જરુરી / પત્નીને પતિની આવક જાણવાનો અધિકાર, CICએ RTI અરજી માન્ય રાખતા આપ્યો મહિલાના પક્ષમાં ચુકાદો

• યુપીના બરેલીની ઘટના
• પતિ આવકની જાણકારી આપતો  નહોતો
• પત્નીએ આરટીઆઈ કરીને આવકની જાણકારી મેળવી લીધી
• કેન્દ્રીય માહિતી પંચે કહ્યું- પત્નીને પતિને આવક જાણવાનો અધિકાર 

કેન્દ્રીય માહિતી પંચે એક મહિલાના કિસ્સામાં એવો ચુકાદો આપ્યો છે કે પત્નીને પણ પતિની આવક જાણવાનો અધિકાર છે. બરેલીની સંજૂ ગુપ્તા નામની એક મહિલાએ પતિની આવક જાણવા માટે આરટીઆઈ હેઠળ અરજી દાખલ કરી હતી. મહિલાની અરજી માન્ય રાખતા મુખ્ય માહિતી પંચે આ પ્રકારનો ચુકાદો આપ્યો હતો. 

કમાણી કેટલી કહેવું બધાને ગમતું નથી પરંતુ પત્નીને આપવી પડશે માહિતી 
તમે કેટલી કમાણી કરો છો? આપણામાંથી ઘણાને આવા સવાલોના જવાબ બધાને ગમતા નથી. સામાન્ય રીતે લોકો પોતાના પરિવારને આ વસ્તુઓની જાણકારી આપતા હોય છે. જો કે વૈવાહિક સંબંધોમાં જ્યારે વિવાદ ચાલતો હોય છે ત્યારે તેનું એક અલગ જ મહત્વ હોય છે. જ્યારે છૂટાછેડા બંનેની સંમતિથી ન હોય ત્યારે પત્ની તેના પતિની આવક જાણવા માંગે છે અને ભરણપોષણની માંગ કરે છે.આવી સ્થિતિમાં, જો પતિ તેની આવક જાહેર કરવાની ના પાડે છે, તો પછી પત્ની પાસે તે જાણવાના અન્ય રસ્તાઓ છે. હાલમાં જ આવો જ એક કિસ્સો સામે આવ્યો છે, જેમાં મહિલાએ પોતાના પતિની આવક વિશે માહિતી અધિકાર (આરટીઆઇ) દ્વારા માંગી છે. કેન્દ્રીય માહિતી આયોગ (સીઆઈસી)એ આવકવેરા વિભાગને આદેશ આપ્યો છે કે તે 15 દિવસની અંદર મહિલાને પતિની આવક વિશેની માહિતી પૂરી પાડે.

સંજૂ ગુપ્તા નામની મહિલાએ કાનૂની રીતે જાણી લીધી પતિની આવક 
સંજૂ ગુપ્તા નામની મહિલાએ પતિની આવક જાણવા માટે RTI કરી હતી. શરૂઆતમાં બરેલીના આવકવેરા વિભાગના કેન્દ્રીય જાહેર માહિતી અધિકારી (સીપીઆઇઓ)એ આરટીઆઇ હેઠળ આ માહિતી આપવાનો ઇનકાર કર્યો હતો, કારણ કે પતિએ તેની સંમતિ આપી નહોતી. ત્યારબાદ મહિલાએ ફર્સ્ટ એપેલેટ ઓથોરિટી (એફએએ)માં અપીલ દાખલ કરીને મદદ માંગી હતી. એફએએ (FAA) એ સીપીઆઇઓ (CPIO) ના આદેશને માન્ય રાખ્યો હતો, જેના પગલે ગુપ્તાએ સીઆઇસી (CIC) સમક્ષ બીજી અપીલ દાખલ કરી હતી.

મહિલાને તેની પતિની આવક જાણવાનો અધિકાર 
કેન્દ્રીય સૂચના આયોગે આ મામલે 19 સપ્ટેમ્બરે આદેશ જાહેર કર્યો હતો. આ માટે સીઆઈસીએ સુપ્રીમ કોર્ટ અને હાઈકોર્ટના નિર્ણયોને ટાંક્યા હતા. સીઆઈસીએ પોતાના આદેશમાં કહ્યું કે મહિલાને પોતાના પતિની આવક જાણવાનો અધિકાર છે. તેથી, સીઆઇપીઓએ 15 દિવસની અંદર તેના પતિની આવકની જાણ કરવી જોઈએ.