ચૂંટણીની મોસમઃ ગુજરાતમાં અહીં લોકસભાની ટિકિટ મેળવવા આ સમુદાયે કર્યુ શક્તિપ્રદર્શન

લોકસભાની ચૂંટણીમાં ટીકીટની માંગ સાથે માલધારીઓનું શક્તિપ્રદર્શન યોજાયું છે. ચાણસ્માનાં ચવેલી ગામે માલધારીઓનું શક્તિ પ્રદર્શન યોજાયું છે. લાલજી દેસાઈ માલજી દેસાઈ અને ગોવા રબારી આ શક્તિ પ્રદર્શનમાં હાજર રહ્યાં હતાં.

કાનજી દેસાઈ સહિતનાં આગેવાનો પણ શક્તિપ્રદર્શનમાં જોડાયાં છે. પાટણમાં લોકસભાની ટિકિટ ઠાકોર ઉમેદવારને અપાય તેવી શક્યતા છે. ત્યારે માલધારી સમાજને લોકસભા બેઠકની ટિકિટ ફાળવાય તેવી માંગ કરવામાં આવી છે.

ઉલ્લેખનીય છે કે આગામી 17મી લોકસભા ચૂંટણી નજીકમાં આવી રહી છે ત્યારે તેની ભાજપ અને કોંગ્રેસ એમ બંને પક્ષો દ્વારા પૂરજોશમાં તૈયારીઓ ચાલી રહી છે. ભાજપ દ્વારા તો ચૂંટણીલક્ષી રેલીઓ પણ શરૂ કરી દેવામાં આવી છે.

2019 લોકસભાની ચૂંટણીનો સમય નજીક આવવાંથી ભાજપ દ્વારા મિશન 350 પ્લસની રણનીતિની પણ તૈયારી શરૂ કરી દેવામાં આવી છે. બીજી બાજુ કોંગ્રેસ દ્વારા પણ ધીમે ધીમે લોકસભાની ચૂંટણીને લઇ પૂરજોશથી તૈયારીઓ સાથે આગામી રણનીતિ ઘડવામાં આવી રહી છે. લોકસભાની 543 બેઠકોની સાથે કેટલાંક રાજ્યોની વિધાનસભાની ચૂંટણીઓ પણ ગમે ત્યારે યોજાશે.

ત્યારે મહત્વનું છે કે બનાસકાંઠા જિલ્લામાં ઠાકોર સમાજનું ખાસ પ્રભુત્વ જોવા મળે છે. જેમ કે પાટણનાં રાધનપુરનાં ધારાસભ્ય અલ્પેશ ઠાકોર વાવનાં ગેનીબેન ઠાકોર જેવાં ઠાકોર સમાજનાં ઉમેદવારોનું ત્યાં ખાસ પ્રભુત્વ જોવા મળે છે.

જેથી હવે આગામી લોકસભા ચૂંટણીને લઇને માલધારીઓ પણ આ વિસ્તારમાંથી તેઓનાં કોઇ આગેવાનને લોકસભા બેઠકની ઉમેદવાર તરીકેની ટિકિટ ફાળવાય તેવી માંગ છે. જેથી ચાણસ્માનાં ચવેલી ગામ ખાતે કેટલાંક માલધારીઓએ આગેવાનો સહિત શક્તિ પ્રદર્શન કર્યું હતું.