નિર્દયતા / પાટણમાં વિદ્યાર્થીને તાલિબાની સજા આપનાર શિક્ષકને સજા ક્યારે? 5-5 દિવસ થયા છતાં શાળાનું વહીવટીતંત્ર કેમ ચૂપ?

• પાટણમાં વિદ્યાર્થીને તાલિબાની સજા આપવા મામલે શિક્ષક વિરુદ્ધ ફરિયાદ
• મયંક પટેલ નામના શિક્ષક વિરુદ્ધ પીડિત વિદ્યાર્થીના પિતાએ નોંધાવી એ.ડિવિઝનમાં ફરિયાદ
• પાટણની એમ.એન હાઈસ્કૂલમાં શિક્ષકે વિદ્યાર્થીને આપી હતી તાલિબાની સજા
• ધોરણ 8માં અભ્યાસ કરતા વિદ્યાર્થીને શાળામાં મસ્તી કરતા શિક્ષકે આપી હતી સજા 
• હાઈસ્કૂલના બીજા માળેથી બાળકને લટકાવી માર્યો હતો માર

પાટણમાં શિક્ષકે વિદ્યાર્થીને તાલિબાની સજા આપ્યાની ઘટનામાં સજા આપનાર શિક્ષક સામે હવે વિદ્યાર્થીના પિતાએ પોલીસ ફરિયાદ નોંધાવી છે. નોંધનીય છે કે,  પાટણની એમ એન હાઇસ્કુલમાં શિક્ષકે વિદ્યાર્થીને માર માર્યાની ઘટના સામે આવી હતી. ધોરણ 8માં અભ્યાસ કરતા વિદ્યાર્થી શાળામાં મસ્તી કરતા શિક્ષકે તાલિબાની સજા આપી હતી. જેમાં શિક્ષકે હાઈસ્કૂલના બીજા માળેથી બાળકને લટકાવી માર માર્યો હતો. જોકે હજી શું શાળા વહીવટી તંત્ર દ્વારા શિક્ષક સામે કોઈ કાર્યવાહી કરવામાં આવી નથી. 

વિદ્યાર્થીને તાલિબાની સજા આપવા મામલે શિક્ષક વિરુદ્ધ ફરિયાદ

પાટણમાં વિદ્યાર્થીને તાલિબાની સજા આપવા મામલે મયંક પટેલ નામના શિક્ષક વિરુદ્ધ એ.ડિવિઝનમાં પીડિત વિદ્યાર્થીના પિતાએ ફરિયાદ નોંધાવી છે. જોકે હાલ પંથકમાં સવાલ ઊભા થઈ રહ્યા છે કે, મયંક પટેલને સજા ક્યારે મળશે? વિદ્યાર્થીને મારવાનો અધિકાર તમને કોણે આપ્યો? બાળકો મસ્તી નહીં કરે તો કોણ મોટા કરશે? જોકે હજી સુધી મયંક પટેલ સામે શાળા તરફથી પણ કોઈ કાર્યવાહી નહીં કરવામાં આવતા પંથકમાં રોષ જોવા મળી રહ્યો છે. 

પરિવારએ પોલીસ ફરિયાદ કરવાની ચીમકી ઉચ્ચારી હતી 

મહત્વનું છે કે, તાજેતરમાં બનેલી ઘટનામાં વિદ્યાર્થીને શરીર પર ઈજાના નિશાન ઉપસી આવ્યા હતા. તેમજ વિદ્યાર્થીને સજા આપ્યા બાદ શિક્ષક ગાયબ જ થઈ ગયું હોય તેવી ચર્ચા થઈ રહી છે, કોઈ એક્શન લેવાય તેના પહેલા જ શિક્ષક ભૂગર્ભમાં ઉતરી ગયો છે. શિક્ષક સામે કડકમાં કડક સજા થાય તેવી પરિવાર દ્વારા માંગ કરવામાં આવી રહી છે. શિક્ષકને સજા નહીં મળવા પર પોલીસ ફરિયાદ કરવાની ચીમકી ઉચ્ચારી હતી. જોકે કોઈ જ કાર્યવાહી નહીં થતાં હવે પરિવારએ શિક્ષક સામે પોલીસ ફરિયાદ નોંધાવી છે. 

શિક્ષક સામે કડકમાં કડક કાર્યવાહી થાય: પરિવારજનો 

આ તરફ  શાળામાં બાળક મસ્તી કરતા તાલિબાની સજાનો ભોગ બનેલ બાળકના પરિવારજનોએ VTV સાથે ખાસ વાતચીત કરી હતી. જેમાં ભોગ બનનારના ફોઈએ કહ્યું હતું કે, શિક્ષક સામે કડકમાં કડક કાર્યવાહી થાય. 

સળગતા સવાલ 

• મયંક પટેલને સજા ક્યારે મળશે?
• વિદ્યાર્થીને મારવાનો અધિકાર તમને કોણે આપ્યો?
• બાળકો મસ્તી નહીં કરે તો કોણ મોટા કરશે?
• શું મયંક પટેલે અન્યનો ગુસ્સો વિદ્યાર્થી પર ઉતાર્યો?
• મયંક પટેલ ક્યાં ફરાર થયા છે?
• મસ્તી કરવાની આવી સજા મળશે તો બાળકો સ્કૂલે આવશે ખરા?
• વિદ્યાર્થીને આવી સજા આપ્યા પહેલાં તમારા હાથ કેમ ન ધ્રુજ્યા?
• વિદ્યાર્થીને ન્યાય ક્યારે મળશે?