સંકટ / શું હવે વિશ્વમાં આવશે કોરોનાની ચોથી લહેર? અમેરિકા અને યુરોપમાં Deltacronએ મચાવ્યો કહેર

• ડેલ્ટા-ઓમિક્રોનના સંયોજનથી બનેલો વેરિઅન્ટ
• અનેક દેશોમાં સામે આવી રહ્યાં છે Deltacron ના કેસ
• એક જ વ્યક્તિ ડેલ્ટા અને ઓમિક્રોન બંનેથી સંક્રમિત થઈ રહી છે

કોરોના ફરી એક વાર ડરાવવા લાગ્યો છે. ચીનમાં કોરોનાના કેસોએ તમામ રેકોર્ડ તોડવાનું શરૂ કરી દીધું છે. હોંગકોંગમાં પણ કંઇક આવી જ હાલત જોવા મળી રહી છે. માત્ર ચીન અને હોંગકોંગ જ નહીં પરંતુ વિશ્વના ઘણા દેશોમાં ફરીથી કોરોનાના કેસો વધવા લાગ્યા છે. દરમિયાન, વિશ્વ આરોગ્ય સંસ્થા (WHO) એ એવો અહેવાલ આપ્યો છે કે, વિશ્વભરમાં ડેલ્ટાક્રોનના કેસ વધવા લાગ્યા છે. ત્યારે એવી ચિંતા વ્યક્ત કરવામાં આવી રહી છે કે, ડેલ્ટાક્રોન કોરોનાની નવી લહેર લાવી શકે છે.

ડબ્લ્યુએચઓ અનુસાર, ફ્રાન્સ, યુકે, નેધરલેન્ડ અને ડેનમાર્ક સહિત યુરોપના ઘણા દેશોમાં ડેલ્ટાક્રોનના કેસ નોંધાયા છે. USના કેટલાંક ભાગોમાં ડેલ્ટાક્રોન વેરિઅન્ટના કેસો પણ મળી આવ્યાં છે. જો કે, હાલમાં તેના કેસો ઘણાં ઓછાં છે પરંતુ તે એક નવી લહેર લાવી શકે છે.

જાણો શું છે આ Deltacron?

ડેલ્ટાક્રોન કોરોનાના ડેલ્ટા અને ઓમિક્રોન વેરિઅન્ટથી બનેલું છે. વૈજ્ઞાનિકોનું એવું માનવું છે કે, આ વેરિઅન્ટની કરોડરજ્જુ ડેલ્ટાથી બનેલી છે અને તેની સ્પાઇક ઓમિક્રોનથી છે. આ બંને વેરિઅન્ટના સંયોજનના કારણે તેને 'ડેલ્ટાક્રોન' નામ આપવામાં આવ્યું છે.

વૈજ્ઞાનિકોનું માનવું છે કે, જ્યારે વાયરસ પરિવર્તિત થાય છે ત્યારે આવાં સંયોજનો જોવા મળે છે. આવી સ્થિતિમાં, વ્યક્તિને એક જ સમયે બે અલગ-અલગ વેરિઅન્ટથી સંક્રમણ થાય છે. આ કિસ્સામાં, એક જ વ્યક્તિ ડેલ્ટા અને ઓમિક્રોન બંનેથી સંક્રમિત થઈ રહી છે.

શું તે ઓમિક્રોન કરતાં વધુ ખતરનાક છે?

આ વિશે વધુ સ્પષ્ટપણે કંઈ પણ કહેવું ઘણું મુશ્કેલ છે. પરંતુ નિષ્ણાંતોનું એવું માનવું છે કે, ડેલ્ટા વેરિઅન્ટ વધારે ઘાતક હતો, જ્યારે ઓમિક્રોન વધુ સંક્રમિત હતો. આવી સ્થિતિમાં, ડેલ્ટા અને ઓમિક્રોન સાથે મળીને બનેલ વેરિઅન્ટ ખતરનાક પણ હોઇ શકે છે. કારણ કે તે ખૂબ મોટી સંખ્યામાં લોકોને સંક્રમિત કરી શકે છે અને બીમારીની ગંભીરતા પણ વધારે હોઈ શકે છે.

જો કે, નિષ્ણાંતો સહમત છે કે, આવાં બે પ્રકારોનું સંયોજન એ કંઇ નવી વાત નથી. WHO નાં ચીફ સાયન્ટિસ્ટ સૌમ્યા સ્વામીનાથન કહે છે કે, આપણે જાણીએ છીએ કે કોવિડના અલગ-અલગ વેરિઅન્ટ સામે આવ્યાં છે અને આવી સ્થિતિમાં મનુષ્ય કે પ્રાણીઓમાં ભિન્નતાનું સંયોજન હોઈ શકે છે. તેઓનું કહેવું છે કે, હવે આના વિશે વધુ માહિતી માટે હજુ આપણે રાહ જોવી પડશે.

ક્યારે સામે આવ્યો હતો ડેલ્ટાક્રોન?

આ વર્ષે જાન્યુઆરીમાં સાયપ્રસના વૈજ્ઞાનિકોએ ડેલ્ટાક્રોન વેરિઅન્ટ વિશે જાણકારી આપી હતી. સાયપ્રસના વૈજ્ઞાનિક ડૉ. લિયોન્ડિઓસ કોસ્ટ્રિકિસે જણાવ્યું હતું કે, ઘણાં દર્દીઓમાં ડેલ્ટા અને ઓમિક્રોન બંને વેરિઅન્ટની પુષ્ટિ થઈ છે. હવે WHO એ પણ ડેલ્ટાક્રોન વેરિઅન્ટની પુષ્ટિ કરી છે.