અમદાવાદ / સિવિલ હોસ્પિટલમાં લાખોનાં ખર્ચે બૂમ બેરિયર લગાવ્યા પણ વાપરશે કોણ?

• હોસ્પિટલમાં પાંચ હજાર કરતાં વધુ ડોક્ટર અને કર્મચારીઓ
• સિવિલ હોસ્પિટલમાં પાંચ જગ્યાએ બૂમબે‌રિયર મૂકવામાં આવ્યા
• બૂમબેરિયરને ઉપયોગમાં લઈ શકાશે કે નહીં?

સિવિલ હોસ્પિટલમાં છાશવારે ને છાશવારે ડોક્ટર અને દર્દીઓનાં સગાંવહાલાં સાથે બબાલ-ભાંગફોડ, ચોરી-અકસ્માતના બનાવ બનતા હોય છે. આવી ઘટનાઓને રોકવા માટે હોસ્પિટલમાં કમાન્ડો જેવા ‌સિક્યો‌રટી ગાર્ડ તેમજ સીસીટીવી કેમેરા લગાવવામાં આવ્યા છે ત્યારે ટ્રોમા સેન્ટર પાસે પોલીસચોકી પણ બનાવવામાં આવી છે તેમ છતાંય ‌સિક્યો‌રિટીથી સજ્જ સિવિલ હોસ્પિટલમાં નાની-મોટી બબાલ થતી હોય છે. સિવિલ હોસ્પિટલમાં ‌સિક્યો‌રિટી હોવા છતાંય કેટલાક રીઢા ગુનેગાર પોલીસને થાપ આપીને નાસી જાય છે તો વાહનચાલકો પણ ટ્રાફિકથી બચવા માટે અને શોર્ટકટથી નીકળવા માટે સિવિલ હોસ્પિટલના કેમ્પસનો જાહેર રોડ તરીકે ઉપયોગ કરી રહ્યા છે, જેના કારણે હોસ્પિટલમાં ટ્રાફિકની સમસ્યા પણ રહે છે.  

ગેટ પર બૂમબેરિયર મૂકવામાં આવ્યા છે

આવી તમામ ઘટનાઓને રોકવા માટે અને તેના પર લગામ લગાવવા માટે સિવિલ હોસ્પિટલના તમામ ગેટ પર બૂમબે‌રિયર મૂકવામાં આવ્યા છે. સિવિલ હોસ્પિટલના કેમ્પસમાં આવવા માટે મુખ્ય ચાર દરવાજા છે, જેમાં સિવિલ હોસ્પિટલના સત્તાધીશોએ બૂમબે‌રિયર મૂકી દીધા છે. બૂમબે‌રિયર મૂકવાના ઘણા ફાયદા છે, પરંતુ તે એક શો-પીસ બનીને રહી ગયા છે. 

સિવિલ હોસ્પિટલ ફરતેના જાહેર રોડ પર ટ્રાફિક જામની સ્થિ‌તિ

સિવિલ હોસ્પિટલમાં રોજબરોજ હજારો દર્દીઓ સારવાર માટે આવે છે ત્યારે તેમની સાથે તેમનાં સગાંવહાલાં પણ સિવિલમાં આવે છે તેવામાં સિવિલ હોસ્પિટલ ફરતેના જાહેર રોડ પર ટ્રાફિક જામની સ્થિ‌તિ રહે છે. ટ્રાફિકની સમસ્યાના કારણે તેમજ શોર્ટકટથી નીકળવા માટે વાહનચાલકો ખાસ કરીને બાઇક-કાર અને રિક્ષાચાલકો સિવિલ હોસ્પિટલના કેમ્પસનો જાહેર રોડ તરીકે ઉપયોગ કરી રહ્યા છે. વાહનચાલકો બેફામ સ્પીડમાં સિવિલ હોસ્પિટલના કેમ્પસમાં પોતાનાં વાહન હંકારે છે, જેના કારણે દર્દીઓના સગાંવહાલાં સાથે કે પછી સિવિલના સ્ટાફ સાથે અકસ્માતના બનાવ પણ બન્યા છે. 

હોસ્પિટલમાં પાંચ હજાર કરતાં વધુ ડોક્ટર અને કર્મચારીઓ 

આ સિવાય બે વર્ષ પહેલાં કેટલાંક લુખ્ખાં તત્ત્વો સિવિલ હોસ્પિટલ ‌બ‌િલ્ડંગમાં બાઇક લઇને ઘૂસી ગયાં હતાં. આવી તમામ પ્રવૃત્તિ પર લગામ લાવવા માટે બૂમબે‌રિયર મૂકવામાં આવ્યાં છે. સિવિલ હોસ્પિટલમાં પાંચ જગ્યાએ બૂમબે‌રિયર મૂકવામાં આવ્યા છે. બૂમબે‌રિયર ઓટોમે‌ટિક હોવાથી તમામ વાહનનું ચે‌કિંગ કરીને સિવિલ હોસ્પિટલના કેમ્પસમાં એન્ટ્રી આપવાનો પ્લાન હતો. હોસ્પિટલમાં પાંચ હજાર કરતાં વધુ ડોક્ટર અને કર્મચારીઓ નોકરી કરે છે તમામ લોકોને એન્ટ્રી પાસ અને તેમનાં વાહન પર ‌સ્ટિકર લગાવી દેવામાં આવવાનાં હતાં, જેથી તે બેરોકટોક હોસ્પિટલના કેમ્પસમાં આવી શકે.

બૂમબેરિયરને ઉપયોગમાં લઈ શકાશે કે નહીં 

મોટા ઉપાડે લાખો રૂપિયાના ખર્ચે મૂકેલા બૂમબે‌રિયર ના લીધે તમામ વાહનનું ચેકિંગ કરીને જો કોઇ શંકાસ્પદ વસ્તુ મળી આવે તો વાહનચાલક વિરુદ્ધમાં કાયદેસર કાર્યવાહી કરી શકાય પણ તે કોઇ કામના નથી. સિવિલ હોસ્પિટલના સુપરિન્ટેન્ડેન્ટ ડો. જી.એચ. રાઠોડે જણાવ્યું છે કે બૂમબેરિયરને ઉપયોગમાં લઈ શકાશે કે નહીં તે મામલે ટૂંકમાં નિર્ણય લેવામાં આવશે.