પાટણ શહેર સહિત જીલ્લામાં રખડતા ઢોરોનો આતંક વધી રહ્યો છે. બે દિવસ પહેલા રખડતા ઢોરે વૃદ્ધ મહિલા પર હુમલો કર્યો હતો. આજે વૃદ્ધનું સારવાર દરમ્યાન મોત નિપજ્યું હતું.
પાટણના રાધનપુરમાં રખડતા પશુનો ત્રાસ
પશુના હુમલામાં ઈજાગ્રસ્ત વૃદ્ધાનુ સારવાર દરમિયાન મૃત્યુ
રૂપાબેન પ્રજાપતિ નામના વૃદ્ધ મહિલાને ઘરમાં ઘૂસી આખલાએ કર્યા હતા ઘાયલ
પાટણ શહેર સહિત જીલ્લામાં રખડતા ઢોરોનો આતંક વધી રહ્યો છે. ત્યારે રાધનપુરના કુંભારવાસમાં બે દિવસ પહેલા રખડતા ઢોરે વૃદ્ધ મહિલા પર હુમલો કર્યો હતો. ઢોરે હુમલો કરતા મહિલા ઈજાગ્રસ્ત થતા તેઓને સારવાર અર્થે ખસેડવામાં આવ્યા હતા. જ્યાં બે દિવસની સારવાર દરમ્યાન આજે વૃદ્ધ મહિલા રૂપાબેન પ્રજાપતિનું મોત નિપજતા ગામમાં ગમગીની વ્યાપી જવા પામી હતી. કોંગ્રેસ શાસિત રાધનપુર નગરપાલિકાને જાણે કે રખડતા ઢોર પકડવામાં કોઈ રસ નથી. જેથી લોકોએ જીવ ગુમાવવાનો વારો આવ્યો છે. ત્યારે નગરપાલિકાના સત્તાધિશો દ્વારા રખડતા ઢોરોને પાંજરામા પુરવામાં આવે તેવી લોકમાંગ ઉઠવા પામી છે.
પાટણ, રાજકોટમાં પણ રખડતા ઢોરોનો લોકો ભોગ બની ચૂક્યા છે
પાટણ શહેરમાં થોડા સમય અગાઉ જ ભાજપના પૂર્વ શહેર પ્રમુખ રસ્તા પરથી પસાર થઈ રહ્યા હતા. તે દરમ્યાન ઢોરે હડફેટે લેતા તેઓને સારવાર અર્થે ખસેડવામાં આવ્યા હતા. ત્યારે ખાડે ગયેલ નગરપાલિકા દ્વારા રખડતા ઢોર પકડવાની કોઈ જ કાર્યવાહિ કરવામાં આવતી નથી. તેના લીધે રાહદારીઓએ ભોગ બનવાનો વારો આવ્યો છે. ત્યારે રાજકોટમાં પણ થોડા સમય અગાઉ સી.સી.ટી.વી. વાયરલ થવા પામ્યા હતા. જેમાં રાજકોટના ભોમેશ્વર વિસ્તારમાં બે રખડતા ઢોર લડી રહ્યા હતા. તે દરમ્યાન એક વૃદ્ધ અને એક બાળકને ઝપેટમાં લીધા હોવાના સી.સી.ટી.વી. વાયરલ થવા પામ્યા હતા.
હાઈકોર્ટે 9 જાન્યુઆરી સુધીમાં નક્કર કામગીરી કરીને રિપોર્ટ સોંપવાનો નિર્દેશ કર્યો
ગુજરાત રાજ્યમાં રખડતા ઢોરનો પ્રશ્ન વિકટ બની ગયો છે. તેવામાં રાજકોટ શહેરમાં ફરી એક વખત રખડતા ઢોરનો ત્રાસ સામે આવ્યો હતો. ભોમેશ્વર વિસ્તારમાં પશુની અડફેટે નિવૃત્ત આર્મીમેન ચડતા ગંભીર ઈજાઓ પહોંચી હતી. સુનાવણીમાં ગુજરાત હાઈકોર્ટે રાજકોટની ઘટનાની નોંધ લીધી હતી. સુનાવણી દરમિયાન એડવોકેટ જનરલે હાઈકોર્ટને ખાતરી આપી હતી કે, રખડતા પશુના ત્રાસને ડામવા નક્કર કાર્યવાહી કરાશે. આ માટે કામગીરી ઝડપી બનાવવામાં આવી રહી છે. આ દરમિયાન હાઈકોર્ટે 9 જાન્યુઆરી સુધીમાં નક્કર કામગીરી કરીને રિપોર્ટ સોંપવાનો નિર્દેશ કર્યો હતો.