ચૂંટણી પરિણામ / ઝારખંડમાં હેમંત સોરેનનું મુખ્યમંત્રી બનવાનું સપનું થશે સાકાર?

• ઝારખંડ મુક્તિ મોર્ચાના અધ્યક્ષ છે હેમંત સોરેન
• અગાઉ દોઢ વર્ષ સુધી ઝારખંડના સીએમ રહી ચૂક્યા છે
• ઝારખંડ મુક્તિ મોર્ચાના સંસ્થાપક શિબૂ સોરેનના પુત્ર છે

ઝારખંડમાં વિધાનસભા ચૂંટણીના પરિણામને લઇને પ્રાથમિક વલણ આવવાના શરૂ થઇ ગયા છે. આદિવાસી બાહુલ્ય રાજ્યમાં સત્તાનો તાજ કોના માથે બંધાશે તે નક્કી થઇ જશે. ઝારખંડ મુક્તિ મોર્ચાના સંસ્થાપક શિબૂ સોરેનના પુત્ર હેમંત સોરેન આ વખતે બે સીટથી ચૂંટણી મેદાનમાં ઉતર્યા છે. દુમકા સીટથી તેમની સામે ભાજપના ધારાસભ્ય લુઇસ મરાંડી છે જ્યારે બરહેટમાં ભાજપના સિમોન મોલતો છે.

જો JMMના નેતૃત્વવાળા ગઠબંધનને બહુમત મળે તો હેમંત સોરેન પ્રથમ વખત 5 વર્ષ માટે સીએમ બની શકે છે. આ પહેલા તેઓ 13 જુલાઇ 2013થી 28 ડિસેમ્બર 2014 સુધી સીએમ રહી ચૂક્યા છે. હેમંત સોરેન 2014માં પણ બે સીટ પર લડ્યા હતા જો કે એકમાં તેમના હારનો સામનો કરવો પડ્યો હતો.

2014 ની ચૂંટણીમાં હેમંત સોરેન દુમકા તેમજ બરહેટથી ચૂંટણી મેદાનમાં ઉતર્યાં હતા. જો કે દુમકા બેઠક પરથી હાર થઇ હતી જ્યારે બરહેટ બેઠક પર જીત મેળવી વિધાનસભા પહોંચ્યા હતા અને વિપક્ષના નેતા બન્યા હતા. સોરેન પર નિશાન સાધતા આ વખતે ચૂંટણીમાં દુમકા અને બરહેટ બંને જગ્યા પર પીએમ નરેન્દ્ર મોદીની જનસભાનું આયોજન કરવામાં આવ્યું હતું. સોરેનનો દાવો છે કે આ વખતે રાજ્યમાં તેમના ગઠબંધનની સરકાર બનશે.