નુકસાન / ચીનને સબક શીખવાડવા ટ્રમ્પ આ નિર્ણય લે તો ભારતને પણ થશે મોટી અસર

• કોરોના સંક્રમણનાં કારણે ચીન-અમેરિકા સામસામે 
• ડોનાલ્ડ ટ્રમ્પ પર Optional Practical Training રદ્દ કરવાનું દબાણ વધ્યું 
• Optional Practical Training પ્રોગ્રામનો અંત આવે તો અમેરિકામાં અભ્યાસ કરી રહેલા વિદ્યાર્થીઓને થશે નુકસાન 

અમેરિકા અને ચીન વચ્ચે ચાલી રહેલા જઘડા વચ્ચે ભારતને પણ નુકસાન થઇ શકે છે. કોરોના વાયરસ ફેલાવવાના આરોપસર અમેરિકાએ ચીન પર કાર્યવાહી કરવાની શરૂઆત કરી છે. અમેરિકા ચીનની કંપનીઓ અને ચાઇનીઝ વિદ્યાર્થીઓને અમેરિકાથી કાઢવા માટે કાર્યવાહી કરી રહ્યું છે. અમેરિકામાં ચીન વિરુદ્ધ એક ઘૃણા ઉત્પન્ન થઇ છે. રિપબ્લિકન અને ડેમોક્રેટ બંને તરફથી ચીન પર થાય એટલાં પ્રતિબંધ મૂકવા પર ભાર આપવામાં આવી રહ્યો છે. થોડા દિવસ પહેલાં રાષ્ટ્રપતિ ટ્રમ્પે ચીનનાં સ્ટોક માર્કેટમાંથી અબજો ડોલર પાછા ખેંચી લેવાની જાહેરાત કરી હતી. ચીનની દિગ્ગજ કંપનીઓ અલીબાબાને પણ અમેરિકામાં બિઝનેસમાં મુશ્કેલીઓનો સામનો કરવો પડી શકે છે. 

અમેરિકાના અધિકારીએ કહ્યું ભારતના વિદ્યાર્થીઓનું સ્વાગત 

અમેરિકામાં વિશ્વના અનેક દેશોથી લોકો અભ્યાસ માટે આવે છે અને તે બાદ ત્યાં જ સ્થાયી પણ થઇ જાય છે. ભારત અને ચીનથી મોટી સંખ્યામાં લોકો અમેરિકામાં અભ્યાસાર્થે જતાં હોય છે ત્યારે સત્તાધારી રિપબ્લિક પાર્ટી હવે શિક્ષણને લઈને કડક કાયદા બનાવવાની ભલામણ કરી રહી છે. જોકે અમેરિકાનાં એક અધિકારીએ જણાવ્યું હતું કે ભારતના વિદ્યાર્થીઓનું અમેરિકામાં સ્વાગત છે.  

અમેરિકામાં Optional Practical Training પ્રોગ્રામનો અંત આવી શકે 

અમેરિકામાં બહારથી આવતા વિદ્યાર્થીઓ ત્યાંના નાગરિકોનો રોજગાર છીનવતા હોવાના કારણે ટ્રમ્પ પર  Optional Practical Training પ્રોગ્રામને ખતમ કરવા માટે ખૂબ દબાણ છે. આ પ્રોગ્રામ હેઠળ વિદ્યાર્થીઓ અમેરિકામાં અભ્યાસ કરીલે તે બાદ ત્રણ વર્ષ સુધી ઇન્ટર્ન અને અમુકવાર ત્યાં જ જોબ કરવાની છૂટ આપવામાં આવે છે. જો ડોનાલ્ડ ટ્રમ્પ તેનો અંત લાવે તો લાખો વિદ્યાર્થીઓએ સ્નાતક થયા બાદ અમેરિકા છોડવું પડી શકે છે.