૧૬ ડિસેમ્બર, ૨૦૧૨ની એ નિર્લજ્જ રાતે દિલ્હીમાં પેરામેડિકલની ૨૩ વર્ષીય વિદ્યાિર્થની નિર્ભયા સાથે ચાલતી બસમાં છ લોકો દ્વારા બળાત્કાર ગુજારાયો. આ બીભત્સ અને શરમજનક ઘટનાએ વિશ્વભરમાં સનસની ફેલાવી દીધી. આ ઘટનામાં બળાત્કારીઓએ નિર્ભયાના પ્રાઇવેટ પાર્ટમાં લોખંડની પાઇપ નાખી તેના શરીરનાં કેટલાંય અંગો પર બચકાં ભર્યાં હતાં અને તેને લોહીલુહાણ કરી દીધી હતી.
નારી પરના અત્યાચાર ક્યારે અટકશે?
ગત વર્ષમાં બનેલી આ ઘટનાઓ ખરેખર શરમજનક
નેશનલ ક્રાઇમ બ્યૂરોના ૨૦૧૯ના આંકડા ચોંકાવનારા
નિર્ભયાને ન્યાય અપાવવા માટે દેશભરમાંથી ઊઠેલા અવાજોએ ભારત સરકારને મહિલાઓની સુરક્ષા સંબંધિત કાયદો બનાવવા મજબૂર કરી દીધી હતી. ત્રણ મહિનાની અંદર આ કાયદો બન્યો તો આશા જાગી કે તેનાથી મહિલાઓ વિરુદ્ધના અપરાધ ઘટશે, પરંતુ તેમ ન થયું અને બાળકીઓથી લઇ વૃદ્ધાઓ પણ વાસના ભૂખ્યા વિકૃત લોકોના અત્યાચારનો શિકાર થતી રહી.
નેશનલ ક્રાઇમ બ્યૂરોના ૨૦૧૯ના આંકડા ચોંકાવનારા
નેશનલ ક્રાઇમ બ્યૂરોના ૨૦૧૯ના આંકડા પણ એ વાતના સાક્ષી છે. વર્ષ ૨૦૧૩માં દેશમાં મહિલાઓ વિરુદ્ધ ક્રાઇમની ૩,૦૯,૫૪૬ ઘટનાઓ નોંધાઇ હતી, જે વધીને ૨૦૧૯માં ૪,૦૫,૮૬૧ થઇ ગઇ છે. મહિલાઓ પર બળાત્કાર જેવા ઘૃણાસ્પદ ક્રાઇમ કરવાની સાથે-સાથે તેમના શરીર પર અન્ય રીતે પણ અત્યાચાર ગુજારવાનાં કેટલાંક શરમજનક ઉદાહરણ સામેલ છે.
- ૨૧ જાન્યુઆરી, ૨૦૨૦ના રોજ મહારાષ્ટ્રના નાગપુરમાં યોગીલાલ રહંગદાલે નામની ૫૨ વર્ષીય વ્યક્તિએ એક યુવતીના મોંમાં કપડું ભરાવી તેના ગુપ્તાંગમાં લોખંડની પાઇપ ભરાવી દીધી.
- ૮ ઓગસ્ટ, ૨૦૨૦ના રોજ ઉત્તરપ્રદેશના હાપુડમાં હેવાનિયતની તમામ હદ પાર કરી એક યુવકે છ વર્ષીય બાળકીનું અપહરણ કરી તેના પર બળાત્કાર ગુજાર્યો અને તેનો પ્રાઇવેટ પાર્ટ કચડી નાખ્યો.
- ૧૪ સપ્ટેમ્બર, ૨૦૨૦ના રોજ હાથરસ જિલ્લાના ચંદપાના એક ગામમાં ૧૯ વર્ષીય દલિત યુવતી પર ચાર યુવકો દ્વારા સામૂહિક બળાત્કાર કરી બેરહેમીથી માર મારવામાં આવ્યો. તેને આખા શરીરમાં ફ્રેકચર થયું, જીભ કાપી નાખી હતી અને કરોડરજ્જુનું હાડકું તૂટવાથી ૨૯ સપ્ટેમ્બરે હોસ્પિટલમાં તેનું મૃત્યુ થયું હતું.
- ૨૦ નવેમ્બર, ૨૦૨૦ના રોજ મધ્યપ્રદેશના વિદિશા જિલ્લાના જ્ઞારસપુરના ઓલિંજા ગામમાં સુરેન્દ્ર ચિઢાર નામના એક ૨૬ વર્ષીય યુવકે ૭૦ વર્ષીય વૃદ્ધા પર બળાત્કાર કર્યો. તેમણે બૂમો પાડતાં તેમના મોંમાં માટી ભરી દીધી. તેના કારણે શ્વાસ રુંધાતાં તે મૃત્યુ પામ્યાં એટલું જ નહીં, બળાત્કાર કર્યા બાદ તે મર્યાં કે નહીં તે જાણવા તેમના ગુપ્તાંગમાં દંડો પણ ભરાવી દીધો.
- ૨૩ ડિસેમ્બર, ૨૦૨૦ના રોજ ઓડિશાના નયાગઢમાં એક યુવકે પાંચ વર્ષીય બાળકીની હત્યા કર્યા બાદ તેની લાશ પર બળાત્કાર ગુજાર્યો.
- ૩ જાન્યુઆરી, ૨૦૨૧ના રોજ ઝારખંડના રાંચીના ઓરમાંઝીમાં એક યુવતી પર બળાત્કાર ગુજાર્યા બાદ અપરાધીઓએ ગળું દબાવી તેની હત્યા કરી અને તેનું ગુપ્તાંગ પણ કાપી નાખ્યું હતું. યુવતીની ઓળખ છુપાવવા માટે તેનું ગળું પણ કાપી ધડથી અલગ કરી નાખ્યું હતું.
- ૩ જાન્યુઆરી, ૨૦૨૧ના રોજ જાલંધરના પતારા પાસે આવેલા ગામમાં ૨૫ વર્ષીય પ્રવાસી મજૂરે એક છ વર્ષીય બાળકી પર બળાત્કાર કરી તેની હત્યા કરી નાખી હતી.
આવા તો અનેક કેસ સામે આવ્યા છે, જ્યારે બળાત્કારના આરોપ હેઠળ કેટલાક મહિનાઓ કે વર્ષો જેલની સજા કાપ્યા બાદ ગુનેગાર ફરી વખત અપરાધ કરવામાં સંકોચ પણ અનુભવતા નથી. નિર્ભયાના ગુનેગારોને સાત વર્ષ લાંબી કાયદાકીય કાર્યવાહી બાદ ફાંસીની સજા થઇ, પરંતુ હજુ કેટલાય એવા કેસ છે, જે પેન્ડિંગ છે. જ્યાં સુધી મહિલાઓ વિરુદ્ધના આ પ્રકારના અપરાધના કેસને ફાસ્ટ ટ્રેક કોર્ટ દ્વારા જલદીમાં જલદી સુનાવણી કરી ગુનેગારોને મૃત્યુદંડ નહીં અપાય ત્યાં સુધી આવી મનોવિકૃતિઓ રોકાય તે કદાચ જ શક્ય છે.•