પતિના તેની પૂર્વ પ્રેમિકા સાથેના લગ્ન દરમિયાન મહિલા લગ્નમાં હાજર પણ રહી હતી. ત્રણેય લગ્ન બાદ એક જ ઘરમાં સાથે રહેવાનું નક્કી કર્યું છે.
પત્નીએ પતિના પ્રેમીકા સાથે કરાવ્યા લગ્ન
લગ્નમાં પોતે પણ આપી હાજરી
લગ્ન બાદ ત્રણેય એક જ ઘરમાં રહેશે
આંધ્રપ્રદેશના તિરુપતિમાંથી એક ચોંકાવનારો કિસ્સો સામે આવ્યો છે. અહીં એક મહિલાએ તેના પતિના લગ્ન તેની પૂર્વ પ્રેમીકા સાથે કરાવી દીધા છે અને તેઓએ નક્કી કર્યું છે કે હવે તે ત્રણેય એક જ ઘરમાં સાથે રહેશે. મહિલાએ પોતે જ તેના પતિના લગ્ન પૂર્વ પ્રેમિકા સાથે કરાવવા માટે તમામ વ્યવસ્થા કરી છે. આ સમાચાર સોશિયલ મીડિયા પર લોકોમાં ચર્ચાનો વિષય બની રહ્યા છે. આ અનોખી લવ સ્ટોરી વિશે જાણીને લોકો આશ્ચર્યચકિત થઈ ગયા છે.
પતિએ પૂર્વ પ્રેમિકા સાથે કર્યા લગ્ન
એક રિપોર્ટ અનુસાર પતિએ તેની પૂર્વ પ્રેમિકા સાથે લગ્ન કર્યાનો મામલો તિરુપતિના દક્કાલીના આંબેડકર નગરનો છે. અહીં વિમલા નામની મહિલાએ તેના પતિ કલ્યાણના લગ્ન તેની પૂર્વ પ્રેમિકા નિત્યા શ્રી સાથે કરાવી દીધા છે. તમને જણાવી દઈએ કે કલ્યાણ એક ફેમસ યુટ્યુબર છે. વિમલા અને કલ્યાણ થોડા વર્ષો પહેલા મળ્યા હતા. આ મુલાકાત મિત્રતામાં અને પછી મિત્રતા પ્રેમમાં ફેરવાઈ પછી કલ્યાણ અને વિમલાએ એકબીજા સાથે લગ્ન કરી લીધા.
પતિના જીવનમાં આવી રીતે પાછી આવી પૂર્વ પ્રેમિકા
તમને જણાવી દઈએ કે લગ્નના થોડા વર્ષો પછી વિમલા તેના પતિ કલ્યાણના વર્તનમાં થોડો ફેરફાર અનુભવ કરવા લાગે છે. હકીકતમાં વિશાખાપટ્ટનમની રહેવાસી નિત્યા શ્રી નામની મહિલાએ કલ્યાણના જીવનમાં ફરી એન્ટ્રી લીધી હતી.
થોડા વર્ષો પહેલા કલ્યાણ અને નિત્યા શ્રી વચ્ચે બ્રેક અપ થયું હતું. આ પછી જ કલ્યાણે વિમલા સાથે લગ્ન કર્યા. પરંતુ જ્યારે નિત્યાશ્રીને કલ્યાણના લગ્નની ખબર પડી ત્યારે તે તેના ઘરે પહોંચી ગઈ હતી.
લગ્ન પછી એક છત નીચે રહેવાનું કર્યું નક્કી
રિપોર્ટ અનુસાર નિત્યાશ્રીએ વિમલા પાસે હાથ જોડીને તેના પતિ કલ્યાણ સાથે લગ્ન કરવાની પરવાનગી માંગી કારણ કે તે પોતાનો પ્રેમ કલ્યાણને ગુમાવવા માંગતી ન હતી. નિત્યાશ્રીએ વિમલા સામે આ પ્રસ્તાવ પણ મૂક્યો કે લગ્ન પછી ત્રણેય એક જ છત નીચે સાથે રહેશે. જો કે થોડો સમય લીધા પછી વિમલાએ નિત્યાશ્રીના પ્રસ્તાવને સ્વીકારી લીધો અને તેના પતિના લગ્ન તેની પૂર્વ પ્રેમિકા સાથે કરાવ્યા.