રાજકારણ / ગોંડલમાં જયરાજસિંહ જાડેજા અને રીબડાના અનિરૂધ્ધસિંહમાંથી કોને મળશે ટિકિટ?, ભાજપ નેતાના સૂચક નિવેદનથી ગરમાયું વાતાવરણ

• રાજકોટની ગોંડલ બેઠકને લઇ ભાજપમાં ખેંચમતાણ
• સાંસદ રમેશ ધડુકે ભાજપની જાહેરાત પહેલા આપ્યું નિવેદન
• ગોંડલમાં જયરાજસિંહના પરિવારને આપવામાં આવશે ટિકિટઃ ધડુક 

ગુજરાત વિધાનસભાની ચૂંટણીને હવે ગણતરીના મહિનાઓ બાકી છે, ત્યારે દરેક રાજકીય પાર્ટીઓ મહતમ બેઠકો હાંસલ કરવા એડી ચોટીનુ જોર લગાવી રહી છે. આ વચ્ચે ગોંડલની વિધાનસભા બેઠક પર ઉમેદવારને લઇ રીબડાના અનિરૂધ્ધસિંહ જાડેજા અને જયરાજસિંહ જાડેજા જૂથ આમને સામને આવી ગયા છે. ત્યારે હવે મામલે પોરબંદરના સાંસદ રમેશ ધડુકે સ્ફોટક નિવેદન આપ્યું છે. 

ગોંડલ બેઠક પર ઉમેદવારને લઇ સાંસદનું સ્ફોટક નિવેદન

પત્રકાર દ્વારા સાંસદ રમેશ ધડુકને જ્યારે ગોંડલમાં ઉમેદવારને લઈને સવાલ પૂછવામાં આવ્યો કે ગોંડલ બેઠક પરથી જયરાસિંહ જાડેજા અને રીબડાના અનિરૂધ્ધસિંહ જાડેજામાંથી કોને ટિકિટ આપવામાં આવશે? ત્યારે તેમણે જણાવ્યું હતું કે, કોને ટિકિટ આપવાની અને કોને નહીં એ પાર્ટી નક્કી કરશે, સમય આવવા દો. અંતમાં તેમણે જતા જતા જણાવ્યું હતું કે, ગોંડલમાં જયરાજસિંહ જાડેજાના પરિવારને  ટિકિટ આપવામાં આવશે.

અનિરૂધ્ધસિંહ પર કર્યા હતા આકરા પ્રહાર 

આપને જણાવી દઈએ કે, એક બાજુ ગોંડલ બેઠક પરથી જયરાજસિંહ પોતાના પરિવારમાંથી અથવા પોતાને ટિકિટ માટે પ્રબળ દાવેદાર માની રહ્યા છે.  તો બીજી બાજુ રિબડાના અનિરૂધ્ધસિંહ જાડેજા પણ પોતાના પરિવાર અથવા ખૂદને ટિકિટ મળે તેવા પ્રયાસ કરી રહ્યા છે. આ મામલે બે દિવસ અગાઉ ગોંડલ શહેર-તાલુકા કડવા પાટીદાર સમાજની બેઠકમાં ગોંડલના પૂર્વ ધારાસભ્ય જયરાજસિંહ જાડેજાએ અનિરૂધ્ધસિંહ  જાડેજા પર આકરા પ્રહાર કર્યા હતા. 

રીબડામાં જમીન કેવી રીતે વેચાય છે તે બધાને ખબર છેઃ જયરાજસિંહ
    
ગોંડલના વર્તમાન ધારાસભ્ય ગીતાબા જાડેજાના પતિ અને પૂર્વ ધારાસભ્ય જયરાસિંહ જાડેજાએ જણાવ્યું હતું કે, એક પણ શબ્દ ઘસાતો બોલવાનો મને અધિકાર નથી. પણ મિત્રો મારે દુઃખ સાથે એટલે કહેવું છે રાજકારણમાં કોઈ કોઈના કાયમી મિત્રો નથી હોતા અને કોઈ કોઈના કાયમી દુશ્મન નથી હોતા. અત્યારથી ગોંડલમાં બધી પ્લાનિંગની શરૂ થઈ ગઈ છે, જેમકે માર્કેટિંગ યાર્ડના ચેરમેન કોણ?, નગરપાલિકાના પ્રમુખ કોણ?, તાલુકા પંચાયતની કમાન કોને સોંપીશું, નાગરિક બેંક હવે કોને દઈશું. મને જે વાત મળે છે તે હું તમારી સમક્ષ મૂકુ છું કે અનિરૂધ્ધસિંહ.  જાડેજા (રીબડા)ના સુપુત્ર રાજદીપભાઈ અત્યારથી ધારાસભ્ય બની ગયા છે. અનિરૂધ્ધસિંહ.  એવું કહે છે કે યાર્ડનું રક્ષણ તો હું કરીશ. આમાં બે વસ્તુ ક્યાંય ભેગી નથી થતી. તમારે દૂધની ભલામણ કરવી હોય તો બિલાડીને દૂર રાખવી પડે. તમારો લોકર રૂમ હોય તો એને સ્ટોગ રાખવો પડે, લોકર રૂમના દરવાજા આગળ ગનમેન રાખવો પડે. ચોરને આ જવાબદારી ન સોંપાય. રીબડામાં જતા હશે એ બધાને ખબર છે કે રીબડાની અંદર જમીન કેવી રીતે વેચાય છે'

છેલ્લી બે ટર્મથી ગોંડલ બેઠક છે ભાજપ પાસે

અત્રે ઉલ્લેખનીય છે કે, છેલ્લી બે ટર્મથી ગોંડલ બેઠક ભાજપ પાસે છે. ગીતાબા જયરાજસિંહ જાડેજા ગોંડલના ધારાસભ્ય છે. ગોંડલ વિધાનસભા બેઠક પર કુલ 2,12,789 મતદારો છે. જેમાં 1,09,995 પુરુષ અને 1,02,789 મહિલા મતદારો છે. 2017ની ચૂંટણી સમયે જયરાજસિંહને હત્યાના કેસમાં રાજ્યની બહાર રહેવાની શરતે જામીન મળ્યા હતા. એ કારણે ગોંડલ બેઠક પર તેમના પત્નીને ટિકિટ મળી હતી. વિધાનસભાની ચૂંટણીમાં તેમનો વિજય થયો હતો.