મહામારી / વેક્સિન ખરીદવા પંજાબ સરકારે સીધો મોડર્નાનો સંપર્ક સાધ્યો, કંપનીએ આ કારણથી કરી દીધો ઈન્કાર

• મોડર્નાએ પંજાબ સરકારને સીધી વેક્સિન વેચવાની ના પાડી દીધી
• વેક્સિન ખરીદવા પંજાબ સરકારે મોડર્નાનો સંપર્ક સાધ્યો હતો 
• ફક્ત ભારત સરકાર સાથે સોદેબાજી, રાજ્ય સરકાર સાથે નહીં-મોડર્ના 

પંજાબના નોડલ અધિકારી વિકાસ ગર્ગેએ જણાવ્યું કે મોડર્નાએ તેની નીતિનું બહાનું ધરીને રાજ્ય સરકારને વેક્સિન મોકલવાનો ઈન્કાર કરી દીધો છે.

મોડર્નાએ એક સ્ટેટમેન્ટ જારી કરીને જણાવ્યું કે કંપની ફક્ત કેન્દ્ર સરકારની સાથે સોદેબાજી કરે છે કોઈ રાજ્ય સરકાર, ખાનગી પાર્ટી સાથે કરાર કરતી નથી. 

3 દિવસથી વેક્સિન ઉપલબ્ધ ન હોવાથી રાજ્ય સરકારે વેક્સિનેશન કામ અટકાવવું પડ્યું

પંજાબના મુખ્યમંત્રી કેપ્ટન અમરિન્દર સિંહના આદેશ અનુસાર રાજ્ય સરકારે સ્પુતનિક વી, ફાઈઝર, મોડર્ના અને જોનસન એન્ડ જોનસનની વેક્સિન માટે કંપનીઓનો સંપર્ક સાધ્યો હતો. રાજ્ય સરકારે એવું પણ જણાવ્યું હતું કે છેલ્લા 3 દિવસથી વેક્સિન ઉપલબ્ધ ન હોવાથી રાજ્ય સરકારે વેક્સિનેશન કામ અટકાવવું પડ્યું છે. નિવેદનમાં આગળ કહેવાયું કે રાજ્યમાં વેક્સિનની તીવ્ર અછતને પહોંચી વળવાના તમામ પ્રયાસો કરાઈ રહ્યાં છે. ભારત સરકારે પંજાબને અત્યાર સુધી 44 લાખ કરતા પણ ઓછા વેક્સિનના ડોઝ આપ્યાં છે. 

પંજાબ સરકારે વેક્સિન ખરીદવા માટે સીધો કંપનીનો સંપર્ક સાધ્યો 

રાજ્યમાં પૂરતી સંખ્યામાં વેક્સિનના ડોઝ ન હોવાને કારણે સરકારે વેક્સિનેશનનું કામ રોકવું પડ્યું છે. સરકારે વેક્સિન ખરીદવા માટે સીધો કંપનીનો સંપર્ક સાધ્યો હતો. પરંતુ કંપનીએ વેક્સિન આપવાની ના પાડી દીધી છે. પંજાબને વેક્સિન ન આપવા પાછળનું કારણ આપતા કંપનીએ જણાવ્યું કે અમે ફક્ત ભારત સરકાર સાથે વેક્સિન કરાર કરવા બંધાયેલા છીએ. કોઈ રાજ્ય સરકારને અમે સીધી રીતે વેક્સિન આપતા નથી.