગજ નેતાઓએ પાર્ટીને અલવિદા કહી દીધું છે, જ્યારે વીરભદ્ર સિંહ જેવા મજબૂત નેતા હવે આ દુનિયામાં નથી રહ્યા. હિમાચલ પ્રદેશનો એક ઇતિહાસ છે કે અહીં ત્રણ દાયકા સુધી કોઈ પણ પક્ષ પોતાની સત્તા જાળવી શક્યો નથી, એટલે કે દર પાંચ વર્ષે પરિવર્તન આવે છે. ભાજપે આ મિથને તોડવા માટે પોતાની રણનીતિ ધારદાર બનાવવાનું શરૂ કરી દીધું છે અને આ કડીમાં પીએમ મોદી રાજ્યનો પ્રવાસ કરી રહ્યા છે. ભાજપ સતત બુથ લેવલની રણનીતિ પર કામ કરી રહી છે અને સરકારની ઉપલબ્ધિઓ કાર્યકર્તાઓ દ્વારા દરેક ઘર સુધી પહોંચાડવામાં આવી રહી છે.

ભાજપ અધ્યક્ષનું ગૃહ રાજ્ય
હિમાચલ પ્રદેશ એ ભારતીય જનતા પાર્ટીના રાષ્ટ્રીય અધ્યક્ષ જેપી નડ્ડાનું ગૃહ રાજ્ય છે, તેથી તેમના માટે ભાજપના કિલ્લાને બચાવવા અને ઇતિહાસ રચવાની તક છે. નડ્ડા સતત રાજ્યનો પ્રવાસ કરી રહ્યા છે. આ મહિનામાં તેમણે અહીં અત્યાર સુધીમાં એક સપ્તાહથી વધુ સમય આપ્યો છે અને સતત કાર્યકર્તાઓ સાથે વાતચીત કરી રહ્યા છે. નડ્ડાએ છેલ્લા ત્રણ મહિના દરમિયાન અહીં ડઝનેક કાર્યક્રમો કર્યા છે અને તે લોકોની વચ્ચે જઈ રહ્યા છે.

આમ આદમી પાર્ટી બનશે ત્રીજી તાકાત?
આ વખતે માત્ર ભાજપ અને કોંગ્રેસ જ નહીં પરંતુ આમ આદમી પાર્ટી પણ પૂરી તાકાત સાથે ચૂંટણી મેદાનમાં ઉતરી રહી છે. મુખ્યમંત્રી કેજરીવાલ, ભગવંત માન સહિત પાર્ટીના તમામ સ્ટાર નેતાઓએ રાજ્યનો પ્રવાસ કરીને ચૂંટણી કાર્યક્રમો શરૂ કરી દીધા છે. સાથે જ જ્યાં ભાજપ પણ ચૂંટણી પ્રચારમાં સૌથી આગળ જોવા મળી રહી છે ત્યાં જ બીજી તરફ કોંગ્રેસ પોતાનો પ્રચાર પણ શરૂ કરી શકી નથી. આવી સ્થિતિમાં આગામી સમયમાં કોંગ્રેસ માટે પોતાના આંતરિક વિખવાદ ઉપરાંત ભાજપ પર વિજય મેળવવો પણ ઓછો મુશ્કેલ નહીં રહે. કોંગ્રેસ નેતા પ્રિયંકા ગાંધી વાડ્રા આજે સોલન જિલ્લામાં રેલી સાથે હિમાચલ પ્રદેશમાં પાર્ટીના ચૂંટણી પ્રચારની શરૂઆત કરશે.

2017માં પાર્ટીની સ્થિતિ હતી
2017માં ભાજપને 44 બેઠકો મળી હતી, જ્યારે કોંગ્રેસ માત્ર 21 બેઠકો જ જીતી શકી હતી. સીપીએમે એક અને અન્ય બે બેઠક જીતી હતી. 2017માં ભાજપને સૌથી વધુ 48.8 ટકા વોટ મળ્યા હતા જ્યારે કોંગ્રેસને 41.7 ટકા વોટ મળ્યા હતા. અન્યને માત્ર 6.3 ટકા અને નોટાને 0.9 ટકા મત મળ્યા હતા. ઓગસ્ટ સુધીમાં હિમાચલ પ્રદેશમાં કુલ 53.8 લાખ નોંધાયેલા મતદારો છે, જેમાંથી 27.23 લાખ પુરુષ અને 26.44 લાખ મહિલા મતદારો છે. જો કે, પંચ જ્યારે પ્રેસ કોન્ફરન્સ કરીને ચૂંટણીની તારીખો જાહેર કરશે, ત્યારે વાસ્તવિક આંકડો જાણી શકાશે.