Cyber crime / જો તમે પણ છો લવચેટ કરવાના રસિયા! તો આ વાંચી લો, નહિંતર પસ્તાશો

• યુવક સાથે શારીરિક સંબંધ બાંધ્યા બાદ તેને બળાત્કારના કેસમાં ફસાવવાની ધમકી આપી
•  મોબાઇલ નંબર પર આપ લે કરે છે ત્યાર બાદ તેઓ વોટ્સએપ ચેટિંગ
• હનીટ્રેપ તેમજ ઇમોશનલી બ્લેકમેલ કરનાર યુવક અને યુવતીઓ સક્રિય

ડેટિંગ એપમાં યુવક અને યુવતીઓને શિકાર બનાવીને ઇમોશનલ વાતો કરી લાખો રૂપિયા પડાવનાર ટોળકીઓ સક્રિય થઇ છે. 

ટિન્ડર ડેટિંગ એપથી એક યુવતીએ તેની ગેંગ સાથે મળીને એક વેપારીને ફસાવ્યો હતો અને ત્યાર બાદ નકલી પોલીસ બનીને તેનો ૨૦ લાખ રૂપિયાનો તોડ કર્યો હોવાનો પર્દાફાશ થોડા દિવસ પહેલાં થયો હતો. જો કોઇ ટિન્ડર એપનો ઉપયોગ ડેટિંગ કરવા માટે કરી રહ્યા છો તો સાવધાન થઇ જજો કારણ કે કેટલીક એવી ગેંગ છે જે તમને ઇમોશનલી બ્લેકમેલ કરીને તમારી પાસેથી રૂપિયા ખંખેરી લેશે. સાયબર ક્રાઇમમાં ફરજ બજાવતા એક પોલીસ અધિકારીએ નામ નહીં આપવાની શરતે જણાવ્યું છે કે ટિન્ડર એપ્લિકેશન પર હનીટ્રેપ તેમજ ઇમોશનલી બ્લેકમેલ કરનાર યુવક અને યુવતીઓ સક્રિય થયાં છે. 

મોબાઇલ નંબર પર આપ લે કરે છે ત્યાર બાદ તેઓ વોટ્સએપ ચેટિંગ

સાયબર ક્રાઇમમાં આ પ્રકારની અરજીઓ આવી છે પરંતુ ઇન્વેસ્ટિગેશન ચાલુ હોવાના કારણે અધિકારીઓએ તેને ગુપ્ત રાખી રહ્યા છે. ટિન્ડર એપ એક ડેટિંગ એપ છે. જેમાં અજાણ્યા યુવક યુવતીઓ એક બીજા સાથે વાતચીત કરીને મિત્રતા કેળવે છે. અજાણ્યા યુવકો અને યુવતીઓ એક બીજા સાથે દોસ્તી અને મોજમસ્તી કરવા તત્પર હોય છે જેના કારણે તેઓ ટિન્ડર એપ્લિકેશનમાં રૂપિયા ભરીને મેમ્બર થાય છે અને પોતાના ફોટોગ્રાફ્સ અપલોડ કરે છે. ફોટોગ્રાફ્સ અપલોડ કર્યા બાદ યુવક અને યુવતી એક બીજાની રિકવેસ્ટ એક્સેપ્ટ કર્યા બાદ તેઓ એપ્લિકેશનમાં હાઇ હેલો કરીને ચેટિંગ શરૂ કરે છે. બંને જણા એક બીજાના મોબાઇલ નંબર પર આપ લે કરે છે ત્યાર બાદ તેઓ વોટ્સએપ ચેટિંગ પણ કરે છે. 

મારે ઘરમાં પ્રોબ્લેમ છે..

થોડા દિવસ વાતચીત થઇ ગયા બાદ બંનેને એક બીજા પર એટલો બધાે વિશ્વાસ આવી જાય છે કે વાત આઇ લવ યુ સુધી પહોંચી જાય છે. ટિન્ડર એપ્લિકેશનથી યુવક અને યુવતી એક બીજાને મળતાં પણ હોય છે. આ ટિન્ડર એપ્લિકેશનમાં કેટલીક એવી ટોળકી ઘૂસી ગઇ છે કે જે યુવક અને યુવતીને ઇમોશનલ કરીને તેમની પાસેથી રૂપિયા પડાવી રહી છે. બંને જણા દોસ્ત બની ગયા બાદ મારી માતા બીમાર છે....મારા પિતા બીમાર છે....મારે ઘરમાં પ્રોબ્લેમ છે....ઘરનો હપતો ભરવાનો છે જેવાં અનેક ઇમોશનલ બહાનાં કરીને તેના પાર્ટનર પાસેથી ગૂગલ પે, ફોન પે, પેટીએમ, કે પછી બેન્ક ટ્રાન્સફરથી રૂપિયા મગાવે છે. 

યુવક સાથે શારીરિક સંબંધ બાંધ્યા બાદ તેને બળાત્કારના કેસમાં ફસાવવાની ધમકી આપી

રૂપિયા આવી ગયા બાદ યુવક કે યુવતી ભોગ બનનારને બ્લોક કરી દેતા હોય છે. ચોંકાવનારી વાત એ છે કે મોટાભાગે યુવતીઓ આ પ્રકારના કાંડ કરવામાં માહેર હોય છે અને યુવકોને ફસાવે છે. યુવકોને પોતાની જાળમાં ફસાવીને તેમની પાસેથી અઢળક રૂપિયા પડાવે છે અને હદ તો ત્યારે થાય છે કે યુવતી યુવક સાથે શારીરિક સંબંધ બાંધ્યા બાદ તેને બળાત્કારના કેસમાં ફસાવવાની ધમકી આપીને લાખો રૂપિયા પડાવે છે.હાલ સાયબર ક્રાઇમમાં આવેલી ફરિયાદોના આધારે તપાસ ચાલી રહી છે.