ટીમ ઈન્ડિયા હાલ ઓસ્ટ્રેલિયાના પ્રવાસે છે. આ પ્રવાસ દરમિયાન ભારતીય ટીમની સાથે છોકરી જેવા લાંબા વાળ ધરાવતો એક શખ્સ નજરે પડી રહ્યો છે. ચાહકોમાં ચર્ચા શરૂ થઈ કે આખરે આ છે કોણ? આ શખ્સનું નામ છે દયાનંદ ગરાની. 28 વર્ષીય દયાનંદને થ્રો-ડાઉન એક્સ્પર્ટ તરીકે ટીમમાં સામેલ કરવામાં આવ્યો છે. એક સમયે પોલીસ વોલન્ટિયર તરીકે કોલકાતાના રસ્તા પર ટ્રાફિકનું સંચાલન કરતા દયાનંદ ગરાનીએ સપનામાં પણ વિચાર્યું નહોતું કે રોહિત શર્મા, વિરાટ કોહલી જેવા બેટ્સમેન તેની સામે ઊભા રહેશે.
ટીમ ઇન્ડિયામાં લાંબા વાળ ધરાવનાર કોણ છે
આ શખ્સ કેમ આવ્યો ટીમ ઇન્ડિયામાં
થ્રો-ડાઉન એક્સ્પર્ટનું કામ ફાસ્ટ બોલિંગ સામે બેટ્સમેનને પ્રેક્ટિસ કરાવવાનું હોય છે. ગરાની આઇપીએલમાં કિંગ્સ ઇલેવન પંજાબનો હિસ્સો છે. આઈપીએલ પૂરી થયા બાદ તે ભારત આવવાની તૈયારી કરતો હતો તે સમયે જ બીસીસીઆઈએ તેનો સંપર્ક સાધ્યો અને જણાવ્યું કે ઓસ્ટ્રેલિયા પ્રવાસે તમારે પણ સાથે જવાનું છે.
દયાનંદના કહેવા મુજબ, ''સતત ત્રણ કલાક સુધી ૧૪૦ કિ.મી.થી વધારે સ્પીડથી થ્રો-ડાઉન કરવાનું મુશ્કેલ છે.'' બાળપણ ગરીબીમાં પસાર કરનાર ગરાનીએ કહ્યું, ''બાળપણમાં હું શારીરિક રીતે મજબૂત હતો. બાઉન્સર, યોર્કર કે ફૂલ લેન્થ... બેટ્સમેન જેમ ઇચ્છે તેવા થ્રો-ડાઉન માટે હું તૈયાર હોઉ છું.
બંગાળના ટ્રેનર સંજીવ હારુ દાસ સાથે સંપર્કમાં આવ્યા બાદ 2016માં દયાનંદ આંધ્રની ટીમ સાથે જોડાયો હતો, જ્યાં તેણે ટેસ્ટ સ્પેશિયાલિસ્ટ હનુમા વિહારી અને ભારતીય અંડર-19 ટીમના ભૂતપૂર્વ કેપ્ટન રિકી ભુઇને થ્રો-ડાઉન પ્રેક્ટિસ કરાવી હતી. ત્યાર બાદ પંજાબની મુનીશ બાલીએ દયાનંદનું નામ કિંગ્સ ઇલેવન પંજાબને સૂચવ્યું. કિંગ્સ ઈલેવન પંજાબે દયાનંદની પસંદગી કરી. પોતાના આઇપીએલ અનુભવ અંગે દયાનંદે જણાવ્યું, ''લોકેશ રાહુલ, ક્રિસ ગેઇલ અને કુંબલે સાથે ડ્રેસિંગરૂમ શેર કરવો શાનદાર રહ્યો. તમામને મારું કામ પસંદ પડ્યું અને કહ્યું હતું કે મહેનત કરતો રહેજે.''