અમદાવાદ / ‘બાઈક કેમ ફાસ્ટ ચલાવે છે’ તેમ કહીને ચાર યુવકોએ વિદ્યાર્થી સાથે કર્યું આવું

• લો ગાર્ડન પાસે વિદ્યાર્થીને માર્યો માર
• ફાસ્ટ બાઇક કેમ ચલાવે છે તેમ કહીને પટ્ટા વડે ઝુડી નાખ્યો 

એલિસબ્રિજ પોલીસ લાઈન ત્રણ માળિયામાં રહેતા અને ઇલેક્ટ્રિક એન્જિનિયરિંગમાં અભ્યાસ કરતા ચિંતન છાપરાએ ચાર યુવકો વિરુદ્ધમાં ફરિયાદ કરી છે. ગઈ કાલે રાતના આઠ વાગ્યાની આસપાસ ચિંતન અને તેનો મિત્ર મનમીત ચૌહાણ બાઈક પર બેસીને જતા હતા. 

યુવકને ભાંડી બીભત્સ ગાળો 

ચિંતન અને તેનો મિત્ર લો ગાર્ડન પોલીસચોકીથી નળવાળા સર્કલથી નવ વાગ્યાની આસપાસ પસાર થઇ રહ્યા હતા તે સમયે ચાર યુવકોએ ચિંતન પાસે આવીને બાઈક રસ્તામાં ઊભું રખાવીને કેમ ફાસ્ટ બાઈક ચલાવે છે તેમ કહીને ચિંતન અને મનમીત કંઈ સમજે તે પહેલાં બીભત્સ ગાળો બોલી તેમને મારવા લાગ્યા હતા. આથી તેઓ જમીન પર પટકાયા હતા.

ચાર યુવકોએ પટ્ટા સાથે ચિંતન પર તૂટી પડ્યા  

જોતજોતામાં ચાર યુવકોએ પટ્ટા વડે ચિંતનને ફટકારતાં તેને માથાના ભાગેથી લોહી નીકળવા લાગ્યું હતું, ચિંતનને બચાવવા મનમીત વચ્ચે પડ્યો તો તેને પણ ફેંટ મારીને તેના પર તૂટી પડ્યા હતા. આ દરમિયાનમાં ચિંતને બૂમાબૂમ કરતાં આસપાસના લોકો આવી જતાં તેઓ બે યુવકોને પકડી પાડીને પોલીસ સ્ટેશન લઇ ગયા હતા જ્યારે બે યુવકો નાસી ગયા હતા. 

પોલીસે હાથ ધરી તપાસ 

પોલીસે પકડાયેલ બે યુવકોની પૂછપરછ કરતાં તેમણે તેમનાં નામ દિલદાર અજમેરી-માધવપુરા, મોહસીન રામોરી અને ભાગી ગયેલ અઝહર અજમેરી અને સાલમ હોવાનું જણાવ્યું હતું. પોલીસે હાલ ગુનો નોંધી ફરાર બે યુવકોની શોધખોળ શરૂ કરી છે.