આ મહિનાના અંત સુધીમાં રાજ્યના ગૃહવિભાગના એડિશનલ ચીફ સેક્રેટરી સંગીતા સિંઘ વયમર્યાદાથી નિવૃત્ત થઇ રહ્યા છે.
તેઓની નિવૃત્તિ સાથે તેમના સાથે નવા ગૃહવિભાગના સચિવ કોણ બનશે એ મુદ્દે સચિવાલયમાં વિવિધ અટકળો થઇ રહી છે.
આ બે નામ નવા ગૃહવિભાગના સચિવ તરીકે ચર્ચામાં
સંગીતા સિંઘ 1986ની બેચના IAS અધિકારી છે. એડિશનલ ચીફ સેક્રેટરી ગૃહખાતાના પ્રતિષ્ઠિત પદ માટે સંગીતા સિંઘના બે બેચમેટ્સના નામ ચર્ચાય છે. તેમાં ડો રાજીવ કુમાર ગુપ્તા (એડિશનલ ચીફ સેક્રેટરી વનવિભાગ) અને પંકજ કુમાર (એડિશનલ ચીફ સેક્રેટરી રેવન્યુ)નો સમાવેશ થાય છે.
હાલ રાજ્યની કોરોનાની સ્થિતિને દેખરેખમાં
આ બંને અધિકારીઓને વનવિભાગ અને રેવન્યુની કામગીરી સાથે રાજ્યની કોવિડ 19ની પરિસ્થિતિનો ચાર્જ સોંપવામાં આવ્યો છે. આ જવાબદારીમાં ડો ગુપ્તાને AMCને કોરોના મામલેની કામગીરીમાં માર્ગદર્શન અને નિર્દેશ અને પંકજ કુમારને રાજ્યના આરોગ્ય વિભાગમાં કોરોના મામલેની કામગીરીમાં માર્ગદર્શન અને નિર્દેશની કામગીરી સોંપવામાં આવી છે.
નવા ગૃહવિભાગના સચિવ પાસે ચીફ સેક્રેટરી બનવાનો સીધો મોકો: સૂત્ર
VTVGujarati.comના સૂત્રો પ્રમાણે મળતી માહિતી મુજબ ગુપ્તા અને પંકજ કુમાર બંને અધિકારીઓએ આ પદ મેળવવા માટે પોતપોતાની રીતે એડીચોટીના પ્રયત્નો શરુ કરી દીધા છે. 2021ની ફેબ્રુઆરીમાં અનિલ મુકીમનો કાર્યકાળ પૂર્ણ થઇ રહ્યો છે તેથી ગૃહવિભાગના સચિવને ચીફ સેક્રેટરી બનવાનો સીધો મોકો છે. એક સિનિયર અધિકારીના કહેવા પ્રમાણે આ બંને અધિકારીઓ વચ્ચે સ્પર્ધા લાગેલી છે.
સંગીતાસિંઘના રિટાયરમેન્ટ સાથે અને નવા ગૃહસચિવની વરણી સાથે રાજ્યના ટોચના બ્યુરોક્રેટિક અધિકારીઓની નાના પાયે બદલી થવાના અહેવાલો છે. સૂત્રો પ્રમાણે જો પંકજ કુમારને ગૃહખાતામાં મુકવામાં આવશે તો મુકેશ પુરી (એડિશનલ ચીફ સેક્રેટરી અર્બન ડેવલપમેન્ટ) અથવા સુનૈના તોમર (એડિશનલ ચીફ સેક્રેટરી ઉર્જા અને પેટ્રોકેમિકલ્સ)ને રેવન્યુ ખાતામાં મુકવામાં આવશે.
સિનિયર અધિકારીઓની અછતથી ઘણા વિભાગો એડિશન ચાર્જથી ચાલી રહ્યા છે
નોંધનીય છે કે અત્યારે રાજ્યમાં સિનિયર અધિકારીઓની અછત છે તેથી ઘણા વિભાગો એડિશન ચાર્જ આપીને ચલાવવામાં આવી રહ્યા છે. અત્યારે રાજીવ ગુપ્તા સરદાર સરોવર નર્મદા નિગમના MDનો વધારાનો હવાલો સાંભળે છે. ડિપાર્ટમેન્ટ ઓફ પોર્ટ એન્ડ ટ્રાન્સપોર્ટને GADના એડિશનલ ચીફ સેક્રેટરી કમલ દયાની એડિશનલ ચાર્જ તરીકે સાંભળે છે તો વળી GNFCના MD તરીકેનો વધારાનો હવાલો ફાઇનાન્સના એડિશનલ ચીફ સેક્રેટરી પંકજ જોશી સાંભળે છે.