બોલીવૂડ / ગંગુબાઈ કાઠીયાવાડી: આલિયા ભટ્ટ જેનું પાત્ર ભજવી રહી છે તેનાથી મોટા મોટા ડોન પણ ધ્રૂજતા હતા

• લેખક એસ.હુસૈન ઝૈદીની બુક 'માફિયા કવીન્સ ઓફ મુંબઈ' પર આધારિત ફિલ્મ
• દગાબાજ પતિએ 16 વર્ષીય ગંગુબાઈને મુંબઈના રેડ લાઈટ વિસ્તારમાં વેચી દીધી હતી.
• માફિયા ડોન કરીમ લાલાને રાખડી બાંધી ભાઈ બનાવ્યો હતો.

મુંબઈના રેડ લાઈટ વિસ્તારમાં કોઠા ચલાવતી ગંગુબાઈના જીવન આધારિત સંજય લીલા ભણસાલી ફિલ્મ બનાવી રહ્યાં છે. જેમાં આલિયા ભટ્ટ ગંગુબાઈના કિરદારમાં નજરે ચડશે. જેનો ફર્સ્ટ લુક સોશિયલ મીડિયા પર વાયરલ થઈ રહ્યો છે. 

એવું કહેવામાં આવે છે ગંગુબાઈ સૌરાષ્ટ્ર વિસ્તારમાં રહેતા હતા. માટે તેમને ગંગુબાઈ કાઠીયાવાડી કહેવામાં આવતા હતાં. તેમનું સાચું નામ ગંગા હરજીભાઈ કાઠીયાવાડી હતું. ગંગાને 16 વર્ષની ઉંમરે તેના પિતાના અકાઉન્ટન્ટ સાથે પ્રેમ થઈ ગયો હતો. અને તે છોકરા સાથે ભાગીને મુંબઈ ચાલી ગયા હતા. 

ગંગુબાઈ હંમેશા એક્ટ્રેસ બનવા ઈચ્છતા હતા. અને તેઓ આશા પારેખ અને હેમા માલિની જેવી એક્ટ્રેસના ફેન હતા.  પરંતુ તેમનો પતિ દગાબાજ નીકળ્યો અને તેણે ગંગુબાઈને મુંબઈના કમાઠીપુરાના રેડ લાઈટ સ્થિત એક કોઠા પર 500 રૂપિયામાં વેચી દીધા.

હુસૈન ઝૈદીની બુક 'માફિયા કવીન્સ ઓફ મુંબઈ' આધારિત ડોન કરીમ લાલાની ગેંગના એક માણસે ગંગુબાઈનો રેપ કર્યો હતો. ત્યારબાદ ગંગુબાઈ કરીમ લાલાને મળ્યાં હતાં અને તેમની પાસેથી ન્યાય માંગ્યો હતો. એટલું જ નહીં ગંગુબાઈએ રાખડી બાંધીને પોતાનો ભાઈ બનાવી લીધો હતો. ત્યારબાદ ગંગુબાઈ સતામાં આવી ગયા અને આગળ જઈને તેઓ મુંબઈના સૌથી મોટા લેડી ડોન બની ગયા. 

ગંગુબાઈ મુંબઈના કમાઠીપુરા રેડ લાઈટ વિસ્તારમાં સેક્સ રેકેટ અને ઘણા કોઠાઓ પણ ચલાવતા હતાં આ ધંધામાં તેઓ મહિલાઓ પ્રત્યે હમદર્દી રાખતાં અને મહિલાઓની મદદ પણ કરતાં હતાં. કોઈ છોકરીની મરજી વિરુદ્ધ ગંગુબાઈ કોઈને કોઠામાં પણ ન રાખતાં.

તેમણે પોતાના પાવરનો ઉપયોગ વેશ્યાઓને તેમનો અધિકાર અપાવવા અને સશક્ત કરવામાં કર્યો હતો. તેમણે આ બાબતને લઈને પૂર્વ પ્રધાનમંત્રી જવાહરલાલ નહેરુ સાથે પણ મુલાકાત લીધી હતી.

કમાઠીપુરાના લોકો માટે ગંગુબાઈએ જે પ્રયત્નો કર્યા હતા તેના માટે જ ત્યાંના લોકોમાં તેમનું માન વધુ હતું. તે સમયે તેમના પાવર અને વિવાદોને લઈને 60ના દાયકામાં 'મેડમ ઓફ કમાઠીપુરા'નું બિરુદ મળ્યું હતું.

'ગંગુબાઈ કાઠીયાવાડી' ફિલ્મના આલિયા ભટ્ટના લુકના બે પોસ્ટર રીલીઝ થયા છે. ફિલ્મ માટે આલિયા ભટ્ટ હિન્દી અને મરાઠીમાં ગાળો આપવાનું શીખી રહી છે. ફિલ્મમાં કરીમ લાલાના રોલમાં અજય દેવગણ હોઈ શકે છે તેવી અટકળો ચાલી રહી છે. સંજયલીલા ભણસાલીએ આલિયા ભટ્ટ માટે અમુક લોકગીતો કમ્પોઝ કર્યા છે. ફિલ્મમાં લાઈવ સાઉન્ડ હશે માટે આલિયાએ તેના ડાયલોગ એક જ વખતમાં બોલવા પડશે. તેને ડબિંગ માટે સેકેન્ડ ચાન્સ નહીં મળે. આ ફિલ્મમાં આલિયા બંધૂક ચલાવતી દેખાશે. આ ફિલ્મ ભણસાલી પ્રોડક્શન અને પેન મુવીઝ દ્વારા પ્રોડ્યુસ કરવામાં આવી રહી છે. આ ફિલ્મ 11 સપ્ટેમ્બરના રોજ રીલીઝ થશે.