સંયુક્ત રાષ્ટ્રસંઘમાં અમેરિકાના રાજદૂત નીકી હેલીએ અમેરિકાના રાષ્ટ્રપ્રમુખ ડોનાલ્ડ ટ્રમ્પને લઇ પોતાના પુસ્તકમાં અનેક ચોંકાવનારા ખુલાસા કર્યા છે. નીકી હેલીએ જણાવ્યું છે કે કઇ રીતે વ્હાઇટ હાઉસમાં ટ્રમ્પના સાથી મંત્રીઓએ જ રાષ્ટ્રપ્રમુખ ડોનાલ્ડ ટ્રમ્પની વાત નહીં સાંભળવા જણાવ્યું હતું અને કઇ રીતે ડોનાલ્ડ ટ્રમ્પની દેશ-વિદેશ સાથે સંકળાયેલા મામલામાં ઉપેક્ષા કરવામાં આવી હતી.
નીકી હેલીએ પોતાના પુસ્તકમાં કર્યો ચોંકાવનારો ખુલાસો
ગઇ સાલના ઓક્ટોબરમાં પોતાના પદ પરથી આપી દીધું હતું રાજીનામું
નીકી હેલીએ પોતાના પુસ્તક 'વિથ ઓલ ડ્યુ રિસ્પેક્ટ'માં ખુલાસો કર્યો છે કે પૂર્વ વિદેશ મંત્રી રેક્સ ટીલરસન અને વ્હાઇટ હાઉસમાં ચીફ ઓફ સ્ટાફ રહી ચૂકેલા જોન કેલીએ તેમને કેટલાક મુદ્દા પર ટ્રમ્પની ઉપેક્ષા કરવા માટે જણાવ્યું હતું.
ભારતીય મૂળના નીકી હેલીએ ગઇ સાલના ઓક્ટોબરમાં પોતાના પદ પરથી રાજીનામું આપી દીધું હતું. તેમને જાન્યુઆરી-ર૦૧૭માં યુએનમાં અમેરિકાના રાજદૂત બનાવવામાં આવ્યા હતા. રાષ્ટ્રપ્રમુખ ડોનાલ્ડ ટ્રમ્પે ટ્વિટ કરીને તેમને ભવિષ્ય માટે શુભકામનાઓ આપી હતી.
નીકી હેલીના જણાવ્યા અનુસાર રેક્સ ટીલરસન અને જોન કેલીએ તેમને વિશ્વાસમાં લઇ જણાવ્યું હતું કે ટ્રમ્પની કોઇ વાત સાંભળવી જોઇએ નહીં. તેમણે એટલે સુધી કહ્યું કે આનો અર્થ રાષ્ટ્રપ્રમુખ ડોનાલ્ડ ટ્રમ્પની ઉપેક્ષા કરવી એવો નહીં, પરંતુ તેમનાથી દેશને બચાવવાે એવો અર્થ કરવો જોઇએ. આ બંને કહેતા હતા કે ડોનાલ્ડ ટ્રમ્પના નિર્ણય નથી અમેરિકાના હિતમાં કે નથી તેમના હિતમાં, કારણ કે ડોનાલ્ડ ટ્રમ્પને પોતે શું કરી રહ્યા છે એ જ ખબર પડતી નથી.
નીકી હેલીએ જણાવ્યું છે કે એક વખત તો રેક્સ ટીલરસને તેમને એવું કહ્યું હતું કે જો રાષ્ટ્રપ્રમુખ ડોનાલ્ડ ટ્રમ્પને એકલા નિર્ણય લેવા દેવામાં આવે તો લોકોને મરવાનો વારો આવશે.
નીકી હેલીએ જણાવ્યું છે કે મેં બંને મંત્રીઓની વાત માનવાનો ઇનકાર કરી દીધો હતો અને આ વાત ખતરનાક હોવાનું જણાવ્યું હતું. જો તેમણે ડોનાલ્ડ ટ્રમ્પની અવગણના કરવી જ હતી તો તેેમણે જાતે જ આ વાત ટ્રમ્પને કહી દેવી જોઇતી હતી. તેમણે મને આ સાજિશમાં સામેલ થવા કહેવું જોઇતું નહોતું. તેમની આ વાત અત્યંત ખતરનાક અને બંધારણના ઉલ્લંઘન સમાન હતી એટલું જ નહીં, તેમની આ વાત અમેરિકી નાગરિકોની વિરુદ્ધ પણ હતી.