ગુજરાત ચૂંટણી / સુરતમાં AAPના ધુરંધરો, જાયન્ટ કીલર ધાનાણી: ગુજરાતમાં પહેલા ચરણમાં આ 5 ચહેરાઓ પર આખા દેશની નજર

• ગુજરાતમાં ફર્સ્ટ ફેઝના પાંચ સૌથી મોટા ચહેરા
• આ 5 ચહેરાઓ પર રહેશે આખાય દેશની નજર
• ગુજરાતમાં બે તબક્કામાં યોજાશે વિધાનસભા ચૂંટણી

ગુજરાત વિધાનસભાની ચૂંટણીની તારીખો જાહેર થઇ ગઇ છે. ચૂંટણી બે તબક્કામાં યોજાશે. ત્યારે ગુજરાતમાં સત્તા પર કોનો અધિકાર રહેશે તે પ્રથમ તબક્કાના મતદાન બાદ નક્કી થઇ જશે. એવામાં હાલમાં તમામ રાજકીય પક્ષો પોતપોતાના ઉમેદવારો જાહેર કરવામાં વ્યસ્ત છે. ત્યારે કેટલાકે 'જાયન્ટ કિલર'ને ઉમેદવાર બનાવ્યા છે તો કોઇકે દેશદ્રોહીના આરોપી રહી ચૂકેલા નેતા પર વિશ્વાસ મૂક્યો છે.

ગુજરાતમાં હવે બરાબર ચૂંટણી માહોલ જામી ગયો છે. તારીખો પણ જાહેર થઇ ગઇ છે. રાજકીય પક્ષોના કેટલાક ઉમેદવારો પણ જાહેર થઇ ગયા છે. તેમજ તારીખો પણ હવે નજીક આવી ગઇ છે. ત્યારે રાજકીય પક્ષોએ ચૂંટણી મેદાનમાં ઉતારેલા ઉમેદવારોમાંથી ગુજરાતમાં પ્રથમ ચરણમાં નીચેના 5 દિગ્ગજ ચહેરાઓ પર આખાય દેશની નજર રહેશે. જાણો કેમ...

'જાયન્ટ કિલર' પરેશ ધાનાણી
અમરેલી વિધાનસભા બેઠક પરથી કોંગ્રેસની ટિકિટ પર ચૂંટણી લડનાર પરેશ ધાનાણી ગુજરાતના રાજકારણમાં 'જાયન્ટ કિલર' તરીકે ઓળખાય છે. તેઓને આ નામ 2002માં મળ્યું હતું કે જ્યારે તેઓએ ખૂબ જ નાની ઉંમરે ભાજપના વરિષ્ઠ નેતા પુરૂષોત્તમ રૂપાલાને હરાવ્યા હતા. 2007માં તેઓ હારી ગયા, પરંતુ ત્યાર બાદ તેઓએ ફરીવાર 2012 અને 2017માં જીત મેળવીને પોતાનું વર્ચસ્વ સ્થાપિત કર્યું હતું.

AAP પ્રમુખ ગોપાલ ઇટાલિયા
પોતાના નિવેદનોના કારણે સતત વિવાદોમાં રહેનાર આમ આદમી પાર્ટીના પ્રમુખ ગોપાલ ઈટાલિયા સુરતની પાટીદાર બેઠક કતારગામ પરથી ચૂંટણી લડી રહ્યાં છે. જોકે ગોપાલ ઇટાલિયાની માટે આ જંગ એટલા માટે મુશ્કેલભરેલ છે કારણ કે 2017માં પાટીદાર આંદોલને પણ આ બેઠક પરથી ભાજપને જીતતા રોકી શક્યું ન હતું. ત્યારે આ વખતે પણ ઇટાલિયાને અહીં આકરી ટક્કર મળી શકે છે.

કાંતિલાલ અમૃતિયા
મોરબી વિધાનસભા બેઠક પરથી ભાજપે પૂર્વ ધારાસભ્ય કાંતિલાલ અમૃતિયાને મેદાનમાં ઉતાર્યા છે. કાંતિલાલ અમૃતિયા એ જ વ્યક્તિ છે કે જેઓએ મોરબીનો પુલ તૂટ્યા બાદ લોકોને બચાવવા નદીમાં છલાંગ લગાવી દીધી હતી. આથી ભાજપે આ બેઠક પરથી તેઓની પર વિશ્વાસ વ્યક્ત કર્યો છે. એ માટે ભાજપે વર્તમાન ધારાસભ્ય બ્રિજેશ મેરજાની પણ ટિકિટ કાપી છે. તમને જણાવી દઇએ કે, બ્રિજેશ મેરજાએ ભાજપ તરફથી પેટાચૂંટણી જીતી હતી. આ અગાઉ 2017માં બ્રિજેશ મેરજાએ કોંગ્રેસની ટિકિટ પરથી જીત મેળવી હતી.

