કોરોનાકાળમાં વધુમાં વધુ લોકોને વેક્સિન આપવી ખૂબ જરૂરી છે ત્યારે કેન્દ્રના નિર્ણયને લાગુ કરવામાં રાજ્ય સરકારે નનૈયો ભણ્યો છે.
વેક્સિન મુદ્દે રજિસ્ટ્રેશન નિયમનો મામલો
રજિસ્ટ્રેશન મામલે કેન્દ્ર-રાજ્ય સામ-સામે
નિમયમાં ફેરફારથી અવ્યવસ્થા સર્જાવાનો ભય
ગુજરાત સહિત આખા ભારતમાં કોરોના વાયરસની બીજી લહેરનો માર પડ્યો છે ત્યારે લોકોમાં વધુમાં વધુ રસીકરણ થવું ખૂબ જરૂરી છે. વેક્સિન લેવા માટે કરવામાં આવેલ ઓનલાઈન રજીસ્ટ્રેશન વ્યવસ્થામાં ઘણી બધી સમસ્યાઑ સામે આવે છે જેના કારણે લોકો રસી લઈ નથી શકતા ત્યારે કેન્દ્રએ હવે ઓન સાઇટ એટલે કે સ્થળ પર જ રજીસ્ટ્રેશનની છૂટ આપી છે પરંતુ ગુજરાત સરકાર આ નિયમ લાગુ કરવા તૈયાર નથી.
હવે 18-44 વર્ષની વયના લોકોના વેક્સિનેશન માટે ઓનલાઈન એપોઈનમેન્ટની જરુર નહીં
કેન્દ્ર સરકારે વેક્સિનેશનના નિયમોમાં મોટો ફેરફાર કર્યો છે. સરકારના આ નિર્ણયને કારણે 18-44 વર્ષના લોકોને મોટી રાહત મળશે. હવે 18-44 વર્ષની વયના લોકોના વેક્સિનેશન માટે ઓનલાઈન એપોઈનમેન્ટની જરુર નથી. સરકારના નવા નિયમો પ્રમાણે, આ વયના લોકો હવે સીધા વેક્સિનેશન સેન્ટર જઈને પોતાનું રજિસ્ટ્રેશન કરાવી શકશે અને એપોઈનમેન્ટ લઈ શકશે. જોકે આ સુવિધા હાલ પૂરતી સરકારી વેક્સિનેશન સેન્ટર પર આપવામાં આવશે.
મોટી સંખ્યામાં લોકો વેક્સિન લેવા ઉમટી પડવાનો ડર
કેન્દ્ર સરકાર દ્વારા આપવામાં આવેલ છૂટછાટ ગુજરાત રાજ્યમાં આપવામાં આવશે નહીં. આ મામલે કેન્દ્ર અને રાજ્ય સરકાર સામસામે આવી ગઈ છે. કેન્દ્ર દ્વારા લેવાયેલા નિર્ણય પર રાજ્ય સરકારએ નનૈયો ભણ્યો છે. સૂત્રો અનુસાર મળતી માહિતી અનુસાર ગુજરાતમાં વેક્સિનની અછતના લઈને રાજ્ય સરકાર આ નિયમ લાગુ કરવા પર પાછીપાની કરી રહી છે. આ સિવાય જો કેન્દ્રએ આપેલ છૂટ લાગુ કરી દેવામાં આવે તો મોટી સંખ્યામાં લોકો વેક્સિન લેવા ઉમટી પડે તેવો પડકાર પણ છે તથા અચાનક નિયમમાં ફેરફારથી અવ્યવસ્થા પણ સર્જાઇ શકે છે.
ગુજરાતમાં આ નિયમ લાગુ નહીં
આરોગ્ય અગ્ર સચિવ શ્રીમતી ડૉ. જયંતિ રવી એ સ્પષ્ટપણે જણાવ્યું છે કે રાજ્યમાં 18થી 45 વયના લોકો માટે કોરોના વેક્સિનેશન હવે ઓનલાઇન રજીસ્ટ્રેશન વિના ઓન સ્પોર્ટ રજીસ્ટ્રેશનથી થઇ શકશે તેવા જે અહેવાલો પ્રચાર માધ્યમોમાં વહેતા થયા છે તેમાં કોઇ તથ્ય નથી. તેમણે જણાવ્યું છે કે રાજ્ય સરકાર દ્વારા હાલ જે રીતે વેક્સિનેશનની પ્રક્રિયા પ્રાયોર રજીસ્ટ્રેશનથી સ્થળ, સમય અને તારીખ આપીને કરવામાં આવે છે તે જ પ્રક્રિયા હાલ રાજ્યમાં યથાવત છે. રાજ્ય સરકારે હાલની વેક્સિનેશન માટે વેબસાઇટ અને એપ ના માધ્યમથી રજીસ્ટ્રેશનની જે પદ્ધતિ છે તે યથાવત રાખેલી છે
સ્થળ પર જ વેક્સિન રજિસ્ટ્રેશનની સુવિધા શરુ કરવાનો રાજ્યોને આદેશ
કેન્દ્ર સરકારે આ નોટિફિકેશન તમામ રાજ્ય સરકારોને મોકલ્યું છે અને તેમને ઓન સાઈટ એટલે કે સ્થળ પર જ રજિસ્ટ્રેશનની સુવિધા શરુ કરવાનું જણાવ્યું છે. આ સુવિધા શરુ કરવાની જવાબદારી રાજ્ય સરકાર પર છોડાઈ છે.
કેમ કેન્દ્રએ લેવો પડ્યો આવો નિર્ણય?
હકીકતમાં ઘણા રાજ્યોએ વેક્સિન માટે સ્લોટ બુક કરાવ્યો હોવા છતાં પણ લોકો વેક્સિનેશન સેન્ટર આવી રહ્યાં નથી. તેથી વેક્સિન વેસ્ટેજના કેસો વધી રહ્યાં છે. આ રિપોર્ટને આધારે કેન્દ્ર સરકારે આ નિર્ણય લીધો છે. તે ઉપરાત ગ્રામીણ વિસ્તારોમાં લોકોને પણ વેક્સિનેશન માટે ઘણી તકલીફોનો સામનો કરવો પડી રહ્યો હતો.