હિંસા / અફઘાનિસ્તાનનું બચવું હવે અઘરુ, 1 મહિનામાં તાલિબાન કરશે એવું કે US ને ચિંતા થઈ, કર્યો ચોંકાવનારો દાવો

• તાલિબાનને લઈને અમેરિકાએ કર્યો ચોંકાવનારો દાવો
• 3 મહિનામાં રાજધાની કાબુલનો કબજો કરી દેશે
• હવે તાલિબાનને રોકવા અઘરા, આખા દેશનો કબજો કરી લેશે

અમેરિકાના ઈન્ટેલિજન્સ રિપોર્ટમાં એવો ચોંકાવનારો ખુલાસો કરાયો છે કે અફઘાનિસ્તાનમાં તાલિબાનોને રોકવા હવે અઘરા છે અને 1 થી 3 મહિનામાં કાબુલ પર પૂરો કબજો જમાવી શકે છે. 

અમેરિકી રિપોર્ટમાં એવું પણ જણાવાયું છે કે બધું ખોટી દિશામાં જઈ રહ્યું છે. વિદેશી સુરક્ષાદળોની વાપસી થતાની સાથે જ અફઘાનિસ્તાન સરકાર અને તાલિબાન વચ્ચેનો જંગ ઉગ્ર બન્યો છે. તાલિબાનોએ ગ્રામીણ વિસ્તારોના મોટા હિસ્સા પર કબજો જમાવીને મોટા શહેરો પરના હુમલા ઝડપી બનાવી દીધા છે.

તાલિબાને બદખશાન પ્રાંત પર કબજો કર્યો 
તાલિબાનોએ પૂર્વોત્તર અફઘાનિસ્તાનના બદખાશાન પ્રાંત પર કબજો જમાવ્યો હોવાનો દાવો કર્યો છે. તાલિબાને એક નિવેદન જારી કરીને દાવો કર્યો છે કે તેણે બદખશાન પ્રાંતની રાજધાની ફૈઝાબાદ પર કબજો કર્યો છે. તાલિબાનોએ વહીવટી મકાન, પોલીસ હેડક્વાર્ટર, સ્થાનિક ગુપ્તચર વિભાગ અને શહેરની અન્ય ઇમારતો પર કબજો મેળવ્યો હોવાનો દાવો કર્યો હતો. પાઝવોક ન્યૂઝ એજન્સીએ એક અધિકારીને ટાંકીને કહ્યું હતું કે તાલિબાન આતંકવાદીઓએ તેના રાજધાની પ્રાત સહિત તેના લગભગ તમામ વિસ્તારનો કબજો લઈ લીધો છે. બદખશાન અફઘાનિસ્તાનનો 9 મો પ્રાંત છે, જેને તાલિબાનોએ એક સપ્તાહથી પણ ઓછા સમયમાં કબજે કર્યાનો દાવો કર્યો છે.

કુન્દુઝ પ્રાંતમાં આર્મી બેઝ પર કબજો કર્યો 

અફઘાનિસ્તાનના અધિકારીઓ અને તાલિબાનોએ કહ્યું છે કે બળવાખોરોએ કુન્દુઝ પ્રાંતમાં લશ્કરના મોટા પાયા પર કબજો કર્યો છે. એરપોર્ટ પર હાજર 217 કોર્પ્સ બુધવારે કબજે કરવામાં આવી હતી. તાલિબાનોએ તેનો એક વીડિયો ઓનલાઇન પણ બહાર પાડ્યો છે, જેમાં સૈનિકો બેઝ છોડીને જતા જોવા મળે છે. જો કે, અફઘાન સરકારે હજુ સુધી આ અંગે કોઈ પ્રતિક્રિયા આપી નથી. 2017 કોર્પ્સ અફઘાન આર્મીના સાત આદેશોમાંથી એક છે.

અફઘાન સેનાએ 439 તાલિબાની આતંકીઓને ઠાર કર્યો 
આખા દેશમાં બેફામ બનેલા તાલિબાનને એક મોટો ઝટકો આપતા અફઘાન સેનાએ ઓછામાં ઓછા 439 આતંકીઓને ઠઆર કર્યાં છે. અફઘાન સેનાએ કરેલા ભીષણ હવાઈ હુમલામાં 439 આતંકીઓ માર્યા ગયા હતા તથા 77 ઘાયલ થયા હતા. અફઘાન રક્ષા મંત્રાલયે ટ્વિટ કરીને આ માહિતી આપી. 

તાલિબાને છોકરીઓને સેક્સ ગુલામ બનાવવાનું શરુ કર્યું 

જેમ જેમ તાલિબાનનો કબજો વધતો જાય તેમ તેમ અફઘાનિસ્તાન હાલત ખરાબ બની રહી છે. નવા રિપોર્ટમાં દાવો કરાયો છે કે અફઘાનિસ્તાનમાં તાલિબાનો યુવાન છોકરીઓને સેક્સ ગુલામ બનાવવવા માટે ઘેર ઘેરથી ઉપાડી રહી છે. સૂત્રોના જણાવ્યાનુસાર તાલિબાને સ્થાનિક નેતાઓ પાસેથી 12 વર્ષની છોકરીઓની યાદી માંગી હતી. હવે તાલિબાની નેતા અપહરણ અને મહિલાઓની જબરજસ્તીથી લગ્ન કરાવવાનો પ્રયાસ કરી રહ્યાં છે.