રીવાબા જાડેજા
જામનગર ઉત્તરમાંથી ભાજપની ટિકિટ પર ચૂંટણી લડનાર રીવાબા જાડેજા ક્રિકેટર રવિન્દ્ર જાડેજાના પત્ની છે. રીવાબા જાડેજાનું ભાવિ પણ પ્રથમ તબક્કામાં જ નક્કી થઇ જશે. તેઓ ત્રણ વર્ષ પહેલા જ ભાજપમાં જોડાયા હતા. રીવાબા પર જીતનું દબાણ પણ વધારે છે કારણ કે તેઓને ટિકિટ આપવા માટે ભાજપે આ બેઠક પરથી વર્તમાન ધારાસભ્ય ધર્મેન્દ્ર જાડેજાની પણ ટિકિટ કાપી નાખી છે.

અલ્પેશ કથીરિયા
સુરતની વરાછા રોડ બેઠક પરથી આમ આદમી પાર્ટીની ટિકિટ પર ઉમેદવાર બનેલા અલ્પેશ કથિરિયા પર ગુજરાતના સૌ કોઇની નજર છે. કારણ કે અલ્પેશ કથીરિયા પાટીદાર આંદોલનમાં હાર્દિક પટેલના સાથી રહી ચૂક્યા છે. પાટીદાર આંદોલન દરમિયાન લોકોને ઉશ્કેરવાના કેસમાં કથીરિયા પર દેશદ્રોહનો પણ આરોપ લાગ્યો હતો. તમને જણાવી દઇએ કે, હાલમાં ભાજપના પૂર્વમંત્રી કિશોર કાનાણી વરાછા રોડ બેઠક પરથી ધારાસભ્ય છે.

બે તબક્કામાં યોજાશે ગુજરાત વિધાનસભાની ચૂંટણી

તમને જણાવી દઇએ કે, ગુજરાત વિધાનસભાની ચૂંટણી બે તબક્કામાં યોજાશે. જેમાં પ્રથમ તબક્કાનું મતદાન 1 ડિસેમ્બરે યોજાશે અને 5 ડિસેમ્બરના રોજ બીજા તબક્કાનું મતદાન યોજાશે. જ્યારે 8 ડિસેમ્બરના રોજ મતગણતરીની પ્રક્રિયા હાથ ધરાશે. તદુપરાંત ઉમેદવારોના ફોર્મ ભરવાની પ્રક્રિયા પણ શરૂ થઇ ગઇ છે ત્યારે ગુજરાત વિધાનસભાની પ્રથમ તબક્કાની 89 બેઠકો માટેની ચૂંટણીમાં ઉમેદવારી નોંધાવવાની પ્રક્રિયા પૂર્ણ થઇ ગઇ છે. 14મી નવેમ્બરે ઉમેદવારીના છેલ્લા દિવસ સુધીમાં 89 બેઠકો પર 1362 જેટલા જંગી ઉમેદવારો પોતાની ઉમેદવારી નોંધાવી છે.

ઉમેદવારી પરત ખેંચવાની છેલ્લી તારીખ 21 નવેમ્બર

મહત્વનું છે કે, ઉમેદવારીપત્રોની ચકાસણીની પ્રક્રિયા મંગળવારે પૂર્ણ થઇ ગઇ છે. ત્યારે હવે ફોર્મ ખેંચવાની છેલ્લી તારીખ 17મી હોવાથી એ દિવસે જ આ બેઠકો પરનું આખરી ચિત્ર સ્પષ્ટ થશે. બીજા તબક્કાની 93 બેઠકો માટે 17મી નવેમ્બર સુધી ઉમેદવારી નોંધાવી શકાશે. 18મીએ ફોર્મની ચકાસણી થશે જ્યારે ઉમેદવારી પરત ખેંચવાની છેલ્લી તારીખ 21મી નવેમ્બર છે.