વડોદરામાં વિધવા મહિલાઓની સહાયને લઈને ગંભીર સવાલો ઉઠ્યા છે. અહીયા મહિલાઓ સહાય માટે સરકારી ઓફિસ તો આવે છે. પરંતું તેમને નાના મોટા વાંધા કાઢીને પરત મોકલી દેવામાં આવે છે.
વડોદરામાં વિધવા મહિલાઓ સહાય માટે ખાઈ રહી છે ધક્કા
નાના મોટા વાંધા કાઢીને કામ સમયસર પૂર્ણ નથી થતા
5 હજાર વિધવા મહિલાઓની સહાયના કામ માટે માત્ર એક ક્લાર્ક
વડોદરાની સરકારી ઓફિસમાં કર્મચારીઓના નિરસ વલણના કારણે લોકોને મુશ્કેલી પડતી હોવાના આક્ષેપ લાગી રહ્યા છે. વડોદરાના પૂર્વ ઝોનની ઓફિસમાં વિધવા સહાય માટે આવતી મહિલાઓને ફોર્મ તેમજ પુરાવામાં નાના મોટા વાંધા કાઢીને કામ સમયસર પૂર્ણ નથી કરવામાં આવતું.
પૂર્વ ઝોનમાં 5 હજાર કરતા વધુ વિધવા મહિલા
જેના કારણે વિધવા સહાય માટે આવતી મહિલાઓને ભારે હાલાંકી પડી રહી છે. વીટીવીની ટીમ સાથે વાત કરતા મહિલાઓએ જણાવ્યું કે છેલ્લા સરકારી ઓફિસમાં કામની ધીમી પ્રક્રિયાના કારણે તેમને એક વર્ષથી વિધવા સહાય નથી મળી શકી. વડોદરાના પૂર્વ ઝોનમાં 5 હજાર કરતા પણ વધુ વિધવા મહિલાઓ છે.
મામલતદારે આપ્યું મોટું નિવેદન
જે 5 હજાર મહિલાઓ છે તેમાની સામે માત્ર એકજ ક્લાર્કને સંપૂર્ણ જવાબદારી આપવામાં આવી છે. જેના કારણે મહિલાઓના કામ પૂરા નથી થઈ શકતા. આ મામલે વડોદરાના પૂર્વ ઝોનમાં મામલતદારને સવાલ કરતા તેમણે કહ્યું કે કેટલાક અરજદારો ઓફિસ શરૂ થયાના ઘણા સમય પહેલા આવી જતા હોય છે.
અરજદારો સાચી પ્રક્રિયાથી અજાણ: મામલતાદર
ઉલ્લેખનીય છે કે સમગ્ર મામલે મામલતદારે એવું પણ કહ્યું કે વ કેટલીક પ્રક્રિયા ઓનલાઈન હોવાથી હુકમ થતાંની સાથે જ સહાય મળવાની શરૂ થઈ જતી હોય છે. પરંતુ અરજદારો સાચી પ્રક્રિયાથી અજાણ હોવાથી કેટલાક કિસ્સામાં મુશ્કેલી પડતી હોય છે, તેનો સત્વરે નિકાલ લાવવાના પ્રયાસ કરી રહ્યા છીએ.